TENYARTEM MAPA 7

Stefani Sayutsüngiba

1Idangji Temaba Putiri Stefan dang asüngdang, “Itemi shitak ama?” 2#Lip. 12.1 Stefani langzü, “Adianutem, aser tebuteditem, angang. Asen tebou Abraham Haran nung maliba mapang, pa Mesopotamia nung alidang sentsüwangshi Tsüngrem pa dangi adok, 3aser pa dang ashi, ‘Ner lima aser ner adianutem tokjang, aser ni ne dang koba lima sayudir ajagi arung.’ 4#Lip. 11.31; 12.4 Anungji pai Kaldi lima toktsü aser Haran nung ali. Tebu sür külen idak nungjagi tang nenok aliba limai Tsüngremi pa anir aru. 5#Lip. 12.7; 13.15; 15.18; 17.8 Idakji pa tetsüng ka ajemtakdaka sünga Tsüngremi Abraham nem magütsü. Idangji pa techir malidang pa nem aser pa sülen jakzükbatem nem, ibaji kadaktsütsü asoshi agütsütsü pai nangzük. 6#Lip. 15.13,14 Pa dak jakzükbatem aener lima nung küm noklang pezü alitsü, aser parnoki parnok alar kümdaktsütsü, aser meketmeseni benshitsü ta Tsüngremi yamaji ashi. 7#Lip. 15.13; Ani. 3.12 Parnok koba kin lartem kümdir, iba kin ni o bendangtsü, iba sülen parnok anitettsü aser idaki ni külemtsü. 8#Lip. 17.10; 21.2; 25.26; 29.31 Aser tezüngzüktepba temejeptokba pa nem agütsü. Aji oda Abraham nungi Isak jakzük aser pa tinübuba nung mejeptok. Aji oda Isak nungi Yakob jakzük, aser Yakob nungi tebou terana jakzük.

9“Tebutitem jagi Yosef anema mokokaji aser alar ama pa Ijip nunger dang ayok, saka Tsüngrem pa den liasü. 10#Lip. 41.39-41 Timtem ajak nungi Tsüngremi pa kümzük, aser Ijip chuba Farao tsüngdang pa shisatsü akaba yong pa dang junga benshidaktsü. Idangji Ijip aser pei chuba ki ajak madak yimsüsür tongtiba kümdaktsü. 11#Lip. 42.1,2 Tang Ijip aser Kanan lima ajak nung ayawara aser timtem tulu aru; aji asünung asen tetsü-teboutemi chiyungtsü mungui aküm. 12Saka Ijip lima nung tsük lir ta Yakobi angazük aser asen tetsü-teboutem mezüngbuba ajagi pai parnok yok. 13#Lip. 45.1,16 Tanabenbuba aludang Yosefi pei adianutem nem shitetdaktsü, aser Yosefer kibongji Farao nem meteta kümdaktsü. 14#Lip. 17.18; 45.9; 46.27 Idangji pa tebu Yakob aser pei adianutem ajak, shir ajak agi neter-pungu liasü, parnok arung ta Yosefi aja. 15#Lip. 46.1; 49.33 Anungji Yakob Ijipi alu aser pa aser asen tetsü-teboutem yangji asü. 16#Lip. 23.3; 33.19; 50.7; Yih. 24.32 Parnok Shekemi bener oa, Abrahami Shekem nung Hamor chirtem nungi taribi sen agi aliba leper nungji arem.

17 # Ani. 1.7 “Saka kechi tenangzükba Tsüngremi Abraham nem agütsü, ibaji ataloktsü mapang anasa ait nung Ijip lima nung Israel nüburtem kanga dang züina aküm. 18Idangji Ijip nung Yosef memetetba tangar chuba ka adok. 19#Ani. 1.10,22 Pai asen kin dak külaka benshi aser asen tetsü-teboutem dak mejungi benshi aser parnok taküm melidaktsütsü asoshi parnoki kinü chanutem ajungdokdaktsü. 20#Ani. 2.2 Iba mapang nung Mosa aso, aser pa Tsüngrem tsüngdang tobur kanga junga liasü. Ita asem tashi pa tebuer kidang mesütet. 21#Ani. 2.3-10 Kodang pa par kidang nungi ajungdok, Farao jalai pa bena aru aser lar jabaso küma mesütet. 22Aser Ijip nunger shisatsü ajak angazükdakja Mosa sayutet aser pa o jembiba nung, aser mapa nung tetangshi liasü.

23 # Ani. 2.11 “Saka pa arishi küm lir shi akümdang, pei adianutem, oda Israel purtem semdangtsü temulungi ait. 24Parnok rongnung ka Ijip nunger kati mejungi benshiba ngua, pai Ijip nungba dakji züka pa tepu aküm, aser kangshia aliba nisung asoshi mang ayang. 25Pa ajanga pei nüburtem nem tekümzük Tsüngremi agütsüba pei adianutemi angatetogo ta bilem; saka parnoki aji mangateti liasü. 26Tananüji parnok ana züktepya alidang pai tenaji angu aser pai parnokji jungtepdaktsünüa ashi, ‘Nisungba anaji, nenok adianu lir; kechiba kati ka dak mejungi benshir?’ 27Saka pa kiyonger dak mejungi benshiba nisung jagi Mosa tezülen nunginja ashi, ‘Shibai na onok madak yimsüsür ka aser obendanger kümdaktsü? 28Nai yashi Ijip nungba tepsetba amato nia tepsetnür asü?’ 29#Ani. 18.3 Iba tatalokba mapa ajanga Mosa jena ao, aser Median lima nung aener ka ama ali. Yangji pa nem tanur ana sotsü.

30 # Ani. 3.1-10 “Küm lir süia or külen, Sinai tenem azüngmeyakdak lisem lima arem nung süngsem ka nung mi jangrua aliba ka nung kotak tenyar ka pa dangi adok. 31Mosai kechi angu aji agi pa süngmangadok, aser aji reprangtsü pai anasa arudang pai Kibuba ola angashi; 32‘Ni ne tetsüteboutem Tsüngrem, Abraham, Isak aser Yakob Tsüngrem.’ Mosai atentena liasü aser aji reprangtsü temulung moulutet. 33Kibubai pa dang ashi, ‘Ne tsüngsem ne tsüng nungi semzükang, kechiaser na noktakdakji temeshi li lir. 34Ijip nung kü nüburtem, mejungi timtemba atangji ni nguogo aser parnok anüngba ola ni angashiogo, aser parnok kümzüktsü ni aluogo. Aser tang arung, ni na Ijipi yoktsü.’

35 # Ani. 2.14 Iba Mosa, shiba parnoki magizük ashi, ‘Shibai na yimsüsür aser obendanger asütsü shim?’ Süngsem nung pa dangi adokba tenyar ajanga, yimsüsür aser tekümzüker ka asütsü Tsüngremi pa yokogo. 36#Ani. 7.3; 14.21; Zün. 14.33 Iba nisung jagi Ijip nung Temerem Tzüyim nung, aser azüngmeyakdak lisem lima arem nung küm lir tashi tesüngmangtsü mapatem aser temaitsü sayatenyatem inyaker, pai parnok anitet. 37#Taz. 18.15,18 Iba Mosa jagi Israel purtem dang ashi, ‘Tsüngremi ni adokdaktsüba ama, nenok adianutem rongnungi ainkar ka nenok asoshi adokdaktsütsü.’ 38#Ani. 19.1; Taz. 5.1 Israel purtem ajonga azüngmeyakdak lisem lima nung sentepdaktsübaji pa liasü, aser Sinai tenem nung kotak tenyar ajanga asen tetsü-teboutem den jembia liasü, aser asenok nem agütsütsü asoshi taküm osang shibai agizük iba nisungji pa liasü. 39Pa dang asen tetsü teboutemi tashi mangai liasü, aser parnoki pa sentok aser parnok mulungjang Ijip leni meyip. 40#Ani. 32.1 Parnoki Aron dang ashi, ‘Onok anitsü asoshi onok atema tsüngremtem yanglujang kechiyong Mosa shibai onok Ijip lima nungi anitet, pa kechi aküm onoki memetet.’ 41#Ani. 32.2 Idangji parnoki nashi pungchi chanu ka yanglu aser iba süngyanglu dangi tekülemba bener arua agütsü; aser parnok teka agi yangluba mapa nung parnoki pelatep. 42#Amo. 5.25 Anungji Tsüngrem parnok nungi tejak meyip aser parnokji anüng petinutem külemtsü toktsü, oda ainkartem kaket nung zülua aliba ama:

‘Oh Israel kidong! Azüngmeyakdak lisem lima arem nung,

küm lir mapang nung kü nem tetepsetbatem aser tenlatem nenoki agütsü ama?

43Saka Molek süki nenoki aben,

aser petinutem tsüngrem Rafan,

itemji külemtsü asoshi nenoki süngyanglutem yanglu.

Anungji ni nenok Babilon atena anir aotsü.’

44 # Ani. 25.9,40 “Asen tetsü-teboutemi azüngmeyakdak lisem lima arem nung süki yanglua liasü. Kechi koda yanglutsü Tsüngremi Mosa dang tuyu, aji oda Mosai sükiji yanglu. 45#Yih. 3.14 Kodang Tsüngremi asen tetsü-teboutem jakdang nungi kintem parnok linük nungi aridok; parnoki ajagi ai parnok tendak Yihusua den sükiji bener aru. Aji oda Dawid tensa tashi liasü. 46#2 Sa. 7.1; 1 Pu. 17.1 Yakob Tsüngrem asoshi talidak ki ka yanglutsütsü asoshi Dawidi asüngdang aser aji oda inyaktsü Tsüngrem nungi pai maongka angu. 47#1 Ch. 6.1; 2 Pu. 3.1-17 Saka Solomoni ang Tsüngrem asoshi kiji sütsü. 48Saka Tematiba Tsüngrem, teka agi asüba kitem nung malir. Ainkari ashi ama;

49 # Isa. 66.1 ‘Kotak kü chuba menden aser ali kü tsüng ajemetdak.

Nai kü nem komala ki ka yanglutsütsü ta Kibubai ashir,

mesüra kong ni anisüngzüktsü?

50Item ajak kü keti yanglu masü no?’

51 # Isa. 63.10 “Nenok tekong teküpraktem, temulung matangertem aser tenarong matenertem nenoki teti Tanela Temeshi anema noktaker, nenok tetsü-teboutem ama nenoka lir. 52Ainkartem rongnung nenok tetsü-teboutemi rishikangshi masübashiba ali? Temeshiba arutsü indang shinertemji parnoki tepset: tang nenok tashioktsürtem aser tetepsetertem kümogo. 53Kotak tenyartemi ozüng agütsüba ama nenoki ozüngji agizük, saka nenoki mamshir.”

Stefan Tepsetba

54Parnoki ya angashidang parnok mulungjang tonga ai, aser pa anema tepu shitep. 55Saka Tanela Temeshi agi sünga, pai kotaklen rangketa reprang aser Tsüngrem sentsüwangshi aser Kibuba Yisu, Tsüngrem tajichilen noktaka angu. 56Pai ashi, “Ajiang, kotak lapoker Tsüngrem tajichilen Nisung Chir noktaka ni angur.” 57Saka parnoki ola tulu agi ayimtena, tenarong tangbanger külemi lungjemer pa dangi asemtepa aru. 58Parnoki yimti nungi pa atsür adoka lung agi pa dak aon. Asangur ka tenüng agi Saul tsüngdang kuli purtemi parnok süoshi ayu. 59Kodang parnoki Stefan dak lung agi aon, pai ola adoka ashi, “Kibuba Yisu, kü nela agizükang.” 60Aser Stefani apudaka ola tulu agi ashi, “Kibuba iba tai temenen parnok dak tenloktsü!” Ya shir pa mejangadok.

Currently Selected:

TENYARTEM MAPA 7: AONAGABSI

Highlight

Copy