Popular Bible Verses from Eperu 11

Share

O le fa‘atuatua o le fa‘alagolago lea i mea ‘ua fa‘amoemoe i ai, o le mautinoa lea o mea e lē o va‘aia. Auā ‘ona o lea na ta‘uleleiina ai o ē anamua.

A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia.

O le fa‘atuatua ‘ua tatou iloa ai na faia mea uma i le afioga a le Atua; na faia fo‘i mea ‘ua va‘aia i mea ‘ua lē aliali mai.

O le fa‘atuatua na ‘ana‘ana ai Aperaamo, ‘ina ‘ua vala‘auina o ia e alu i le mea o le a maua e fai mōna fanua, na ia alu fo‘i e le‘i iloa po o fea a alu i ai. O le fa‘atuatua sa āumau ai o ia i le nu‘u na folafolaina, ‘ina o fai mo tagata ‘ese, sa nofo i fale ‘ie, ‘atoa ma Isaako ma Iakopo, o ē na tofia fa‘atasi ma ia i lea lava mea na folafolaina.

O le fa‘atuatua na fausia ai e Noa le va‘a ‘ina ‘ua mata‘u, e ola ai lona ‘āiga, ‘ina ‘ua a‘oa‘oina e le Atua i mea e le‘i va‘aia i ia ona po, na ia fa‘asalaina ai le lalolagi, ‘ua na maua ai fo‘i le amiotonu, o le amiotonu lea e i le fa‘atuatua.

O le fa‘atuatua na ‘ave‘eseina ai Enoka ‘ina ‘ia lē o‘o ‘iā te ia le oti, “na lē iloa fo‘i o ia, auā na ‘avea o ia e le Atua.” Auā a o le‘i ‘ave‘eseina na ta‘ua ai o ia o lē ‘ua fiafia i ai le Atua.

O le fa‘atuatua na avatu ai e Apelu i le Atua le taulaga e sili ‘ona lelei i lo Kaino; ‘ona o lea ‘ua ta‘ua ai o ia ‘ua amiotonu, o lo‘o ta‘uleleia ana taulaga e le Atua; ‘ua oti o ia, a o lona fa‘atuatua ‘ua tautala mai ai pea o ia.

O le fa‘atuatua fo‘i na maua ai e Sara lava le malosi e fānau ai, na fānau fo‘i e ia ‘ina ‘ua mavae tausaga o lona malosi, auā na manatu o ia e fa‘amaoni mai o ia na folafola mai.

Auā na ia fa‘atalitali atu i se ‘a‘ai ‘ua fa‘avaeina, o lona mata‘isau ma le tufuga o le Atua lea.

O le fa‘atuatua na lē mafai ai e Mose, ‘ina ‘ua matua o ia, ‘ona ia ta‘ua o ia o le tama a le afafine o Farao. ‘Ua filifili o ia ‘ia agaleagaina o ia fa‘atasi ma tagata o le Atua e lelei ai, ‘ae ‘aua le ‘iā te ia le fiafia i le agasala e vave mavae. ‘Ua manatu o ia i le ‘upu fāifai ‘ona o Keriso o le ‘oa lea e sili i fa‘aputuga ‘oa o Aikupito; auā sa fa‘anaunau o ia i le taui. O le fa‘atuatua na tu‘uina ai e ia o Aikupito, ‘ua lē fefe i le ita o le tupu; auā na fa‘amalosi o ia pei o sē iloa atu i le lē o va‘aia.

O le fa‘atuatua na fai taulaga ai Aperaamo ‘iā Isaako, ‘ina o tofotofoina o ia, o lē na talia fo‘i ‘upu na folafolaina ‘ua ia avatu ma taulaga o lona atali‘i o to‘atasi.

O le fa‘atuatua, na lē oti fa‘atasi ai Raava le fafine talitane ma ē na fa‘alogogatā, ‘ina ‘ua talifilemūina o ia ē na asiasi i le nu‘u.

O le fa‘atuatua ‘ua latou ui ai i le sami ulaula pei o le ‘ele‘ele matūtū; ‘ua taumafai i ai tagata Aikupito, ‘ona malelemo ai lea o i latou.

O le fa‘atuatua na solo ai pā o Ieriko, ‘ina ‘ua fa‘ata‘amiloina i ona aso e fitu.

O le fa‘atuatua na ia fai ai le paseka, ma le sausauina atu o le toto, ‘ina ‘ia lē papa‘i ane ‘iā i latou o lē na fano ai ulumatua.

O le fa‘atuatua na fa‘amanatu mai ai e Iosefa, ‘ina a oti, i le ō ‘ese atu le fānauga a Isaraelu, ma na poloa‘i atu ai ‘iā i latou i ona ivi.

O le fa‘atuatua na fa‘amanuia ta‘itasi atu ai e Iakopo i atali‘i o Iosefa, ‘ina a oti o ia, “na ifo fo‘i o ia ma to‘ona‘i i le ulu o lona to‘oto‘o.”

O le fa‘atuatua na fa‘amanuia atu ai Isaako ‘iā Iakopo ma Esau i mea atalī.