LUK 11

Sarasademba Indang Tesayuba

(Mat. 6.9-13)

1Aser tesem ka nung pa sarasadema liasü, aser pa kodang atem, pa nütsüngtem rongnung kati ashi, “Kibuba, Yohani pa nütsüngtem dang sayuba ama, onok dang sarasademtsü sayuang.”

2Aser pai parnok dang ashi, “Kodang nenoki sarasademdir, nenoki yamai shiang,

‘Oba, ne nüng temeshi sang;

Ne Yimli arung. Kotak nung koda lir, alima nung aji oda ne mulung sang.

3Anogo shia chiyungtsü onok nem kua.

4Aser ozü menentem tokang, kechiaser shiri onok dang tai menar parnok ajak dang onokia tai atoker; aser tatitangba dangi onok tanima.’ ”

5Aser pai parnok dang ashi, “Nenok rongnung shiba tembar ka ali, pai pa dangi ayatrem nung oa ashitsü, temba, kü nem amtsük asem apujang; 6kechiaser kü tembar aener ka kü dangi arua lir aser pa nem tagütsütsü ni kecha maka. 7Aser pai kilung nungi langzüa ashi, kü nem timtem tagütsü, ki shibangadokogo, aser ozü tanurtem kü den yipten nung mejanga lir. Ni ne nem agütsütsü asoshi shishitsü makok. 8Ni nenok dang shidi, paji pa temba saka pai shishia magütsünütsü, saka oda pai kanga dang mepishi nung pai shishia pa tenüngdaktsü ajak pa nem agütsütsü. 9Aser ni nenok dang shidi, meshiang, aser aji nenok nem agütsütsü, bushiang aser nenoki angutsü; akoshiang, aser aji nenok nem lapoktsütsü. 10Kechiaser temeshir shiai agizüker, aser shibai bushir pai angur; aser shibai akoshir aji pa nem lapoktsütsü. 11Nenok rongnung tebu kati par chiri amtsük ka meshi nung pa nem lung ka agütsütsüba shiba lir? Mesüra ango ka meshi nung pai pa nem ango melen per ka agütsütsüba shiba ali? 12Mesüra pai entsü ka meshi nung jepja ka agütsütsü asü? 13Ajangla, nenok mejungi liaka nenok chirtem nem sempet tajung agütsütsü nenoki metetra, nenok kotaker Tebui pa dang meshir nem Tanela Temeshi koda tali magütsütsü?”

Yisu aser Belzebul

(Mat. 12.22-30; Mar. 3.20-27)

14Aser pai temenen tanela ka aridokya liasü, koba o mejembitetba suwar ka liasü. Kodang temenen tanelaji oadok, nisung jagi o jembi, aser telokti-i süngmang. 15Saka parnok rongnung kari ashi, “Temenen chuba Belzebul agi pai temenen tanelatem aridoker.” 16Aser tangar kari pa tendanga kotak nungi temaitsü ka meshi. 17Saka parnok tebilemba meteta, pai parnok dang ashi, “Koba yimli pei anema lemsadir teraksa akümer, aser kibong kati pei anema lemsara aji laor. 18Aser Satana pei sasa lemsara ajangla pa yimli koda noktaktsü? Kechiaser Belzebul agi ni temenen tanelatem aridoker ta nenoki ashir. 19Aser ni Belzebul agi temenen tanelatem aridokra, nenok chirtemi shiba agi parnok aridoker? Anungji parnokji nenok o bendanger asütsü. 20Saka ni Tsüngrem tashi agi temenen tanelatem aridokra, ajangla Tsüngrem Yimli nenok dangi arua lir. 21Kodang tashi tait nisung kati nok o nü tabensa bener pei talidak anüker, par rongsen kümzüka lir. 22Saka kodang tashi taitba nisung kati pa dak pungloker aser pa akoker pai tamang ka-a aliba nok-onü pa ket nungi rakzüka bener aor aser terakzükbatemji pai lemsar. 23#Mar. 9.40 Shiba kü den mali pa ni anema lir aser shibai kü den mebendener pai prokshir.

Temenen Tanela Meyipa Aruba

(Mat. 12.43-45)

24“Kodang temenen tanelaji nisung ka dak nungi adoker, tesüngzükdak aser takongdak tesem ka bushia aor aser kecha mangu nung pai ashir, ozü ki koba nungi ni aru ajagi meyipa odi. 25Aser pai meyipa arudangji pai aji oktoker tiptema angur. 26Idangji pai aor aser pa dang nungi tamajungba tanga tanelatem tenet anir arur, aser parnoki aji agi ia alir; aser iba nisung tesü tiaji mezüng tia dang nungi tamajungba akümer.”

27Aser pai ya shia alidang, telokti nungi tetsür kati ola adoka pa dang ashi, “Nu menden kobai na aben aser mama koba nai ayong tepelatsü!” 28Saka pai ashi, “Aji saka shirnoki oji angashir aser angashiba ama inyaker parnok tepelatsü”

Sayatenya Ka Meshiba

(Mat. 12.38-42)

29Aser telokti pa dangi sentenya alidang, pai jembimeso; “Iba putu tamajung putu ka lir aser yangi nisungtemi temaitsü ka bushir, saka Yona temaitsü dak alema tanga temaitsü kecha magütsütsü. 30Kechiaser Ninevi nunger asoshi Yona koda temaitsü ka aküm, aji oda Nisung Chir-a iba putu asoshi temaitsü ka alitsü. 31Anüolentip chubatsüri iba putu nisungtem den obendangdak noktaktsü aser parnok aitsütsü. Kechiaser lai ali tatem nungi Solomon shisatsü angatsü aru, saka ajiang, Solomon dang tuluba ka yangi lir. 32#Yoh. 3.5Ninevi nungeri obendangdak iba putu den noktaktsü aser iba putu aitsütsü; kechiaser Yona sayutsüngiba nung parnoki temulung meyip, saka ajiang, Yona dang tuluba ka yangi lir.

Temang Asoshi Milen

(Mat. 5.15; 6.22-23)

33“Milen tsükloker külen shingai a miima mayur mesüra molok agi sembanga mayur, saka shirnok kidangi aiter parnok nem tesangwa agütsütsü asoshi milendong nung ataloka ayur. 34Ne tenük ne temang asoshi milen lir. Kodang ne tenük junga lir, ne temang ajonga sangwa alitsü; saka kodang ne tenük junga melilir ne temang ajonga tammang agi sünga alitsü. 35Anungji ne dak aliba tesangwaji tammang masütsüsa kanga kümdanga liangma. 36Anungji ne mang ajongaji tesangwa agi sünga lira, ne dak tammang kecha malitsü. Milen agi ne nem tesangwa agütsüba ama ne mang sangwa sangwa-a alitsü.”

Farisitem aser Tezülurtem Yisui Aitsüba

(Mat. 23.1-36; Mar. 12.38-40)

37Kodang pai o jembitem, Farisi kati pa den chiyungtsü pa jaok; anungji pai ao aser chiyungdak amen. 38Pai teka memetsüki dang chiyungba ngua, Farisi nungbaji süngmangadok. 39Anungji Kibubai pa dang ashi, “Oda nenok Farisitemi marok aser su tema shidoker, saka nenok telunglen ambangyim aser tamajung agi sünga lir. 40Nenok tamashi nisungtem, Tsüngrem shibai tema yanglu, paisa telunga meyanglu ama? 41Saka nenok marok aser su nung kechi lir aji sensaker nem agüjang aser nenok dak ajak merüka alitsü.

42“Saka nenok Farisitem, aiatai! kechiaser nenoki napa aser an menemtsü aser tanga ansotsü shia tershilem tenla agütsür, saka nenoki tim obendangba aser Tsüngrem temeim toktsür, itemia nenoki inyaker alitsüla aser tangajia mesentoktsüla, 43Nenok Farisitem aiatai! Kechiaser nenoki sinagogtem nung temaba menden sabur aser shishidak salem aginür. 44Nenok aiatai! Kechiaser nenok nisungi manguba lepertem ama koba manung nisungtemi memeteti jajar.”

45Aser ozüng meteter kati pa dang langzü, “Tesayur, nai ya ashiba agi onok mezüngmeshir.” 46Aser Yisui ashi, “Nenok ozüng metetertem aiatai, kechiaser mebentettsüsa khu nenoki nisungtem nem bendaktsür, saka nenoki pei sasa khu dakji temeyong agi danga mekongshir. 47Nenok aiatai! Kechiaser nenok tetsü tebutemi tepsetba ainkartem leper nenoki yanglur. 48Anungji nenok tetsü-teboutem mapa asoshi kulitemji nenok lir, aser nenoki itemji hau asür; kechiaser parnoki ainkartem tepset, aser nenoki parnok leper yanglur.

49“Anungji Tsüngrem shisatsüia ashir, ‘Ni nenok dangi ainkartem aser tenyartem yoktsü aser parnoki parnok rongnung kar tepsettsü aser kar rishikangshitsü.’ 50Anungji alima tetenzük nungi ainkartem azü tokshiba ajak, 51Abel zü nungi tenladak o temeshidak-na tsüngda nung samaba Zekaria zü tashi iba putu dang nungi akangtsü. Hau, ni nenok dang shidi, iba putu dang nungi aji akangtsü. 52Nenok ozüng metetertem aiatai! Kechiaser nenoki shisatsü ki sabi bener aor, saka nenok sasa iba ki jagi marur aser tangar shir aji agi aitsü meranger parnoka nenoki nokdanger.”

53Aser kodang pa idak nungjagi oadok ozüng metetertemi aser Farisitemi pa anema o aika jembi aser pa dangi tasüngdangba jenti aru, 54aser pai langzüba nungji langka tai lira pa aputsü parnoki mita ali.

Currently Selected:

LUK 11: AONAGABSI

Highlight

Copy