LUK 13
13
Temulung Meyipang Mesüra Samatsü
1Iba mapang nungjisa nisung kar arua Pilati Galil nunger kar tepseta parnok tenlaba zü den meyoktepba indang pa dang ashi. 2Pai parnok dang langzü, “Item Galil nunger yamai kangshia tepset nungji Galil nunger ajak dang nungi parnok temenen tali benshirtem ta nenoki bilemer asü? 3Ni nenok dang shidi, masü, saka nenoki temulung memeyipra nenok ajak yamaji samatsü. 4Mesüra Siloam nung lungki kilem kolak laoba agi nisung terti tepset nung Yirusalem nung alir ajak dang nungi parnok tai tuluba benshirtem ta nenoki bilemer asü? 5Ni nenok dang shidi, masü, saka nenoki temulung memeyipra, nenok ajak yamaji samatsü.”
Tejang Matangba Mungudong Agi O-entepba
6Aser pai iba o-entepba ka ashi, “Nisung kati tsükmenatzü lu nung mungudong ka temdaktsü; aser iba nungi pai tejang bushia aru, saka kecha mangu. 7Aser tsükmenatzü lu ayimba dangji ashi. ‘Ajiang, tang küm asem tashi iba mungudong nung tejang bushia arudagi, saka kecha matanger, ya tsüngdokang, kechiba ali temo ajak chima-a ya idaki yutsütsü?’ 8Saka aluyimsang jagi langzü, ‘Kibuba, ano iba kümbo odang tokjang, ni tazüngji meketa ali tajung tuloktsüdi. 9Aser taruba küm iba jagi tejang tangra junger, saka metangrabang nai tsüngdokangma.’ ”
Amungnü Tsüngtsüker Tetsür Ka Anebtsüba
10Aser amungnü sinagog ka nung pai sayutsüngia liasü. 11Aser ajiang, tetsür ka dak küm terti mokokminba tanela agi shiranga liasü; la koktenadoker aser lai la sasa memetongtet. 12Aser kodang Yisui la angu, pai la jar ashi, “Tetsür, na ne mokokmin nungi chioker.” 13Aser pai pa teka agi la dak kongshi aser khenyongi la metong metonga kümdaktsü aser lai Tsüngrem tenüng asang. 14Aser Yisui amungnü anebtsü nung, sinagog kiburji jashi aser telok dang ashi, “Nisungi mapa inyaktsü asoshi anogo trok lir anungji item anogo nung anebtsütsü asoshi arung, saka amungnü nung masü.” 15Idangji Kibubai pa dang langzü, “Nenok anemsübatem! Nenok ajaki nashi mesüra gado, parnok ayudak ki nungi pila-a tzü jemdaktsütsü amungnü anir maor ama? 16Aser iba tetsür Abraham semchir ka asünung aser Satan agi küm terti tashi alena ali nung aser iba talenba nungi la amungnü salatsütsü tim masü no?” 17Aser item o jembidang pai tsükchir maksüdaktsü aser telok ajak pa sentsüwangshi mapa agi pelashishia aküm.
Jibijang Aser Piyazü Agi O-entepba
(Mat. 13.31-32; Mar. 4.30-32)
18Anungji pai ashi, “Tsüngrem Yimli kechi mesük? Aser kechi den ya medemdangtsü? 19Ibai nisung kati atsüki nung jibijang bener arua prokba mesüker; aser aji ain aser süngdong ka aküm, aser anüng ozütem arua iba kongsangtem nung tesep yanglu.” 20Aser pai tanaben ashi, “Kechi den ni Tsüngrem Yimli medemdangtsü? 21Ibai piyazü koba tetsür kati bener arua amzü tatakzük asem nung enoker ajak pokraka matu tashi ayuba mesüker.”
Kikümbang Temesüba
(Mat. 7.13-14,21-23)
22Aser pai yimtitem aser yimtem ajanga sayuyonga Yirusalem leni ao. 23Aser kari pa dang ashi, “Tulur, tekümtetji nisung ishika atema dang asü?” Aser pai parnok dang ashi, 24“Kikümbang temesübai aitsü merangang; kechiaser ni nenok dang shidi, aikati aitsü meranger saka makoktsü. 25Kodang kibur shishir aser kishiji khenyongi shibanger idangji nai kima noktaktsü tenzüktsü aser kishi nungji akoshitsü aser ashitsü, ‘Kibur, onok nem lapokjangma!’ aser pai nenok dang langzütsü, ‘Nenok kong nungiar ni memetet’ 26Idangji nenoki ashitsü, ‘Onoki ne den külemi chiyunga ajem aser ozü yimdong nung nai sayu.’ 27Saka pai ashitsü, ‘Ni nenok dang shidi, nenok kong nungiar ni memetet. Nenok temenen inyakertem ajak kü madang nungi aenshiang.’ 28Kodang Tsüngrem Yimli nung Abraham, Isak, Yakob aser ainkartem ajak nenoki ngudir aser nenokbo tezülen endoktsü, idangji nenoki ajebtsü aser tepu shiteptsü. 29Aser anüdoklen aser anüolen nungi aser anüolentip aser anüdoklentip nungi nisungtem arua Tsüngrem Yimli nung amentsü. 30#Mat. 19.30; 20.16; Mar. 10.31 Aser ajiang, tesü pur tama, aser tama pur tesü asütsü.”
Yirusalem Asoshi Mangyimba
(Mat. 23.37-39)
31Iba mapang nungji Farisitem kar aru aser pa dang ashi, “Yang nungi pila-a oadokang, kechiaser Herodi na tepsetnür.” 32Aser pai parnok dang langzü, “Nenoki oang aser iba shirong dangji shiang, ajiang, tanü aser asüng ni temenen tanelatem aridoka aser nisungtem anebtsür aser tasemnübuba nung ni kü mapa renemtsü. 33Aji saka tanü, asüng aser yanü ni kü lenmangi aotsüla, kechiaser Yirusalem nungi pilar tanga tesem kar nung ainkar shinga mesamatsüla. 34Oh Yirusalem, Yirusalem, ainkartem tepsetba aser ne dangi yokbatem lung agi onsetba! An tetsüi pei techanu tashikang kübok anitener amokbangba ama ni kwiben ner chirtem külemi anitennü, saka nenoki memulung! 35#TKe. 118.26; Yer. 22.5Ajiang, nenok ki sentoka yutsüogo. Aser ni nenok dang ashir, ‘Kibuba tenüng nung shiba arur pa tepelatsü lir’ ta nenoki mashi tashi nenoki ni mangutsü.”
Currently Selected:
LUK 13: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
