Popular Bible Verses from Pomulanya 24

Share

Wali to papolaong i Abraham etu makai-kai resi i Pue Yawe, ia manganto’o, “O Pue Yawe, Pue Allah to napakabae i Abraham, tau puengku! Kuporapika resi Komi see Komi mampaponsanika resi tau puengku etu kanotoMu. Etu semo, sawang aku seo si’i see aku damangarata tau we’a to damawali indo nu ana i Ishak etu.

Wali ane ratamo sira, Pue Yawe, kuporapika tondong resi Komi see aku damanasa to imba sira to masipato damawali indo nu ana i Ishak, ana ntau puengKu etu. “Wali ewa si’i tondong to damampakanasaka aku tau we’a to Nupilis ngKomi etu. Aku damanganto’oka samba’a sira, ‘Sawang tauraka tampa nuemu pei waika aku ue to dakuinu.’ Panewa tuwu-tuwuja ia damanganto’o, ‘Matao, Pa’a, aku damangawaika komi ue to rainu, pasi aku damampoinu seja unta ngkomi.’ Wali ane ewa wetu pansono ntau we’a etu panewa manasa resi aku ia semo to Nupilis ngKomi damawali indo nu ana i Ishak, to papolaong ngKomi etu. Pasi yako palaong to etu aku damangansani Komi roomo mampaponsanika tau puengku kanotoMu.” Etu semo pokai-kai nto papolaong i Abraham etu resi i Pue Yawe.

Yako etu i Ishak mangkeni i Ribka njo’u raya ntenda to nakaroo nu indonya, i Sara, tempo ia tawa mate. Panewa i Ishak rapasiwaka pei i Ribka. I Ishak mamporayang kojo ia, wali apa saba pamporayanginya resi i Ribka etu, see naka ia rapolindo muni rayanya, tamo mawo kojo mampobuuka kapate nu indonya.

Pei tempo sira tawa yau, tempo etu tau tu’a i Ribka manganto’oka ia, “Kami mampokaika korom, Ribka, see tuwu-tuwuja i Pue Allah damangawaika korom mawali indo ntau malagi nsowu. Pasi tuwu-tuwuja wiyaa ngkorom damanganangi bali nsira.” Ewa wetu pakai-kai nsira mampokaika i Ribka.

Wali re’e seore i Abraham magombo resi to papolaonginya to bae kojo pangkanya, to mampasilonga samparia to re’e resi i Abraham. Ia rani to papolaonginya etu yau mangaliwuka i Ishak tau we’a to damawali indo nu ananya. Wali see naka ia manganto’oka to papolaonginya etu, to’onya, “Aku rani korom mangika parajanji resi aku ri tango i mPue Yawe, etu semo i Pue Allah to nampapowali yangi pasi lino. Wali ika ruyu tondong parajanji to singkonong pei ada kita, panewa janjika kojo aku korom taa damangokoka anangku, i Ishak, tau we’a yako ri oyo ntau to ri tana Kana’an si’i. Kasimbalinya yako etu janjika aku korom dayau muni njo’u lipungku pei liwuka ia tau we’a yako ri oyo nu ja’ingku nja’u ria.” Etu semo to nato’oka i Abraham to papolaonginya etu.