LUK 12
12
Anemsüba Anema Tekümdangtsü
(Mat. 10.26-28)
1Iba mapang nungjisa nisung meyirijang aika tetsüng o tetsüng na ajemteptsüsa külemi nungtendang, pai tamasa pei nütsüngtem dang shimeso, “Farisitem anemsüba piyazü asoshi nenoki kümdangang. 2Saka temai madoktsüsa kecha nembanga maka aser memetettsüsa kecha miima mali. 3Anungji ammang nung kechisa shiogo, aji sangwa nung angashitsü aser taktang telungba nung nenok narong nung kechisa tanemi jembiogo aji kilem manung ayimtentsü.
Shiba Dang Tsübutsü Tim
(Mat. 10.28-31)
4“Aser kü tembartem, ni nenok dang shidi, shiri temang tepseter, aser idakji chia parnoki kecha meinyaktettsü, parnok tetsübu. 5Saka nenoki shiba dang tsübutsü tim ni nenok kümdangdaktsüdi, shibai tepseter külen molumi nung ajongoktsütsü tashi lir pa ang tsübuang; hau ni nenok dang shidi pa-ang tsübuang. 6Alushijak pungu poisa ana yong mayoker ama? Aser parnok ka danga Tsüngrem madang mamadoker. 7Koda ne kolak nung ku ajak pai züngteta lir. Tetsübu, alushijak aika dang nungi nenok taoba.
Nisung Madang Khrista Nangzükba
(Mat. 10.32-33; 12.32; 10.19-20)
8“Aser ni nenok dang shidi, shirisa nisung madang ni nangzükdir, Nisung Chir-ia paji Tsüngrem tenyartem madang nangzüktsü; 9saka shibaisa nisung madang ni menangzüklir, nia Tsüngrem tenyartem madang paji menangzüktsü. 10Aser shirisa Nisung Chir anema o ka jembidir, pa dang aji atoktsü; saka shibai Tanela Temeshi anema ataladir, pa dang aji matoktsü. 11#Mat. 10.19; Mar. 13.11; Luk. 21.14 Aser kodang parnoki nenok sinagog yimsüsürtem bangdak dangi anir arudir nenoki kechi koda langzütsü mesüra kechi jembitsü ta shisa bulua tebilem. 12Kechiaser iba mapang nungjisa nenoki kechi ashitsü tim aji Tanela Temeshi-i nenok dang sayutsü.”
Tamashi Takar Agi O-entepba
13Telokti nungi nisung kati ashi, “Tesayur, küdi dang kü den senmang lemdangang ta shiangma.” 14Pai pa dang ashi. “Nisung shibai nenok madak ni o bendanger ka aser telemsatsür ka kümdaktsür?” 15Aser pai parnok dang ashi; “Angang, tenükshiba, chidiyungdi ajak nungi nenok sasa kümdangang, kechiaser nisung ka takümji pa rongsen jenti akabaji masü.” 16Aser pai parnok dang o-entepba ka ashi, “Takar kati alu nung tsük jenti aru; 17aser pai pei sasa shisadanga ashi, ‘Ni kechi inyaktsü, kechiaser ni kü tsük konga tayudak maka?’ 18Aser pai ashi, ‘Ni ya inyaktsü, ni kü jentem benzüker tuluba küma yanglutsü aser idakji ni kü tsük aser rongsen ajak rizüngtsü. 19Aser ni kü tanela dang ashitsü, Tanela, küm aika asoshi na rongsen aika rizünga lir, kazüa liang, chiang, jemang, aser pela liang!’ 20Saka Tsüngremi pa dang ashi, ‘Na tamashisang, taonungsa ne taküm ne dak nungi akangtsü aser kechi rongsen nai rizünga aka itemji shir meyong asütsü?’ 21Anungji shibaisa pei asoshi rongsen rizüngdir, aser Tsüngrem tsüngdang takar masü, pa iba nisung mesüker.”
Tsüngrem Dak Tamang Akaba
(Mat. 6.25-34)
22Aser pai pei nütsüngtem dang ashi, “Anungji ni nenok dang shidi, nenok taküm asoshi nenoki kechi achitsü mesüra nenok temang asoshi kechi abentsü ta shisa tebulu. 23Kechiaser chiyungtsü dang nungi taküm taoba, aser süoshi dang nungi temang taoba. 24Warotem indang bilemdangang; parnoki matener, marur aser terizüngdak ki mesüra jen maka, saka Tsüngremi parnok mesür. Ozütem dang nungi nenok koda taoba lir. 25Aser nenok rongnung shibai teyongyaba agi pa tar süklep ka inloktsü#12.25: Süklep ka inloktsü mesüra, taküm tatsüka liloktsü. akok? 26Nenoki iba amala mapa tila ka mokokra, kechiba tanga tanüngba indang nenoki shisa bulur? 27Arem labu narotem koda ainer shisadangang; parnoki meinyaker mesüra ang mainer; aji saka ni nenok dang shidi, Solomon pei sentsüwangshi ajak nung item rongnung ka mesüka mesobu. 28Saka Oh, tamang tila nisungtem, kechi arem ai tanü lir aser asüng mimong nung enoka arongtsü, iba nemji Tsüngremi yamai abendaktsü süra, pai idakji chia nenok nem mabendaktsütsü ama? 29Aser nenoki kechi achitsü aser kechi ajemtsü ta tebushima mesüra shisa tebuluma! 30Kechiaser alima kintemi item ajak bushir, saka nenok Tebui item tenüngdaktsü kar ta metet. 31Aji saka nenoki pa Yimli bushiang aser pai nenok nem item ajak bendenloktsütsü.
Kotak Nung Rongsen
(Mat. 6.19-21)
32“Tetsübu, telok tilaba, kechiaser nenok Tebui tepela agi nenok nem Yimliji agütsütsü pai mulungba lir. 33Nenok akabatem yokang aser makar nem angati agüjang aser kotak nung rongsen rizüngang kong auür anasa marur aser tarütsü agi meraksatsür; iba rongsen den tejen makümba sen julitem nenoki pei asoshi renemang. 34Kechiaser kong ne rongsen lir, yangji ne mulunga lir.
Saksalema Aliba Kilir
35“Nenoki nangri kangang aser milen tsükloka saksalema liang. 36Aser kilirtem shirnoki pei kibur shiba kiyir benjongdak nungi kidangi shilangba ata-a alir aser kiburi arua kishi nung akoshidang idangjisa pa nem lapoktsür, item nisungtem ama liang. 37Kilirtem shiri kibur arudang nüka lia angur parnok tepelatsü! Ni nenok dang shitak shidi, pai pei sasa nangri akangtsü aser parnok chiyungdaktsütsü asoshi mendaktsütsü aser arua parnok nem anganütsü. 38Pai mita anükba mapang tanabuba aser tasembuba nung arua, aser parnok yamaji ngura, item kilirtem tepelatsü! 39Saka ya metetang, koba mapang nung auür arutsü kiburi metet asübo pai nüka lila aser par ki merakpokdaktsüla. 40Nenok renema alitsüla, kechiaser nenoki meimlaba mapang ka nungang Nisung Chir arutsü.”
Temulung Lemtetba Aser Temulung Melemtetba Kilir
(Mat. 24.45-51)
41Peteri ashi, “Kibuba, o-entepba ya onok asoshi jembir asü, mesüra ajak asoshi?” 42Aser Kibubai langzü, “Ajangla kiburi par kibong anishidaktsütsüba aser par kilirtem nem mapang shitak nung chiyungtsü shilem anganüdaktsütsü asoshi yutsüba temulung lemtetba aser shisa taka kilirji shiba? 43Par kibur arudang kilir shibai yamaji inyaka ngudir, iba kilirji tepelatsü! 44Atangji ni nenok dang ashir, pai par rongsen ajak madak pa yutsütsü. 45Saka iba kilir jagi kü kibur menurang arutsü ta pei mulung nung shia kilirtem aser kilitsürtem dak azüktsü aser achitsü aser ajemtsü aser yi agi meseptsü apusora, 46aser meimlaba anogo aser memetetba mapang ka nung iba kilir kiburji arutsü aser pa merenshitsü aser temulung melemtetba purtem den paji yutsütsü. 47Aser kilir shibai pei kibur mulung meteter merenemer, mesüra pai mulungba amaji meinyaker pai kanga sashia azükbaji angutsü. 48Saka shibai memetet aser tazükba angutsü temsüa inyaktet pa tazükba tera agi azüktsü. Aser shiba nemsa jenti agüja lir pa nungi jenti akangtsü; aser shir ket nung temulung lema jenti yuja lir pa nungi tali meshitsü.
Yisui Telemsa Adokdaktsüba
(Mat. 10.34-36)
49“Alima nung mi adokdaktsütsü ni aru, aser ya jangruadok asübo koda jungla? 50Saka ni baptiba ka agi baptitsüba lir. Aser ya merenem tashi ni khu agi neneta lir. 51Alima nung yimjung adokdaktsütsü ni aru ta bilemer asü? Ni nenok dang shidi, masü, saka telemsa adokdaktsütsü. 52Kechiaser ki ka nung pungu alibaji lemsatsütsü, oda asemi ana anema aser anati asem anema telemsa adoktsü. 53Tebui techir anema, techiri tebu anema, tetsüi jala anema, jalai tetsü anema, kinungpu tetsüi par chir kinungtsü anema aser lai pei kinungpu tetsü anema nenok rongnung yamaji telemsa adoktsü.”
Mapang Indang Angatetba
(Mat. 16.2-3)
54Aser pai telokti dang ashi, “Kodang nenoki anüolentsütsü mepet ka adokya ngudir, idangyongji nenoki ashir, tzünglu arudagi, aser yamaji ataloker. 55Aser kodang anüolentip mopung aonba nenoki angur, nenoki ashir, anü tsüktsüka aputsü; aser yamaji ataloker. 56Nenok anemsübatem, nenoki alima aser anüng jak ratettsü meteter, saka kechiba nenoki iba mapang tetezü koda shitettsü ajibo memeteter?
Ne Metbuba den Angatettepadokang
(Mat. 5.25-26)
57“Aser kechi shitakba lir aji kechiba nenoki pei sasa angatettepa makümer? 58Kechiaser na metbuba den obendanger dangi aodang, lenmang nung pa den nai puteptsü asoshi merangang; aji oda mesüra pai na obendanger ket nung anioktsütsü aser obendangeri na tepuoker ket nung bendanga agütsütsü aser tepuokeri na tsüngden chiokdak puoktsü. 59Ni ne dang shidi, nai tatembuba poisa kaji meküpdang tashi idak nungjagi na kodaka-angamadoktsü.”
Currently Selected:
LUK 12: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.