Popular Bible Verses from Kolohe 2

Share

Ona kua koutou taliagia ia Keliho Iehu ko te Aliki, ola foki la i te māfutaga fakatahi ma ia. Ke mau ma loloto nā aka o koutou ia te ia, ati ake outou ōlaga i luga o ia, ma ke tuputupu te mālohi o te koutou fakatuatua, e vē oi akoako atu ai koutou. Ma ke fakatūtumugia koutou i te loto fakafetai.

Kikila lelei la kae ke nahe fakavaleagia koutou e he tino i te poto pepelo fakatetagata e hēai he aogā, tēia e hau mai nā akoakoga tuku fakaholo a tagata ma agaga e pūlea te vāteatea, kae hē mai ia Keliho.

Ko koutou na i ei te taimi na pa ai koutou ki te oti i te itū fakateagaga, ona ko autou agahala ma e ona ko koutou ni tagata nukukehe ma nae hē koutou iloa te Tūlāfono. Ka kua toe kaumai koutou e te Atua ki he ōlaga fou fakatahi ma Keliho. Kua fakamāgalo ki tātou e te Atua mai ia tātou agahala uma lele; kua fakahēai e ia a tātou kaitālafu e vē oi fakamaumaugia fakatahi ai ma ona tūlāfono nae fakamamalu ai. Kua fakatino te mea tēnei e ala i te tutuki o Keliho ki luga o te hātaulo.

Auā ko nā uiga uma lele o te Atua e ia Keliho, i tona itū fakatetagata, ma kua fōki atu mo koutou te ola e kātoatoa, i te māfutaga fakatahi ma ia. Ko ia e pule aoao ki ho he agaga e takua he tupu, pe e ia te ia he pule.

Nahe fakataga la e koutou he tino ke ia faia te tonu e uiga ki nā mea e tatau ke kakai ma inu koutou ki ei, pe e uiga ki nā aho paia, pe ki te fakamanatuga o te Māhina Tū Mai, pe ki te Hāpati. Ko nā mea uma vēnā, kua nā ko he ataata o nā mea ko i mua; kae ko te mea kua mautinoa, ko Keliho.