LUK 14

Amungnü Shiranger Ka Anebtsüba

1Amungnü ka kodang pai Farisitem rongnung lenir ka kidangi chiyungtsü atu, parnoki pa mita liasü. 2Saka ajiang pa madang temang waka shirangba nisung ka liasü. 3Aser ozüng metetertem aser Farisitem dang pai ashi, “Amungnü anebtsütsü tim asü masü?” 4Saka parnoki ola madok. Idangji pai nisungba dakji amet aser pai pa anebtsü aser odaktsü. 5Aser pai parnok dang ashi, “Nenok rongnung pei gado mesüra nashi ka tzübu nung tsüker alidang idangyongjisa amungnübo ibaji matsütetba shiba ali?” 6Aser parnoki ya melangzütet.

Tejaokertem Aser Tejaoksang

7Aser tejaokertemi temaba menden shimtetba pai angu, anungji pai o-entepba ka parnok dang ashi, 8“Kodang nisung kati na kiyir benjongi jaokdir, nai menden temaba nung temen, kechiaser ne dang taoba nisung ka pai jaoka lira, nenok tejaokeri ne dangi arua ashitsü; 9iba nisung nem ne tamendak mendenji agüjang, aser idangji nai maksü agi teküboktiba menden nung atsüngzüka alua amentsü apusotsü. 10Saka kodang na jaokdir, oang aser teküboktiba menden nung menang, aser kodang na jaoker arudir, pai ne dang ashitsü, ‘Temba, temaba mendeni tuang.’ Idangji chiyungdak ne den amenertem ajak madak na tushitsü. 11Kechiaser shibaisa pei sasa uludir, pa tila kümdaktsütsü, aser shibaisa pei sasa tila kümdir, pa uludaktsütsü.” 12Aser pai tejaoksang dang ashi, “Kodang nai chiyungdak mesüra benjong ka ayongzükdir, ne tembartem süshia, adianutem süshia, kimangtem süshia, takar kiyonger süshia tejaok, kechiaser parnoki na meyipa jaokra, ne nem tajangzük meyipa agütsütsü. 13Saka kodang nai benjong ka ayongzükdir, sensakertem, tetsüng teka lemtartem aser nükpokertem jatepang; 14aser Tsüngremi na moatsütsü, kechiaser parnoki ne nem shia agütsütsü makok. Kechiaser temeshipur shia arudang nai tajangzük meyipa angutsü.”

Benjong Tulu Agi O-entepba

(Mat. 22.1-10)

15Aser kodang pa chiyungdak amenertem rongnungi nisung kati item angashi, pai Yisu dang ashi, “Shibai Tsüngrem Yimli nung amtsük chidir pa temoatsüba!” 16Saka pai pa dang ashi, “Nisung kati benjong tulu ka yanglua jenti jatep; 17Aser chiyungtsü mapang nung pai pei kilir tejaokertem dangi yoka parnok dang ashi, ‘Arung, kechiaser ajak renema lir!’ 18Saka parnok ajaki iba benjong nungji matentsü obang ka sür, parnok dang tai tokang ta ashitsü tenzük. Mezüngbubai pa dang ashi, ‘Ni ali ka aliogo, aser aji reprangi aotsü tenüngdaktsü; kü dang mela-angma ta ni mepishir.’ 19Ano tangar kati ashi, ‘Ni alu alatsü asoshi nashi pungchi jura pungu aliogo aser ni parnok tendangi aotsü, kü dang mela-ang ta ni mepishir.’ 20Ano tangar kati ashi, ‘Ni tetsür ka den kibong aküm anungji ni marutettsü.’ 21Aser kilirsangji arua itemji kibur dangji ashi. Idangji kibur jagi jashia par kilir dangji ashi, ‘Yimti yimdongtem aser lentitemi kara kara oang aser sensakertem, tsüngtsükertem, nükpokertem aser tetsüng teka lemtartem yagi anir arung.’ 22Idangji kilir jagi ashi, ‘Kibur, nai melaba ama inyakogo aser ano tamendak lir.’ 23Aser kibur jagi kilir dangji ashi, ‘Lenmang tongtibangtemi oang, aser kü ki asüngtsü asoshi nisungtem arudakjang. 24Kechiaser tejaokertem rongnung ka danga kü benjong mechidaktsütsü ta ni ne dang ashir.’ ”

Nütsüngsüba Jenjang

(Mat. 10.37-38)

25Tang telok jenti pa den ao, aser meyiper pai parnok dang ashi, 26“Shibai kü dangi arudir, pai pei tebu, tetsü, kinungtsü, tanurtem, adianutem, aianutem, aser ano pei taküma mesempara, pa kü nütsüng mekümtet. 27Shibaisa pei kangki mapui kü sülen arur, paji kü nütsüng mekümtet. 28Kechiaser nenok rongnung koba nisungi lungki mitsa yanglunür aser aji renemtettsü asoshi sen teperi ali asü mali tamasa mener pai sen tendoktsüba mezüngdanger ama? 29Aji oda mesüra pai kodang tazüngdak yanglu, aser terenemtsü makoker terepranger ajaki paji mezüngmeshia sensatsütsü tenzüka ashitsü. 30‘Iba nisungi ki yanglutsü tenzük aser renemtsü mekoki liasü!’ 31Mesüra koba chubai tangar chuba ka anema rarai aodang pa den temeranger meyi ter agi pa anema meyi metsü anir aruba chuba denji ajuruteptsü akoktsü makoktsü ta tamasa mener meshisadanger ama? 32Aser pai makoktsüsa süra tangar chuba kaji ano tetsüngda talang nung lia pai o tongtar yoka yimjung indang asüngdangtepdaktsür. 33Anungji nenok rongnung shibaisa pei akaba ajak metoktsür, pa kü nütsüng mekümtet.

Tanang Maliba Metsü

(Mat. 5.13; Mar. 9.50)

34“Metsü junger, saka metsü dak pei tanangji samadokra, kechi agi aji nangdaktsütsü. 35Aji ali asoshia mesüra jana toktendak asoshi tetemsü masü; nisungtemi aji endoker. Shiba tangashitsü tenarong aten pai angang!”

Currently Selected:

LUK 14: AONAGABSI

Highlight

Copy