TENYARTEM MAPA 5

Anania Aser Safira

1Saka nisung ka tenüng agi Anania aser tebutsü Safira, tenati rongsen kar ayok, 2aser teyokzükba sen shilem kar tebutsüia meteta agizüka ayu; aser tanüngbaji bener arua tenyartem tsüngdang yutsü. 3Saka Peteri ashi, “Anania, Tanela Temeshi dang tiyazü jembitsü aser ner asoshi sen shilem ka agizüker ayutsü kechiba Satan ne mulungjangi aitdaktsü? 4Ya mayok dang iba rongsen ne meyong liasü aser ya yoker külena iba teyokzükba senji ne meyong masü no? Süra, kechiba nai yamai inyaktsü mulungtet? Nai nisung madang masü saka Tsüngrem madang tiyazü jembiogo.” 5Ananiai item o angashi dang, pa alanga lao aser asü. Ya angashir ajak madak tetsübu tulu adok. 6Idangji asangurtem aru aser parnoki pa mang alung aser parnoki pa mang bener oa arem. 7Ghonda asem shi lir, kechi atalok aji memeteti, pa tebutsü ait. 8Idangji Peteri la dang asüngdang, “Aliji paika yong ayok südi, kü dang shiang.” Aser lai ashi, “Hau, paika yongji dang ayok.” 9Saka Peteri la dang ashi, “Kibuba Tanela atitangtsü kechiba nebuba nenati külemi ya oda bangjem? Ajiang, nebuba aremertem kishi züngdang lir aser parnoki na-a bener aotsü.” 10Idangyongji laji pa tsüngdang lao aser süadok. Asangurtemji aitdang parnoki la sür angu; parnoki la bener adoka tebuba anasa arem. 11Aser arogo ajonga aser item angashir ajak madak tetsübu tulu adok.

Sayatenya Mapatem Inyakba

12Nüburtem rongnung tenyartemi temaitsü sayatenya aser tesüngmangtsü mapatem aika inyak; aser parnok ajak temulung ka sür Solomon Kilempok nung sentep. 13Tanüngbatem shingaia parnok rongnung adentsü temulung moulutet, saka nüburtemi parnok uludaktsü; 14aser Kibuba dak amanger tetsür aser tebur anaprongla aika dang züina aküm. 15Aji asünung Peter süidang, pa tanela agi danga parnok kar akhümbangdaktsütsü asoshi shirangertem yimdongi anizüka yipten aser pakti nung parnoki toktsü. 16Ano Yirusalem temeket yimtitem nungi shirangertem aser temenen tanelai kangshibatem teloki anir arua nungten; aser parnok ajakji anebadok.

Tenyartem Rishikangshiba

17Idangji temaba putir aser pa den alir ajak, shir Saduki telok nungi liasü, parnok tenükmerem agi asüng. 18Parnoki tenyartem dak teka ia yimti nung tepuokdak puoka ayu. 19Saka Kibuba tenyar kati aonung tepuokdak kishi lapoka parnok anitet aser ashi, 20“Nenoki oang, tenla kidang noktaker nüburtem dang iba taküm osang ajak shiang.” 21Kodang parnoki ya angashi sangwatsü mapang nung parnoki tenla kidangi atu aser sayumeso. Saka temaba putir aser pa den alirtem arua, Mungdang aser Israel nunger tamburtem ayongten, aser tenyartem anir arutsü tepuokdaki osang yok. 22Saka kodang sosangtem tonga aru, parnoki parnok tepuokdakji mangu, aser parnoki meyipa arur ashi, 23“Onoki tepuokdak jungjunga shibanga angu, aser tanükertem kikümbang nung noktaka liasü, saka onoki kishi lapokdang kilung nung shinga mangu.” 24Kodang tenla ki tir aser puti-ungertemi item o angashi, parnok indang ya koda asütsü ta kanga ratamata. 25Saka nisung ka arua parnok dang ashi, “Ajiang, nenoki tepuokdak ayuba nisungtemto tenla kidang lir. Parnok idakji noktaka nüburtem dang sayutsüngidagi.” 26Idangji tenla ki tir aser sosangtem ao aser parnok anir aru, aser nüburtemi lung agi aontsü tsübuba agi tashiyim medeni dang anir aru. 27Parnoki tenyartemji anir arua mungdang madang noktakdaktsü. Aser temaba putiri parnok dang asüngdanga ashi, 28#Mat. 27.25 “Iba nisung tenüng nung mesayutsü onoki nenok dang ajang ajanga ozüng agütsü; saka ajiang, nenoki nenok tesayuba agi Yirusalem süngdaktsüogo aser iba nisung südaktsüba tai onok dak kaodaktsü.” 29Saka Peter aser tenyartemi langzü, “Nisung dang masü, Tsüngrem dang ang onoki tashi angatsü tim 30Yisu shiba nenoki kangki dong nung angenlok, asen tsürabur Tsüngremi pa shia arudaktsü. 31Pa tongtiba aser Kümtetdakba kümdaktsütsü asoshi aser Israel nem temulung meyipba aser temenen tatokba agütsütsü asoshi Tsüngremi pa pei tajichilen temalen ajungkettsüogo. 32Item indang onok kuli lir, aser Tanela Temeshi shiba Tsüngremi pa dang tashi angartem nem agütsüogo, pa-a kuli lir.” 33Saka kodang parnoki ya angashi parnok ain adok aser parnoki tenyartemji tepsetnü. 34Saka Farisi ka tenüng agi Gamaliel, ozüng tesayur ka nüburtemi akhümtsübua aliba nübu, mungdang nungji noktak aser nisungtemji khen atema kimai ludaktsütsü pai ashi. 35Pai parnok dang ashi, “Israel nungertem, nenoki item nisung dak kechi inyaknüa ali iba asoshi kümdangang. 36Kechiyong tesüiba mapang nunga Teudai pa sasa tulu shisanga apuso, aser pa den nisung yongsük noklang pezü shi aden. Saka pa tepset, aser pa sülen anishir ajakji prokshi aser aji parnok asoshi tatem liasü. 37Iba sülen tenüng züluba tensa nung Galil nunger ka tenüng agi Yihudai anir pa nüburtemi anema apuso; saka pajia sama, aser pa sülen anitakertem ajak prokshi. 38Tang ni nenok dang shidi, item nisungtem dang kecha tebenshi, saka parnok odang tokjang, kechiyong parnoki kechi sentong atonger aser inyaker ya meimchir nungi süra, ibaji samatsüsa; 39saka ibaji Tsüngrem nungi süra, nenoki parnok samadaktsütsü makoktsü, aser nenok Tsüngrem anema rarartem ta nenoki angatettsü.” 40Yamaji shia pai parnokji mesüzük. Parnoki tenyartemji aja, parnok dak azük aser Yisu tenüng nung kodanga mejembitsü nungtem. Aser parnok chiokadok. 41Aser Yisu tenüng asoshi mezüngmeshi angutsüsa temsüa züngshiba yong pelashishia parnoki mungdang dak nungi pila. 42Aser kenüamati tenla kidang aser kibongtem nung Yisuji Khrista ta sayuba aser sayutsüngiba manen.

Currently Selected:

TENYARTEM MAPA 5: AONAGABSI

Highlight

Copy