Popular Bible Verses from Smart Guys 28

Share

Whoeva do stuff agains God, An den try fo cova up wat dey wen do, Garans stuff no goin come out good fo dem. Whoeva do stuff agains God, But den dey tell God dey wen do wass wrong, An no make lidat no moa, God give dem chance.

Whoeva tink da way dey tink is right erytime, Dey tink dey know eryting but dey donno. But whoeva know wat fo do erytime, An live lidat, Dey no goin get hurt.

Da bad guys, dey run away Jalike somebody stay chase um, No matta no mo nobody chase um. But da peopo dat stay do wass right, Dey stay shua dey stay okay, Jalike one lion dat no sked notting.

Da peopo dat no do notting bad Cuz dey erytime come real sked wat goin happen, Dey can stay good inside. But da ones dat no kea cuz dey hard head, Dey goin fall down real hard, An bad tings goin happen to dem.

You give stuff to peopo dat no mo notting, God goin make shua you no goin need notting. You make jalike you donno notting So you no gotta see da peopo dat no mo notting, Bumbye goin get kahuna put on top you So you no can do notting.

Whoeva do wass wrong, An you tell um wat he do stay wrong, Bumbye he goin show you plenny respeck. But if you talk jalike no mo notting wrong, An eryting stay okay, Den da odda guy no goin get respeck fo you.