TENYARTEM MAPA 28

Paul Malta Asetkong Nung

1Kodang onok kümzükteta tzüküm atong, iba asetkongji Malta ta ajar ta onoki meteta aru. 2Iba nüburtem jagi onok dang onsara junga benshi. Tzünglu alua asük nung, parnoki mi aputetja onok ajak agizük. 3Pauli süngtok tebong ka benden aser mimong nungji aremoktsü, idangji mi talem jagi per ka adokdaktsü aser pa teka nung nailok. 4Kodang iba nüburtem jagi perji pa teka nung sangzüa angu, parnoki jembitepa ashi, “Iba nisung yabo nisung tepseter ka alitsü südi. Pa tzüyim nungi kümzükteta adok, saka ochi o agi pa taküm alitsü memelar.” 5Aji saka pai perji mi nung rükloktsü aser pa kecha meyiru. 6Saka parnoki pa temang waka mesüra aoksa ontaka atangtsü ta bilema liasü. Saka kodang parnoki talangka ata-a liasü, saka pa dak kecha tamajung ataloka mangu, parnoki parnok tebilemba melenshiadok aser paji tsüngrem ka ta ashi.

7Iba linük temeket nungji Publio tenüng agi iba asetkong tongtibar meyong yokya-sonü liasü. Pai onok agizüka anogo asem tashi onok kanga junga anebalua anendaktsü. 8Publio tebu ramen aser azüsen agi shiranga liasü. Pauli pa dangi tua sarasademtsü aser pa dak teka agi nemeta pa anebtsü. 9Kodang ya atalokba angu, asetkong nungji tashitak aketer ajak arua parnoka pai anebtsü. 10Parnoki onok nem sempet aika agütsü. Kodang onok rong nungji apusoa ao onok nüngdak osettem rong nungji parnoki nangoktsü.

Malta Nungi Romi Aoba

11Ita asem süir külen Alexandria nungi aruba rong ka, koba dang “Chakrep Chirtem” ta ajar, iba rongji asetkong nung tsüngkhüm renteta munger ao. 12Onoki Sirakusa tonga aru aser idakji asemnü amung. 13Idak nungjagi apusoa oa onoki Fegium tonga aru. Kenü lir anüolentip mopung adok aser ananü tsüngda nung onoki Puteolai aru. 14Idangji onoki adianutem angu aser parnok den hapta ka amungtsü parnoki mepishi. Yamaji onoki Romi aru. 15Kodang Rom nung alir adianutemi onok indang angashi, Apia Watidak aser Aener ki Asem alidak tonga parnoki onok lenji arua liasü. Kodang Pauli parnok angu, pai Tsüngrem tenüng asang aser tasü itshi. 16Kodang onoki Rom atong, Paul pa kija temeranger kati nüka alitsü mela.

Rom Yimti Nung

17Anogo asem lir külen, Yihuda nungertem rongnung tazüngpurtem külemi pai jatep. Kodang parnok külemi sentep, Pauli parnok dang ashi, “Adianutem, aser nüburtem, asen tetsü-teboutem yimsü anema ni kecha tamajung meinyak, aji saka Yirusalem nungi Rom nunger teka nung puoktsü ni bendanga agütsü. 18Parnoki ni atitanger külen chioknü, kechiaser ni südaktsütsüsa kecha tai mali asü. 19Saka kodang Yihuda nungertemi ni anema jembi; ni ibai Kaisar tonga jembitsüsa aküm, aji saka ni pei kin anema taitsüba langka enloktsütsü atema masü. 20Aji asünung nenok den ajuruteptsü aser kü den jembiteptsü asoshi ni nenok jaokogo; kechiaser Israel nunger teimlaba nung iba merangsen agi ni alener alir.”

21Parnoki pa dang ashi, “Onoki Yihuda lima nungi ne indang shititem kecha mangu, mesüra amangba purtem rongnung shingaia ne indang osang tamajung kecha bener maru mesüra mejembi. 22Saka nai kechi bilemer ibaji onokia na nungi angashinür, kechiaser iba telok indang ajaklen anema jembiba onoki meteta lir.” 23Parnoki Paul asoshi anogo ka shimtet aser parnok aika pa alidaki aru. Aser anepdang nungi nikongtsütsü tashi, Mosa Ozüng aser ainkartem kaket nungi Pauli Tsüngrem Yimli indang kuli agüja aser Yisu indang parnok mesüzüka parnok dang aji rateta sayu. 24Kechi otem ashi itemji kari amang aser kari mamang. 25Kodang parnok rongnung obang mapui kümadok aser parnok senshia liasü, Pauli iba o ya shioktsü: “Tanela Temeshi-i Isaia ainkar ajanga nenok tetsü-teboutem dang shitak yamai shiogo:

26‘Iba kin dangi oang,aser shiang,

Nenoki tangashibo angashitsü,

saka kodanga mangatettsü;

aser nenoki tangubo angutsü saka kodanga majitettsü;

27Kechiaser iba pur mulungjang anüalema kümogo;

aser parnok tangashitsü narong meranga kümogo;

aser parnok tenük amuadokogo.

Yamaji masü asübo Parnoki pei tenük agi ngula,

Aser parnok narong agi angashila,

Aser parnok temulungi angateta aser meyipla,

aser ni parnok anebtsüla.

28“Anungji iba Tsüngrem tekümtetji Bendangertem dangi yoka lir ta nenoki metetang, parnokibo aji angatsü.” 29Pai item o jembimar külen Yihuda nungertem parnok rongnung obang kanga mapui senshi. 30Idakji küm ana renteta pai pei sasa ayanga liasü, aser pa dangi arur ajak pai pelashishia agizüka liasü. 31Aser tenokdangba kecha makai Tsüngrem yimli indang pai sayutsüngi, aser Kibuba Yisu Khrista indang marendaki aser odia sayua liasü.

Currently Selected:

TENYARTEM MAPA 28: AONAGABSI

Highlight

Copy