Popular Bible Verses from मरकुस 6

Share

तित्थु मते लोक ओंदे जांदे थे, कने तिन्हां जो खाणे दा मौका भी नीं मिलदा था। ताह़लू यीशुयैं तिन्हां चेलेयां जो ग्लाया, “तुहां जाई नैं कुसी सुनसाण जगाह च चली नैं थोड़ा अराम करा।”

यीशुयैं तिन्हां नैं ग्लाया, “भविष्यवक्ता दा अपणे लाक्के, कने अपणे रिस्तेदारां च, कने अपणे घरे जो छड्डी नैं सब जगाह आदर हुंदा।”

यीशुयैं कने तिसदे चेलेयां किस्तिया ते उतरी नैं मती सारी भीड़ दिक्खी, कने तिन्हां पर तरस खादा, क्जोकि सैह़ तिन्हां भेड्डां साइआं थे, जिन्हां दा कोई रखवाल़ा नीं होयैं; कने सैह़ तिन्हां जो मतिआं गल्लां सखाणा लग्गा।

यीशु अपणे सैहर नासरते च कोई सामर्था दा कम्म नीं करी सकेया, सिर्फ थोड़े दे बमारां पर हत्थ रखी नैं तिन्हां जो खरा कित्ता। कने यीशु तिन्हां दे बेबसुआसे जो दिक्खी करी हरान होएया, ताह़लू सैह़ अक्खे-बक्खे दे ग्रां-ग्रां च जाई-जाई करी सिक्षा दिंदा रेह्आ।

यीशुयैं तिन्हां पंजा रोटियां जो कने दूँ मच्छियां जो लेआ, कने सुअर्गे दे पास्सेयो दिक्खी नैं धन्यावाद कित्ता, कने रोटियां तोड़ी-तोड़ी नैं चेलेयां जो दिंदा गेआ कि सैह़ लोकां जो बंडन, कने सैह़ दो मच्छियां भी तिन्हां सारेयां जो बंडी दित्तियां। सारे खाई नैं रज्जी गै, कने तिन्हां बचियां रोटियां दे बाराह टोकरु भरी नैं किठ्ठे कित्ते, कने कुच्छ मच्छियां दे भी।