Popular Bible Verses from Mateo 24

Share

Ka tʋʋmbɛ'ɛdi paasid la zugɔɔ, nidib bɛdegʋ nɔŋilim na sie. Amaa onɛ mɔdigi paae li bɛn la na nyɛ faangir.

Ba na mɔɔl Wina'am sʋ'ʋlim labasʋŋ nwa' gilig dunia nwa' wʋsa, ka buudi wʋsa na wʋmi li, ka li bɛn nyaan paae.

Ya na wʋm tanp tʋkpiidʋg yamma, ka lɛn wʋmi li labaar lallisa. Da kɛ ka dabiem mɔri yaa. Nɛ'ɛnam na niŋ, amaa li ka' dunia naar bɛnnɛ la.

Buudi na zab nɛ buudi, ka na'ab sʋ'ʋlim mɛ na zab nɛ na'ab sʋ'ʋlim. Kɔ'ɔm tita'ar na lu hali, ka tɛɛns na dam zin'is bɛdegʋ. Nɛ'ɛŋa wʋsa anɛ namisʋg la pin'ilʋgʋ la, ka na nwɛnɛ pu'a na sa'ae ka li pin'ili zabid si'em la.

Saazug nɛ dunia na gaad, amaa man pian'ad la kʋ maligim gaadɛ.

Bɔzugɔ nidib bɛdegʋ na kena pian'ad nɛ m yʋ'ʋri yɛt ye, ‘Manɛ an Kristo la,’ ka na pan'as nidib bɛdegʋ ka ba yidig.

“Ba na gban'e ya tis ka ba namisi ya, ka buudi wʋsa na kisigi ya man yʋ'ʋr zug. Ka nidib bɛdegʋ na bas yɛlsida suor ka lieb tʋʋmbɛ'ɛd dimi gbi'id taaba, ka kis taaba. Ziri nɔdi'esidib bɛdegʋ na duoe na pan'as nidib bɛdegʋ ka ba yidig.

Ka o lɛbisi ba ye, “Da kɛ ka sɔ' ma' yaa.

Dinzugɔ yanam mɛ ti'ebimi, ka Ninsaal Biig la lɛbig saŋa, ya kʋ baŋɛ.

“Alazug asɛɛ ka ya gur sʋ'ʋŋa bɔzugɔ ya zi' ya Zugsɔb la na lɛb daasi'er naa.

“Nid baa yinne kae mi' dabisir la bɛɛ saŋa la. Baa maliaknam banɛ bɛ arezana ni bɛɛ Biig laa, asɛɛ Ba' la gʋllim.

Ziri dim na kena ye ba anɛ Kristo, ka ziri nɔdi'esidib na duoe tʋm tʋʋmnyalima nɛ tʋʋm kpi'ema linɛ na pa'al ye ba mɔr paŋ, hali li ya'a naan nyaŋin, ba na bɔɔd ye ba pan'as banɛ ka Wina'am gaans la.

Ninsaal Biig la lɛbig, na nwɛnɛ Noa saŋa la nɛ. Saŋkanɛ ka ku'om da nam pʋ di dunia la, nidib da dit ka nuud, ka dit pu'ab ka tisidi ba biis sidib hali ti paae daakanɛ ka Noa kpɛn' anrʋŋ tita'arin la. Ba da zi' ye si'el na niŋɛ, hali ka saa ti ni ka ku'om dii ba wʋsa. Li mɛ na anɛ alaa tis Ninsaal Biig la lɛbig saŋa na.