Popular Bible Verses from Smart Guys 29

Share

Anybody stay sked an shaking Cuz a how dey tink odda peopo tink bout dem, Az jalike one trap dat catch da guy dat stay sked. But anybody stay trus Da One In Charge, Da One In Charge goin make shua notting hurt dem.

Wen no mo nobody talk fo God, Da peopo buckaloose. But anybody dat stay do wat da Rules tell, Dey can stay good inside.

Da stupid kine buggahs dat tink dey no need learn notting, Dey make shua dat erybody know wat dey tink. But da peopo dat know wat fo do erytime, Dey stay cool head, An dey hold back fo no tell wat dey tink.

Teach yoa kids da right way fo ack An use da paddle if dey need um. Den dey goin come da kine peopo Dat know wat fo do erytime. But if you no punish um fo teach um how fo ack, Dey goin make shame fo dea muddah.

Wen yoa kids do someting bad, Punish um fo teach um da right ting fo do. Den bumbye, you no need worry bout dem. Den dey goin do all da good kine stuff you wen teach um fo do, Dat goin make you stay real good inside.

Anybody dat ack high makamaka, Dey goin come notting cuz a dat. Anybody dat no ack high makamaka, Dey goin get plenny respeck.

Anybody dat stay real huhu all da time, Dey like beef erybody. Anybody dat stay mad all da time, Dey erytime goin go agains you.

Wen get one guy dat talk befo he tink, Goin be mo hard fo teach dat guy fo tink befo he talk, Den fo teach one stupid guy fo know wat fo do erytime