TENYARTEM MAPA 11

Peteri Yirusalem Nung Osang Agütsüba

1Bendangertemi Tsüngremer Osangtajung agizükogo ta tenyartem aser Yihuda nung aliba adianutemi angashi. 2Anungji kodang Peteri Yirusalemi atu, temejeptokba teloki pa anema jembia; 3parnoki ashi, “Kechiba memejeptokertem dangi na ao aser parnok den külemi na chiyung?” 4Anungji Peteri aji parnok dang tetenzük nungi tatongi shimeso, aser ashi, 5“Ni Yopa yimti nung sarasadema liasü aser ni mangdangi ao, idangji ni yamai ka angu. Idakji oset ka sü tulu ka mesüka kinük pezüsülen amer kotak nungi tsükdaktsüba ni angu, aser aji ni tonga alu. 6Aji ni kanga kümdanga reprangdang nung tetsüng pezü atenba ali shirurutem, arem shirurutem, juzüa senzüba aser anüng ozütem ni angu. 7Aser ano ola kati kü dang ashi, ‘Shishiang, Peter, tepsetang aser chiang.’ 8Saka ni ashi, ‘Kibuba, yamaji kodanga masü, kechiaser menendokba mesüra memeshiba oset kü bangi kodanga meidang.’

9“Saka kotak nungi ola jagi tanaben jembi ‘Kechi Tsüngremi meshitettsüogo aji nai memeshi ta teshima.’ 10Ya asemben tashi atalok aser ajakji tanaben kotaki atsüket. 11Ajiang idangjisa Kaisaria nungi kü dangi yokba nisung asem ni alidak kima noktak. 12Aser kecha meratai dang parnok den külemi aotsü Tanelai mela. Yopa nungi tamanger adianu par trok kü den aru aser onoki Korneliar kidang jagi ai. 13Kodang kotak tenyar ka par kidang noktaka pai angu, iba indangji pai onok dang ashi. Kotak tenyar jagi pa dang yamai ashi, ‘Yopai yokang, aser Simon, shiba dang Peter ta ajar, pa anir arung. 14Aser kechi koda na aser ner kibong ajonga kümzüktsü iba indang osang pai ne dang metetdaktsütsü.’ 15Ni jembitsü tenzüker külen, tetenzüklen asenok daki Tanela Temeshi aluba ama, parnok madakia alu. 16#TMa. 1.5 Kibubar O to ni bilemtet, oda pai ashi ama, ‘Yohani tzü nung dang baptitsü; saka nenok Tanela Temeshi nung baptitsütsü.’ 17Anungji kodang asenoki Kibuba Yisu Khrista dak amang asenok nem Tanela sempet agütsüba ama Tsüngremi parnok nema kasa sempetji agütsü. Sürabangla, Tsüngremi mulungba songtemtsü ni ya shiba?” 18Kodang parnoki item o angashi parnoki mokorai ali; aser parnoki Tsüngrem nem sentsüwangshi agüja ashi, “Ajangla Bendangertemia taküm angutsü asoshi temulung meyiptsü Tsüngremi agütsüogo!”

Antiok Nung Arogo

19 # TMa. 8.1-4 Anungji tamangertem Stefan rishikangshia, pa tepsetba ajanga shirsa ayimsünga prokshia ao parnok Foinika, Kupra aser Antiok tashi ao; aji sakasa Yihuda purtem dak alema shinga danga osangji sayutsüngi mesüi liasü. 20Saka parnok rongnung karbo Kupra aser Kurini nisungtem liasü, shiri Antioki aita Bendangertem dang Kibuba Yisu Osangtajung sayutsüngia oji jembi. 21Kibuba tashi parnok den liasü aser parnok aikati amanga Kibuba dangi meyip. 22Parnok indang osangji Yirusalem nung aliba arogoi angashi, aser parnoki Barnaba Antioki yok. 23Kodang pa tonga aru pai Tsüngrem taochi nisungtem rongnung angu, idangji pa kanga pela aser temulungtetba agi Kibuba dak parnoki azüita alitsü asoshi pai parnok ajak ajungshi. 24Kechiaser Barnaba Tanela Temeshi agi asüngba aser tamang akaba nisung tajung ka liasü. Aser telok tulu ka Kibuba dangi aru. 25Barnabai Saul bushitsü asoshi Tarsai ao. 26Aser kodang pai Saul ajuru, pai pa Antioki anir aru. Parnoki küm ka renteta arogo den külemi liasü aser nisung aika dang sayu. Antiok nung nütsüngtem dangji tamasa Khristantem ta aja.

27Item anogo nungji ainkartem Yirusalem nungi Antioki alu. 28#TMa. 21.10 Parnok rongnung nisung ka tenüng agi Agaba liasü, pai noktaka alima ajak nung ayawara tulu ka arutsü ta Tanela ain agi shin. Ibaji Klaudia yimsüsüba mapang atalok. 29Aser nisungtemi Yihuda lima alir adianutem dangi pei akok tashi teyari yoktsü mulungtet. 30Ibaji parnoki inyak aser Barnaba o Saul na ajanga ibaji tamburtem dangi yok.

Currently Selected:

TENYARTEM MAPA 11: AONAGABSI

Highlight

Copy