Popular Bible Verses from Kolohe 3

Share

Ke maua e koutou te loto onohai o tētahi ki tētahi, ma kāfai e i ei he faitioga a he tino o koutou ki hētahi tino, ke maua e koutou te agaga fakamāgalo i ho he taimi. E tatau ke fakamāgalo tētahi ki tētahi, e vē oi fakamāgalo koutou e te Aliki.

Fakafano pea lava outou māfaufau ki nā mea i te lagi, kae e hē ki nā mea i te lalolagi.

Pe ko he ā lava he mea e fai e koutou, fai ma te loto kātoatoa, e vē ko koutou e gālulue mo te Aliki, ka e hē mo tagata.

Ko koutou ko nā tino o te Atua; na alofa atu te Atua ki a te koutou, ma na ia filifilia koutou ke fai mo ia. Ko te mea ia e tatau ai koutou ke kokofu i te tīgā alofa, agalelei, loto maulalo, agamalū ma te onohai.

Ko te fekau a Keliho e tatau ke mau i loto ia te koutou, ma fakaaogā te poto ke akoako ma akoaki ai tētahi e tētahi. Lagi nā halamo, nā pehe e uiga ki te ola fakateagaga; pepehe atu ki te Atua ma outou loto fakafetai. Ko nā mea uma la e fai e koutou, e tatau ke fai e koutou mo te Aliki ko Iehu, e vē oi fakafetai koutou kui atu ia te ia, ki te Atua te Tamana.

Ma ke fakaopoopo ki nā uiga lelei uma iēnei te alofa, tēia e ōpoi fakatahia nā mea uma, ma kātoatoa lelei ai.

Kua uma te fakatutū o koutou mai te oti ki te ola fakatahi ma Keliho. Ke fakatāua la i nā loto o koutou nā mea i te lagi, te mea e nofo ai ia Keliho i tona nofoāliki, i te itū taumatau o te Atua.

Ko te fīlēmū e fōki atu e Keliho, ke takitakia ai koutou i autou tonu e fai; auā ko te fīlēmū tēnei kua kalagagia fakatahi ai koutou e te Atua, i te tino e tahi. Ma e tatau la koutou ke maua i te loto fakafetai.

Fakauma loa la nā manakoga o te lalolagi e pūleagia outou tino, e vē ko te tuinanau ki te tino, faiamio mātagā, nanau, nauloto kino, ma te kaimanako (auā ko te kaimanako e tutuha ma te ifo ki tupua).

Auā ko koutou kua oti, ma ko te ola fou o koutou ko hēki fakaaliagia e vē foki lava ko Keliho, i te hokotaga ma te Atua.

Kae nei, kua tatau ke tīaki e koutou nā mea uma iēnei: ko te loto fekai, ko te nauloto ma nā lagona kino. Nahe i ei lele ni kupu fakakino, pe ni kupu palapalā e hau mai outou gutu

Nahe pepelo tētahi ki tētahi, auā kua uma te koutou tuku keheagia o te tino tuai ma ona uiga ma kua i ei outou tino fou. Ko te tino ola fou tēnei e fakafougia pea lava e te Atua tē na faia ia mea uma, ke fōliga ki a te ia, kae ke mālamalama kātoatoa ai koutou e uiga ki a te ia.

Koutou tāne, alolofa ki autou āvaga ma nahe koutou fakahāuā ki ei.

Koutou tamaiti, ko he tiute faka-Kelihiano e o koutou ke uhiuhitaki ki outou mātua i taimi uma, auā ko te mea tonu ia e fiafia ki ei te Atua.

Koutou nā fafine kua fakaipoipo, uhitaki ki autou tāne, auā ko te tū faka-Kelihiano tonu ia e tatau ke koutou faia.