Popular Bible Verses from Lucas 7

Share

Uli na niti, sasabian ku keka: linugud yang dakal a dakal uling mipatawaran la ding dakal nang kasalanan. Ninumang tinanggap ditak a kapatawaran, ditak mung lugud ing papakit na. Kanita sinabi nang Jesus king babai, Mipatawaran la ding kasalanan mu.

Oneng sinabi nang Jesus king babai, Linigtas na ka ning kasalpantayanan mu; sulung, mako na kang payapa.

Linukluk ya lele nang bitis Jesus. Tatangis ya at besa na la king lua nang tutulu ding bitis nang Jesus. At kiskusan na la deti king buak na; penuma na la at saka na la tigtugan pabanglu.

ni e ku karapatdapat makiarap kekayu. Magsalita kayu mu at kumayap ya ing ipus ku. Uling metung kung manibala a sakup da naman ding mangatas a opisyal at ating kung sundalus a sasakupan. Nung yutus ku king metung, Lumakad ka, mamintu ya; nung king aliwa naman sabian ku, Mekeni, lumapit ya; at nung sabian ku king kanakung ipus, Daptan mu ini, daptan na. Mipamulala ya i Jesus inyang dimdam na iti; belikdan na la ding dakal a taung tutuki keya. Ngana karela, E ku pa menakit kasalpantayanan a kalupa na niti agyang king Israel!

Kanitang penandit a ita pepakayap na lang Jesus ding dakal a tau karing karelang sakit at kapanamdaman ampon karing espiritung marawak, at pepasublian na la panimanman ding dakal a bulag. Nganang mekibat karing tubud nang Juan, Magbalik kayu at ibalita yu kang Juan ing ikit yu at dimdam: manakit la ding bulag, makalakad la ding pile, kakayap la ding leprosuan, makaramdam lang pasibayu ding maklak, at mabibie lang pasibayu ding mete at mipanaral ing Mayap a Balita karing pakakalulu.