Popular Bible Verses from Lucas 6

Share

Dinan yu la ding aliwa, at dinan na kayu naman ning Dios: tanggap kayu king ustung takal, masiksik, dakal at maglapo ing miyabie kekayu. King sukad a piniukad yu karing aliwa karin na kayu naman sukdan ning Dios.

Papalto yang kayapan ing mayap a tau ibat king mayap a makalaman king pusu na, at papalto yang e mayap ing e mayap a tau ibat king marawak a makalaman king pusu na. Uling magsalita ya ing tau ketang makalaman king pusu na.

E makanyan! Sukat yu lang luguran ding kekayung kalaban, at daptananan yu lang mayap. Mamaram kayu, at e na kayu manenayang mibayaranan pa. King anti kaniting paralan tanggap kayung maragul a ablas at maging anak na kayu ning Kakataskatasan a Dios, uling maganaka ya agyang karing alang pasalamat at marawak.

Maging malunusan kayu, nung makananu yang malunusan i Ibpa yu.

E yu la atulan ding aliwa, at e na kayu naman atulan ning Dios. E kayu mamarusa, at e na kayu parusan ning Dios. Mamatawad kayu, at patawaran na kayu naman ning Dios.

Ikayung makiramdam kanaku, sasabian ku kekayu: Luguran yu la ding kekayung kalaban; daptananan yu lang mayap ding masama kekayu. Bendisyunan yu la ding maniumpa kekayu, at ipanalangin yu la ding manabusu kekayu.

Daptan mu karing aliwa itang buri mung daptan da keka.

Nung timpaling de ing pisngi mu, iyarap mia naman ing kasumangid. At nung kuanan de ing kekang balabal, ibie me pati na ing kekang baru. Ibie mu kaninu mang maniawad keka ing aduan na, at e mu ne pasubli nung kuanan ne ning aliwa ing bandi mu.

E ya mamungang e mayap ing tanaman a mayap ni ing tanaman a e mayap e ya mamungang mayap.

Makikilala ya ing balang tanaman karing bunga na. E kayu mupul biabas nung ing tenam yu santol ya; e kayu munaman mupul ubas nung ing tenam yu lansonis ya.