LUK 10

Nütsüng Neter ana Yokba

1Item anogo süir külen, Kibubai tangar neter-ana shimtet aser kongisa pa aotsüba liasü item yimti aser yim shiai parnok anana, pai pa jakdang yoka ata. 2Aser pai parnok dang ashi, “Atangji alu jenti mena lir, saka nübu ishika dang. Anungji par alui nübu yokang ta nenoki alu Kibuba dang sarasademang. 3Nenoki oang, ajiang, tsünü rongnung san chanutem ama ni nenok yoker. 4Sen juli mesüra, yangku mesüra tsüngsem, mesüra tanga kecha nenoki teben; aser lenmang nung anener shinga nema salem tagütsü. 5Shir kidangisa nenok idir tamasa yamai shiang, ‘Iba kidang tesünep liang.’ 6Aser idakji tesünep meimba nisung kar lira, nenok tesünep pa den alitsü; melira nenok dangi aji meyipa arutsü. 7Parnoki kechisa agütsüdir, nenoki chia jema iba kidangji liang, kechiaser inyakerbo pei taa angutsü tim. Ki ka nungi ki kati tuoma. 8Aser yimti kati aidang nüburtemi nenok agizükra, nenok madang kechi yutsüdir aji chiang; 9idakji shiranga alir anebjang aser parnok dang shiang, ‘Tsüngrem Yimli nenok anasa arua lir.’ 10Saka kechi yimti-isa odir aser idakji parnoki nenok magizüklir idak nungjagi yimdongi oang aser shiang, 11‘Onok tetsüng nung aketba nenok yimti auyiji nenok anema temzüka yutsür; aji saka ya metetang. Tsüngrem Yimli anasa arua lir.’ 12#Lip. 19.24; Mat. 10.15; 11.24 Ni nenok dang shidi, Iba anogo nung iba yimti dang nungi Sodom tia azüzüktsü temelaba asütsü!

Temulung Memeyipba Yimti Asoshi Aiatai

(Mat. 11.20-24)

13“Aiatai, Kozarin! Aiatai, Bethsaida! Kechiaser koba mapa tulu nenok rongnung inyak, aji Tair aser Sidon nung inyak asübo parnoki anemsü abener aser aut mezür alemli parnoki temulung meyiper lila. 14Saka nenok o bendangba anogo nung Tsüngremi nenok dangbo Tair aser Sidon tia azüzüktsü temelaba asütsü. 15Aser na Kapernaum, na ne sasa anüng tonga mesotsü asü? Na ali telung tonga bener alutsü! 16#Mat. 10.40; Mar. 9.37; Luk. 9.48; Yoh. 13.20 Shibai nenok dang angar, pai kü dang angar; aser shibai nenok magizüker, pai ni magizüker, aser shibai ni magizüker pai ni yoksangjia magizüker.”

Neter Anaji Meyipa Shilangba

17Neter-anaji pelashishia aru aser ashi, “Kibuba, temenen tanelatemi ne tenüng nung onok dang tashi anga liasü.” 18Aser pai parnok dang ashi, “Tsüngpret ama anüng nungi Satan tsükba ni angu. 19Ajiang, per aser jepja madak aser tsükchir ajak manung ajemshitsü ni nenok nem tashi agütsüogo; aser kecha südanga kecha agia nenok meyirudaktsütsü. 20Aji saka temenen tanelatemi nenok dang tashi angaba agi nenok tepela, saka nenok tenüngtem kotak nung zülua alibayong pela-ang.”

Yisu Pelaba

(Mat. 11.25-27)

21Iba mapang nungjisa pai Tanela Temeshi nung pelashishia ashi, “Oh Oba, anüng aser ali Kibuba, item nai shisa akar aser teshiteter nungi miimbang aser kinü tanurtem tsüngdang jungkai adoktsü nung, ni ne nüng asanger; hau, Oba, kechiaser yamaji nai mulungba liasü. 22#Yoh. 3.35; 10.15 Kü Bui kü nem ajak bendanga agütsüogo; aser Tebu dak alema Techirji shibar shingaia memetet, aser ano Techir aser shir dang Techiri pa jungkai adokdaktsütsü mulunger parnok dak alema Tebuji shingaia memetet.”

23Aser nütsüngtem tsütsü shia pai parnok dang miima ashi, “Nenoki kechi angur, ya angurtem asoshi tepelatsü! 24Kechiaser ni nenok dang shidi, nenoki kechisa angur itemji ainkartem aser chubatem aikati ngunüaka mangu aser nenoki kechisa angashir itemji parnoki angashinüaka mangashi.”

Tajung Samaria

25Aser ajiang, ozüng metetba tesayur ka noktak aser pa tendanga ashi, “Tesayur, teti taküm senmang angutsü asoshi ni kechi inyaktsüla?” 26Pai pa dang ashi, “Ozüng nungji kechi zülua lir? Nai kechi koda züngdanger?” 27#Lev. 19.18; Taz. 6.5; Mat. 22.35; Mar. 12.28 Aser pai langzü, “Ne mulung ajonga agi, ne tanela ajonga agi, ne tashi ajonga agi aser ne mulungsentsü ajonga agi Kibuba ne Tsüngrem meimang; aser ne kiyonger nai pei ama meimang.”

28Idangji Yisui pa dang ashi, “Nai shitak langzüogo; yamaji inyakang aser na taküm alitsü.” 29Saka pai pei sasa temeten ngunüa Yisu dang ashi, “Süra kü kiyongerji shiba?”

30Yisui langzü, “Nisung ka Yirusalem nungi Yerikoi luya liasü, aser pai rakzükraktemertem ajurua parnoki pa dak züka pa süoshi rakzük, aser pa tasütsü ama toktsür pila. 31Aser putir ka iba lenmang jagi luya liasü, aser kodang pai timtemba nisungji angu, pai tezüleni mekena ao. 32Aser ano Levi nunger ka ajagi süi, paia nisungbaji ngua tezüleni mekena ao. 33Saka Samaria nunger ka aeni aodang, kong timtemba nisungji liasü ajagi aru aser kodang pai nisungbaji angu pai aochia bilem, 34pai nisungba anasa ao aser pa zübu nung totzü aser yi enoker alen aser gado manung pa mendaktsü aser tanendak ki kati anir ao, aser pa anebalu. 35Aser tananü pai sen ana agiteter tanendak kibur nemji agüja ashi, ‘Pa anebaluang, aser nai kechisa tali endokdir, ni meyipa arudang aji ni ne nem shia agütsütsü’” 36Yisui pa dang asüngdang. “Item nisung asem rongnung rakzükraktemertemi yirutsüba nisung dang shibai kiyonger ama inyak ta nai bilemer?” 37Aser pai langzü, “Pa dang taochi sayusangji,” Aser Yisui pa dang ashi, “Oang, aser naia yamaji inyakang.”

Yisui Martha aser Mari Semdangba

38Idangji parnok lenmang nung aodang, pai yim kati ai, aser Martha tenüng agi tetsür kati lar kidangi pa aniket. 39Aser la tenu Mari-i Kibuba tsüngdang mener pa tesayuba anga. 40Saka Marthabo kidang mapa jenti agi mazüngi timtemdaktsü aser lai pa dangi arua ashi, “Kibuba, künui kü kisüng nem mapa ajak inyaktsü nungloktsür aji nai meshisadanger ama? Anungji ni yariang ta la dang shiang.” 41Saka Kibubai la dang langzü, “Martha, Martha, mapa aika indang nai shisa bulua timatemer; 42saka ka dang tenüngdaktsü lir. Aser nenu Mari-i la nungi bener maotsüsa tajungba shilemji shimtetogo.”

Currently Selected:

LUK 10: AONAGABSI

Highlight

Copy