LUK 19

Yisu Aser Zakia

1Aser pai Yerikoi ai aser aji süia oya liasü. 2Aser ajiang, nisung ka tenüng agi Zakia ta ajaba yangji liasü, shiba alimelen sarur ka aser takar ka liasü. 3Aser pai Yisu shiba ta reprangtsü bushi; saka pa tar tatsü asünung telokti aliba agi pai reprangtsü mokoki liasü. 4Anungji pai tejakleni asema ao aser Yisu reprangtsü asoshi mungudong kati atu; kechiaser Yisu ilen jagi aotsü liasü. 5Kodang Yisu ajagi aru, pai azüklen repranga pa dang ashi, “Zakia, yakta alung kechiaser tanü ni ner kidang anentsü.” 6Anungji pai ilunga alu aser pelashishia Yisu aniket. 7Kodang parnoki ya angu, ajaki nemnemtepa ashi. “Pa temenenpur ka kidang anentsü iogo.” 8Aser Zakiai noktaka Kibuba dang ashi, “Ajiang, Kibuba, kü rongsen tesadang ka sensaker nem ni agütsüdi, aser ni tai agi kar ket nungi langka agizüka lira, pa nem pezüsü agi tali ni shia agütsütsü.” 9Idangji Yisui pa dang ashi, “Tanü iba kidangi tekümtet arua lir kechiaser pa-a Abraham chir. 10#Mat. 18.11 Kechiaser Nisung Chir samaba bushitsü aser kümzüktsü aru.”

Sen Agi O-entepba

(Mat. 25.14-30)

11 # Mat. 25.14-30 Aser parnoki ya angashidang, pai o-entepba ka ashitsü tenzük; kechiaser pa Yirusalem anasa liasü; aser Tsüngrem Yimliji idangjisa adoktsü ta parnoki bilem, 12anungji pai ashi. “Tamarener nisung kati pei asoshi yimli ka agizüker meyipa arutsü asoshi linük talang kati ao. 13Aser pai pei kilirtem ter, parnok nem sen kaka agütsü aser parnok dang ashi, ‘Item yagi ni maru ashi shishia atang.’ 14Saka par linük sensopurtemi pa sempa aser pa sülen o tongtar ka yoka ashi, ‘Onok madak iba nisung yagi yimsü mesüdaktsünür.’

15“Yimliji agizüker kodang pa meyipa aru, item kilirtem shirnok nem pai sen agütsü, parnoki shishiba ajanga kechi tajangzük angu aji pai metettsüsa pa madangi parnok jar arutsü pai ashi. 16Aser mezüngbubaji pa madangi aru aser ashi ‘Kibur, ne sen to agi ni talila ter ajangzüktsüogo.’ 17Aser Kiburi pa dang ashi, ‘Lanlia, kilir tajung, kechiaser na tila ka nung temulung lemteta lia aruogo, na yimti ter madak tashi akatsü.’ 18Tanabubaji arua ashi, ‘Kibur, ne sen to agi ni pungu tali ajangzüktsüogo.’ 19Aser Kiburi pa dang ashi, ‘Na-a yimti pungu madak tashi akatsü.’ 20Ano tasembubaji arua ashi, ‘Kibuba, ajiang, ne sen to ni sü nung aleper ayu, aji ya; 21kechiaser na tetokdak nisung asünung ni na tsübu. Nai koba ne meyong masü aji agir aser nai koba nung maten aji arur.’ 22Kiburi pa dang ashi, ‘Ne bang o nungi ni ne o bendangdi, na kilir tamajung, ni tetokdak nisung ta, aser kechi kü meyong masü aji ni agir ta, aser kechi ni meprok aji ni arur ta nai metet. 23Ni arudang ni aji tetemlok keter angutsüsa ajangla kechiba nai kü senji sen amshir ket nung meyutsü?’ 24Aser anasa noktakertem dang pai ashi, ‘Pa nungi senji bener oang aser sen ter akaba nem agüjang.’ 25Parnoki pa dang ashi, ‘Kibur, pa sen ter kar!’ 26Pai ashi, ‘Ni nenok dang shidi, shiba aka pa nem tali agütsütsü, saka shiba maka pa kechisa aka ajia pa nungi bener aotsü.’ 27Saka parnok madak ni yimsü mesüdaktsünüba kü tsükchirtemji yangi anir arung aser kü madang parnokji tepsetang.”

Yirusalemi Takok Ngua Aiba

(Mat. 21.1-11; Mar. 11.1-11; Yoh. 12.12-19)

28Aser ya shir külen, pai tejakleni oa, Yirusalemi tuya liasü. 29Kodang Oliv tenem ta ajaba nung Bethfage aser Bethani anasa pai aru, pai nütsüng ana yoka ashi, 30“Nenok jakdang aliba yim jagi oang, yangji nenoki aidang gado chanu ka sentaka angutsü, koba nung nisungi ano kodanga memendang, aji sala-ang aser yagi anir arung. 31Aser nenok dang ya kechiba salar ta kari asüngdangra, nenoki yamai shiang, ‘Kibuba asoshi ya tenüngdaktsü.’ ” 32Aser parnoki ao aser parnok dang ashiba ama angu. 33Aser parnoki gado chanuji salaya alidang, iba kiburi parnok dang ashi, “Kechiba nenoki gado chanuji salar?” 34Aser parnoki ashi, “Kibuba asoshi ya tenüngdaktsü.” 35Aser parnoki aji Yisu dangi anir aru, aser parnoki sü amungloktsü aser idakji Yisu mendaktsü. 36Aser pa gado rongdong nung sanger aodang parnoki lenmang nung sü lemtsü.

37Aser tang Oliv tenem tsüng anasa arudang nütsüngtem telok ajonga jagi parnoki anguba tesüngmangtsü mapatem indang pelateptsü aser Tsüngrem tenüng asangtsü apusoa ashi, 38“Kibuba tenüng nung shiba arur, iba Chubaji temoatsüba lir! Kotak nung tesünep aser tematiba nung Tsüngrem dang sentsüwangshi!” 39Aser telok rongnungji Farisitem kari ashi. “Tesayur, ne nütsüngtem mokorai lidakjang!” 40Aser pai langzü, “Ni nenok dang shidi, itemi mokorai lira, lungtem jagi ayimtentsü!”

Yirusalem Tia Asoshi Yisui Ajepba

41Aser pai kodang anasai aru pai aji ngua iba asoshi ajeb. 42Aser ashi, “Tesünep adokdaktsütsü asoshi kechi nüngdak aji tanüa nai metetla sang! Saka tang ne tenük nungi itemji nembanga lir! 43Kechiaser ne dangi anogotem arutsü, kodang ne tsükchirtemi na meketbanga ali jara yanglutsü aser ajaklen na shibangtsü. 44Aser parnoki na aser ne den aliba nüburtem ajonga ali nung laodakja samatsütsü. Aser parnoki idaki lung ka manung lung ka danga anünga metoktsütsü: Kechiaser nai na semdangi aruba mapangji memetet.”

Tenla Ki Meshitetba

(Mat. 21.12-17; Mar. 11.15-19; Yoh. 2.13-22)

45Aser pai tenla kidangi atu aser tayokertem kimai arizüka yokmesoa, 46parnok dang ashi, “Ya zülua lir, kü kiji sarasademba ki ta ajatsü; saka nenoki rakzükraktemer leprungki kümdaktsüogo.” 47Aser pai anogo shia tenla kidang sayua liasü, saka putiungertemi aser ozüng sayurtemi aser nisungtem rongnung tongtibangtemi paji samatsütsü bushi. 48Saka parnoki inyaktettsüsa parnoki kecha mungutet, kechiaser nisung ajaki pai sayuba nung ojang ka danga mezüdoki jangra-a anga.

Currently Selected:

LUK 19: AONAGABSI

Highlight

Copy