Popular Bible Verses from Matayus 6

Share

Nduga yin tānga jāma pyɛ́ de ya sé yê Segwɔm Dagwi, na yin a ra pyɛ́ de Dagwi e simo, ko a rɔda gwɛ̌ a yin ɛ̀ pyɛ́ mo mwa arɔng.

Ano kwong, yin sap e ra nahwol wɛt, yaga pyɛ́ de yin ê sap e ra yɛ̄ nahwol ya sɛ́. Kahɛ tuk ha vɔk reyɔm de ra vey a hɛ.”

“Yaga ano, ma sé ha a yin, yin sap wɛt e ra pyɛ de yin ê re kɛ sɔ na yin a sangal mɛ̀ beken, kɛ e ra berugu de yin a rɔda tɛ̀. Neken na dal pyɛ̂ re wɛt a? Ko rebek arɔng ra dal berugu wɛt arɛt?

Ko jeng de hwó ra won, kyè wɔ̀ yel e duk mō, bang rwi mō, ko rá a Da mō, de be tɔk di ɛ wɛt, won. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.

Ano kwong, rá in won sede ngan: “ ‘À Da mot de hwà sé e lagwi, tik na be nɔ̂ng reza mō re jɛrɛ nerey; tik na jeng de hwô re negwɔm ye vey; tik na be ra pyɛ́ de hwó simo e jey, sede remo de be ra e lagwi.

Nɔng ot pyɛ̂ re de wot e simo yunung.

Hàla a wot buru de wot a ga ra, sede remo de wot arɔng wot a ga hàla a vemo de ba ga buru a wot.

Hwo kwon tik wot wɔ́ e kwɔ̂n setɔgɔs wɛt, ko sey ot yi na Shetan, wo neves.’

“Ka sede yin e hàla a bemat buru de ba ga ra a yin, ko Da min de a sé e lagwi a rɔda hàla a yin arɔng.

Bɛrɛng hin benon de be kyě tele e lagwi: Be tus pyɛ cak wɛt, be yɛt bwal arɔng wɛt, ko be bang pyɛ́ e begban wɛt. Ko mwa ano, Da min de a sé e ji lagwi e nɔngɔ̂s vɛ pyɛ̂ re! Yin a dal benon o ding-ding wɛt a?

“Yin kwon bang a bato min yas e jey wɛt, yaga e ngamo mo bekǔt na sénge be re yɛ, ko begbik arɔng be kulu na be shigi yɛ. Ko báng in a bato min yas e lagwi. E hwomo, bekǔt na sénge be re yas o wɛt, ko begbik arɔng be tɔk kulu na be shigi yɛ wɛt. Yaga yey mō ya rɔda sè e kwɔn de hwà bang ɛ̀ yas mō.”

“Vit a mwat de ê tɔk ra a beda beba fwom. Kɛ ê bɛrɛng womo ves na a simo woro, kɛ ê tɛ̀ nehywɛ mɛ e ra hâ womo na a byɛs woro. Yin ê tɔk ra a Dagwi tanga yas fwom e jeng jining wɛt.

Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!

Ko jeng de hwó nɔ̂ng mwat de a bidɛ pyɛ cak, nɔng ɛ e gwong de vwɔ mwɛlɛng mō gwô tɔk pyɛ de vwɔ yege mō gwa sé ra wɛt. Yi ano, pyɛ de hwà ra ya sé e lɛrɛ. Ko Da mō de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”

“Tē in naka, yin kwon ra tomong min — yerê vemo de yin e ra, yaga yin e raa Dagwi — e bayîs bemat wɛt, yaga na yɛn a bin di pyɛ de yin e ra. Ka sede yin e ra ano, ko yin ê sɛ̀ pyɔlɔ min wɛt yi na Da min de a sé e ji lagwi.

“Ko jeng de yin e tik rê pyɛ́, yin kwon lashe bayis min, sede bemât nenu-neba be ra. Yɛn e bomos bayis, yaga na kawɛ mwat a bin di, yɛn a sé wusal hal. Mwin me ha a yin: Yɛn a ga kana sey pyɔlɔ mɛn. Ko di, jeng de hwó tik rê pyɛ́, mɔmɔ rato mō na něy, na hwo kus bayis mō, yaga na bemat be tɔk di, hwà sé tik rê pyɛ́. Ko e Da mō zɔng, de be tɔk di ɛ wɛt, de a tɔk. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”