TENYARTEM MAPA 12

Yakob Tepsetba Aser Peter Tepuokdak Ayuba

1Iba mapang nungji Herod chubai arogo nungertem kar kangshitsü asoshi teka sotak. 2Pai Yakob, Yohan tedi nok agi lepsetdaktsü. 3Kodang ya Yihuda purtemi pela agizüker ta pai ajitet; pai Peter-a aputsü apuso. Aji Piyazü meinokba Amtsük Benjong mapang liasü. 4#Ani. 12.1-27 Pai pa pur tepuokdak ayu, aser temeranger tanüker ter trok nem bendanga agüja nükdaktsü. Kümtettsü benjongji süir külen nüburtem madangi pa anir atoktsü pai bilema liasü. 5Anungji Peter tepuokdak shibanger nükya liasü. Saka arogoi pa asoshi Tsüngrem dang ajang ajanga sarasadema liasü.

Peter Tepuokdak Nungi Jentetba

6Herodi Peter nüburtem dangi anitetdi ta alidang, paonungji Peter temeranger ana tsüngda nung merangsen ana agi sentaker mejanga liasü; aser ta nükertemi tepuokdak kishi madang nükya liasü. 7Aser ajiang, Kibuba kotak tenyar ka pa anasa noktak, aser tesangwa ka taktang nungji yalok. Pai Peter tesa nung kongshi aser pa mesoa ashi, “Tangsa shishiang.” Idangji pa alenba merangsenji pa teka nungi tsükadok. 8Kibuba tenyar jagi pa dang ashi, “Nangri kangang aser tsüngsem semang aser kü sülen anitakang.” 9Peteri tugu aser pa sülen anitak. Saka Kibuba tenyari pa anishibaji asangsang ta pai mebilem, saka pai mangdang ka angu ta bilem. 10Kodang mezüngbuba aser tanabuba tanüker ajanga parnoki süia ao aser yimti-i aniba merang süngkhüm atong, ibaji pa sasa dang parnok asoshi lapoktsü, aser parnoki tugua yimdong ka ajanga süi. Idangji Kibuba tenyari pa toktsür pila. 11Kodang Peteri ya meteta aküm pai ashi, “Kibubai pei tenyar yoka Herod teka aser kü dak inyaktsü Yihuda nungeri imlaba nungi ni kümzükogo ta ni tang atangji meteter.”

12Pai aji bilemteter külen Yohan shiba dang Mark ta ajar, pa tetsü Mari-er kidangi ao. Idakji aika senteper külemi sarasadema liasü. 13Peteri kishi nungji akoshidang, kilitsür ka tenüng agi Roda, lai aji langzütsü aru. 14Lai Peter ola angateta, tepela agi kishiji melapoki asema ao aser Peter kima noktaka lir ta parnok dang ashi. 15Parnoki la dang ashi, “Na yiamatar;” saka aji atangji ta lai nenshia ashi. Saka parnoki ashi, “Ibaji pa tanela asütsü.” 16Saka Peteri maneni akoshi. Kodang parnoki kishiji lapok, parnoki pa ngua süngmang. 17Saka parnok mokorai alitsü pai teka agi nemtem, aser kechi koda Kibubai pa tepuokdak nungi aniteta anir aru aji pai ashi, ano pai ashi, “Ibai Yakob aser adianutem dang shiang.” Aji shir külen idangyongji pai pila-a tanga tesem kati ao.

18Kodang anepdang aküm, Peter kechi kümadok ta temerangertem rongnungji mangmangtep. 19Herodi pa bushir mungu, aser pai tanükertem dang o asüngdangtep aser parnok südaktsütsü ozüng agütsü. Aser Herodi Yihuda nungi Kaisariai lua idakji amung.

Herod Asüba

20Herodi Tair aser Sidon nunger dang kanga ain adok. Anungji parnoki temulung ka sür pa dangi aru aser parnok yaritsü asoshi Blasta tenüng agi Herod chubar ki kibur den parnoki tembar yimer pa ajanga Herod dang yimjung meshi, kechiaser chubar linük nungi parnok linüki chiyungtsü agia liasü. 21Anogo tatemzük ka nung Herodi pei chuba sobutsü sobu aser obendangba chuba menden nung mener, parnok den o jembi. 22Nisungtemi ayimtena ashi, “Ibai nisunger ola masü, saka tsüngrem ola.” 23Idangji Kibuba kotak tenyar kati pa dak zükoktsü, kechiaser pai Tsüngrem nem sentsüwangshi magütsü; aser pa mesen agi rüseta asü. 24Saka Tsüngrem O maneni züina aser rena ao. 25Parnok mapa temer külen Barnaba aser Saul tena den Yohan shiba dang Mark ta aja, pa anir parnok Yirusalem nungi meyipa shilang.

Currently Selected:

TENYARTEM MAPA 12: AONAGABSI

Highlight

Copy