Popular Bible Verses from Lucas 3

Share

Nunakunata Juan bautizëkaptinmi Jesúspis bautizakurqan. Bautizakur Teyta Diosman mañakïkaptinmi ciëlu kichakäramurqan. Tsëmi Jesúsman Espíritu Santu imëka urpënö urämurqan. Tsë höram ciëlupita Teyta Dios kënö nimurqan: <<Qammi kuyë tsurï kanki. Qampitam kushikü>>.

Tsënam Juan kënö nirqan: <<Noqaqa yakullawanmi bautizayaq. Jukmi noqapita mas puëdiq shamunqa. Noqaqa manam sirwïtsu pëpa llanqinpa watunta paskanällapaqpis. Pëqa Espíritu Santuwan y ninawanmi bautizayäshunki.

Jutsëkikunata rasunpa jaqishqa karqa Teyta Dios munashqannöna kawayë. Ama yarpäyëtsu Abrahampa castan kayashqëkipita Teyta Dios salvayäshunëkipaq kashqanta. Noqam niyaq: Teyta Dios munarqa kë rumikunatapis Abrahampa castanman tikraratsinmanmi.

Mana wayukuq montikunata sipinpita muturir ninaman jitëkuqnömi jutsa ruraqkunata castigananpaq Teyta Dios listu këkan>>.

Tsënö Juan willakunanpaqmi Teyta Diospa profëtan Isaías qellqashqanchö kënö nin: <<Juk nunam chusyaq jirkachö qaparipa willakur nin: <Teyta Dios shamunanpaq nänita altsayë. Wiksu nänikunata derechayë. Urankunatapis pampatsäyë. Jirkakunatapis parjayë. Wiksu nänikunatapis derechayë. Uchkukunatapis pampatsäyë. Teyta Dios poderninwan salvashqantam jinantinchö täraq nunakuna rikäyanqa> >>.