TENYARTEM MAPA 6

Nisung Tenet Shimba

1Item anogo nungji kodang nütsüng yongsük renloka ao, Grik o jembiba Yihuda puri Ibri o jembiba Yihuda pur tenüng senadok, kechiaser parnok amitsürtem anogoshi chiyungtsü anganüba agi mata. 2Aser terana jagi nütsüngtem telokji parnok dangi jatep aser ashi, “Asenoki chiyungtsü anganütsü asoshi Tsüngrem o sayuba sentoktsü tim masü. 3Anungji adianutem, nenok rongnungi tenüng tajung akaba aser Tanela agi asüngba, shisa taka nisung tenet shimtetang, aser iba rongdak mapa reprangtsü asenoki parnok nem nungloktsüdi. 4Saka onokbo sarasademba aser Tsüngrem Osangtajung sayuba nung bendanga agütsütsü.” 5Iba o jagi telok ajak peladaktsü, aser Tanela Temeshi agi asüngba nisung ka Stefan, aser Filip, Prokora, Nikanor, Timon, Parmena, aser Nikola, Antiok nunger shiba Yihuda yimsüi meyipba nisung ka liasü, parnokji shimtet. 6Parnoki itemji tenyartem tsüngdang noktakdaktsü, aser tenyartemi parnok dak teka agi nemeta sarasadem. 7Aser Tsüngrem Oji züin. Yirusalem nung nütsüngtem yongsük aika renloka ao aser putir telok tulu kati tamangji agizük.

Stefan Apuba

8Stefan, taochi aser ain agi sünga pai nüburtem rongnung temaitsü ayatenya aser tesüngmangtsü mapatem inyaka liasü. 9Saka nisung kar sinagog züngsem nung adenertem shir dang Kurini aser Alexandria nungi aruba Nüjipur#6.9: Nüjipur: Item ya Yihuda nunger shirnok alar süa liasü, saka parnok nem nüji agütsü mesüra parnoki sen agi ali. ta ajar, aser tangartem Kilikia aser Asia nungi arurtem, parnoki Stefan den bangsentepa apuso. 10Saka Stefani shisatsü tarok aser Tanela nung jembibaji parnoki majet. 11Idangji parnoki nisung kar ajioktsü aser parnoki ashi, “Mosa aser Tsüngrem anema atalaba otem pai jembiba onoki angashiogo.” 12Parnoki nisungtem, tamburtem aser tezülurtem ajungmesoa rongrongdaktsütsü asoshi pa den ajurutepa pa pur mungdang tsüngdangi anir aru. 13Parnoki tiyazü kulitem tuyu aser ashi, “Iba nisung yagi Temeshi tekülemdak aser Mosa Ozüng anema jembiba manener. 14Kechiaser iba Nazaret nunger Yisui iba tenla ki ya raksatsütsü aser Mosai asenok nem agütsüba yimsü ya melenshitsütsü ta pai jembiba onoki angashiogo.” 15Aser Mungdang dak mena alir ajaki pa dak ranglok aser pa tejak kotak tenyar tejak mesüka ajitet.

Currently Selected:

TENYARTEM MAPA 6: AONAGABSI

Highlight

Copy