တမန်တော် 5
5
အာနနိနှင့် ရှိဖိရေ
1သို့ရာတွင် အာနနိအမည်ရှိသောလူတစ်ဦးနှင့် သူ၏ဇနီးရှဖိရေတို့သည် ပိုင်ဆိုင်မှုတချို့ကို ရောင်းကြ၏။ 2အာနနိသည် ဇနီးသည်နှင့် သဘောတူလျက် ရောင်းရငွေတချို့ကို မိမိအတွက် ဖယ်ထားကာ ကျန်ငွေတချို့ကိုသာ ယူဆောင်ခဲ့ပြီးလျှင် တမန်တော်တို့ထံ အပ်လေ၏။
3ပေတရုက “အာနနိ… သင်သည် အဘယ်ကြောင့် စာတန်အား သင်၏စိတ်နှလုံးထဲ၌ အုပ်စိုးခွင့်ပေးသနည်း။ သင်သည် မြေရောင်းရသောငွေတချို့ကို ယူထား၍ သန့်ရှင်းသောဝိညာဉ်တော်ကို လှည့်စားပြီ။ 4ထိုမြေကို မရောင်းဘဲရှိစဉ် သင်ပိုင်သည်မဟုတ်လော။ မရောင်းဘဲထားလျှင်လည်း သင်၏ဥစ္စာပင်ဖြစ်သည် မဟုတ်လော။ ထိုမြေကို ရောင်းချပြီးလျှင်လည်း ရရှိသောငွေကို သင်အလိုရှိသည့်အတိုင်း ပြုနိုင်သည်မဟုတ်လော။ သို့သော်လည်း သင်၏စိတ်နှလုံးထဲ၌ ဤမကောင်းမှုကို အဘယ်ကြောင့် ကြံစည်ရသနည်း။ သင်သည် ငါတို့ကို လှည့်စားသည်မဟုတ်။ ဘုရားသခင်ကို လှည့်စားပြီ” ဟု ဆိုလေ၏။
5ထိုစကားကို ကြားသောအခါ အာနနိသည် လဲကျ၍ သေဆုံးလေ၏။ ဤအဖြစ်ပျက်ကို ကြားသောသူရှိသမျှတို့သည် အလွန်ထိတ်လန့်ကြ၏။ 6လူငယ်တချို့သည် လာ၍ သူ၏အလောင်းကို အဝတ်နှင့် ရစ်ပတ်ပြီးလျှင် သယ်ဆောင်သွား၍ သင်္ဂြိုဟ်ကြ၏။
7ထို့နောက် သုံးနာရီခန့်ကြာသော် သူ၏ဇနီးသည် ဖြစ်ခဲ့ပြီးသောအဖြစ်အပျက်ကို မသိဘဲဝင်လာ၏။ 8ပေတရုက “သင်တို့သည် ထိုမြေကို ဤမျှလောက်ဖြင့် ရောင်းသလော” ဟု မေး၏။
ထိုအမျိုးသမီးကလည်း “ဟုတ်ပါ၏။ ဤမျှလောက်ဖြင့်သာ ရောင်းပါပြီ” ဟု ပြန်ပြော၏။
9ထိုအခါ ပေတရုက သူ့အား “သင်တို့နှစ်ဦးစလုံးသည် အဘယ်ကြောင့် ထာဝရဘုရား၏ဝိညာဉ်တော်ကို လှည့်စားရန် သဘောတူ၍ ပူးပေါင်းကြံစည်ကြသနည်း။ ကြည့်လော့။ သင်၏ခင်ပွန်းကို သင်္ဂြိုဟ်သောသူတို့သည် တံခါးနားတွင် ရောက်နေကြပြီဖြစ်၍ သူတို့သည် သင့်ကိုလည်း သယ်ဆောင်ကြလိမ့်မည်” ဟု ဆို၏။
10ချက်ချင်းပင် သူသည် ပေတရု၏ခြေရင်းတွင် လဲကျ၍ သေဆုံးလေ၏။ လူငယ်တို့ ဝင်လာကြသောအခါ ထိုအမျိုးသမီးသေဆုံးနေသည်ကို တွေ့ကြသဖြင့် သူ့ကို သယ်ဆောင်သွား၍ သူ၏ခင်ပွန်းနံဘေးတွင် သင်္ဂြိုဟ်ကြ၏။ 11အသင်းတော်တစ်ခုလုံးနှင့် ထိုအဖြစ်အပျက်အကြောင်းကို ကြားသောသူရှိသမျှတို့သည် ထိတ်လန့်ကြ၏။
လူအမြောက်အမြားကို ကျန်းမာစေခြင်း
12တမန်တော်တို့သည် လူများရှေ့တွင် နိမိတ်လက္ခဏာများနှင့် အံ့ဖွယ်ဖြစ်ရပ်များကို ပြုကြ၏။ ထို့နောက် ယုံကြည်သူအပေါင်းတို့သည် ရှောလမုန်ဆင်ဝင်၌ စုဝေးကြ၏။ 13ကျန်လူများသည် သူတို့နှင့် မပေါင်းသင်းဝံ့ကြ။ သို့သော် လူတို့သည် သူတို့ကို ရိုသေကြ၏။ 14ဘုရားသခင်ကိုယုံကြည်သော အမျိုးသား၊ အမျိုးသမီးတို့၏အရေအတွက်သည် အလွန်များပြားလာကြ၏။ 15လူတို့သည် အနာရောဂါရှိသောသူများကို လမ်းနံဘေးသို့ သယ်ဆောင်လာ၍ ခုတင်နှင့် ဖျာပေါ်တွင် ထားကြ၏။ ဤသည်မှာ ပေတရုဖြတ်သွားသောအခါ တချို့လူနာများအပေါ်သို့ သူ၏အရိပ်ကျရောက်စေရန် ဖြစ်၏။ 16ဂျေရုဆလင်မြို့ပတ်ဝန်းကျင်ရှိ မြို့ရွာများမှ လူများသည်လည်း စုဝေးကြ၏။ လူနာများနှင့် နတ်ဆိုး၏ညှဉ်းပန်းနှိပ်စက်ခြင်းခံရသည့်သူများကိုလည်း သယ်ဆောင်လာကြသဖြင့် ထိုလူနာရှိသမျှတို့သည် ကျန်းမာသွားကြ၏။
တမန်တော်များကို ညှဉ်းပန်းနှိပ်စက်ခြင်း
17ထိုအခါ ယဇ်ပုရောဟိတ်မင်းနှင့် သူ၏အပေါင်းအဖော်ဖြစ်သော ဇဒ္ဒုကဲများ၏ဂိုဏ်းဝင်တို့သည် မနာလိုစိတ်ရှိကြ၏။ 18သူတို့သည် တမန်တော်တို့ကို ဖမ်းဆီး၍ ထောင်ထဲတွင် ထည့်ထားကြ၏။ 19သို့သော်လည်း ညအချိန်တွင် ထာဝရဘုရား၏ကောင်းကင်တမန်တစ်ပါးသည် ထောင်တံခါးကို ဖွင့်၍ တမန်တော်တို့ကို ခေါ်ထုတ်သွားကာ 20“ဗိမာန်တော်သို့ သွား၍ အသက်ရှင်ခြင်းတရားစကားအားလုံးကို လူတို့အား ပြောပြကြလော့” ဟု ဆိုလေ၏။
21မိုးလင်းသောအခါ ကောင်းကင်တမန်မှာထားသည့်အတိုင်း သူတို့သည် ဗိမာန်တော်သို့ ဝင်၍ ဆုံးမသွန်သင်ကြ၏။
ယဇ်ပုရောဟိတ်မင်းနှင့် သူ၏အဖွဲ့ဝင်များသည် အစည်းအဝေးပြုလုပ်ရန် တရားလွှတ်တော်အဖွဲ့ဝင်များနှင့် အစ္စရေးလူမျိုးအကြီးအကဲတို့ကို စုရုံးစေ၏။ ထို့နောက် တမန်တော်တို့ကို ခေါ်ထုတ်လာရန် အစောင့်တပ်သားတို့ကို ထောင်ထဲသို့ စေလွှတ်ကြ၏။ 22သို့ရာတွင် ဗိမာန်တော်အစောင့်တပ်သားတို့သည် ထောင်သို့ ရောက်သောအခါ တမန်တော်တို့ကို မတွေ့သဖြင့် ပြန်လာ၍ 23“ထောင်ကို လုံခြုံစွာ သော့ခတ်လျက် တံခါးရှေ့တွင်လည်း အစောင့်များရပ်နေကြသည်ကို ကျွန်ုပ်တို့တွေ့ခဲ့ပါ၏။ သို့သော် ထောင်တံခါးကို ဖွင့်ကြည့်သောအခါ အထဲတွင် မည်သူ့ကိုမျှ မတွေ့ပါ” ဟု ပြန်ပြောကြ၏။
24ထိုစကားကိုကြားသောအခါ ဗိမာန်တော်တပ်မှူးနှင့် ယဇ်ပုရောဟိတ်ခေါင်းဆောင်များသည် စိတ်ရှုပ်ထွေးကာ မည်သည့်အမှုဆက်ဖြစ်လာမည်ကို တွေးတောလျက်နေကြ၏။ 25ထို့နောက် လူတစ်ဦးသည် ရောက်လာပြီးလျှင် “သင်တို့ ထောင်အတွင်း၌ ထည့်ထားသောသူတို့သည် ဗိမာန်တော်၌ရပ်လျက် လူတို့အား ဟောပြောသွန်သင်နေကြ၏” ဟု သတင်းပို့လေ၏။
26ထို့နောက် ဗိမာန်တော်တပ်မှူးသည်အစောင့်တပ်သားများနှင့်အတူ သွားကြပြီးလျှင် တမန်တော်တို့ကို ခေါ်ဆောင်လာကြ၏။ သို့သော်လည်း လူတို့သည် မိမိတို့အား ကျောက်ခဲနှင့် ပေါက်သတ်မည်ကိုကြောက်သောကြောင့် တမန်တော်တို့ကို အကြမ်းမဖက်ကြ။ 27ထိုသို့ ခေါ်ဆောင်လာပြီးလျှင် တရားလွှတ်တော်တွင် ရပ်စေကြ၏။ ယဇ်ပုရောဟိတ်မင်းကလည်း 28“ထိုယေရှု၏အမည်နာမဖြင့် မသွန်သင်ရန် တင်းကျပ်သောအမိန့်များကို ငါတို့ထုတ်ပြန်သော်လည်း သင်တို့သည် ဂျေရုဆလင်မြို့ တစ်မြို့လုံးတွင် သွန်သင်ကြပြီ။ ထိုသူ၏သေခြင်း အတွက် ငါတို့၌ တာဝန်ရှိသည်ဟု သင်တို့သည် အပြစ်တင်လိုကြ၏” ဟူ၍ ပြောဆိုလေ၏။
29သို့ရာတွင် ပေတရုနှင့် တမန်တော်တို့က “ကျွန်ုပ်တို့သည် လူတို့၏အမိန့်အာဏာထက် ဘုရားသခင်၏စကားတော်ကို နားထောင်ရပါမည်။ 30သင်တို့သစ်တိုင်#5:30 “သစ်တိုင်” မူရင်းဂရိစကားလုံးတွင် သစ်ပင်၊ သို့မဟုတ် သစ်သား ဟု အဓိပ္ပာယ်ရပြီး ထိုအဓိပ္ပာယ်မှတစ်ဆင့် လက်ဝါးကပ်တိုင်ဟုလည်း ရည်ညွှန်းနိုင်သည်။ ဤစကားလုံးဖြင့် ပေတရုသည် တရား ၂၁:၂၂-၂၃ ကို အရိပ်အမြွက်ဖော်ပြခဲ့သည်။ပေါ်မှာ ချိတ်ဆွဲ၍ သေဒဏ်ပေးသည့်ယေရှုကို ကျွန်ုပ်တို့ဘိုးဘေးတို့၏ဘုရားသခင်သည် သေခြင်းမှ ရှင်ပြန်ထမြောက်စေတော်မူပြီ။ 31အစ္စရေးလူမျိုးများအား နောင်တရ၍ အပြစ်တရားမှလွှတ်စေရန် ဘုရားသခင်သည် ထိုအရှင်အား ခေါင်းဆောင်နှင့် ကယ်တင်ရှင်အဖြစ် မိမိ၏လက်ယာတော်ဘက်၌ ချီးမြောက်တော်မူပြီ။ 32ကျွန်ုပ်တို့သည် ထိုအကြောင်းအရာများ၏အသိသက်သေများဖြစ်ကြ၏။ ထိုအရှင်ကို နာခံသောသူတို့အား ဘုရားသခင်ပေးတော်မူသော သန့်ရှင်းသောဝိညာဉ်တော်သည်လည်း သက်သေဖြစ်တော်မူ၏” ဟူ၍ ပြန်ဖြေကြ၏။
33သူတို့သည် ဤစကားကို ကြားသောအခါ ဒေါသထွက်၍ တမန်တော်များကို သတ်ရန်ဆုံးဖြတ်ကြ၏။ 34သို့သော်လည်း လူအားလုံးတို့ရိုသေလေးစားရသော ကျမ်းတတ်ပညာရှင် ဂါမလျေလအမည်ရှိသော ဖာရိရှဲတစ်ဦးသည် တရားလွှတ်တော်တွင် ထ၍ တမန်တော်တို့ကို အပြင်သို့ခဏထွက်စေရန် အမိန့်ပေးလေ၏။ 35ထို့နောက် သူက “အို အစ္စရေးအမျိုးသားတို့… ဤသူတို့အား မည်သို့ ပြုရမည်ကို သတိပြုဆင်ခြင်ကြလော့။ 36ယခင်ကလည်း သုဒအမည်ရှိသောသူသည် မိမိကိုယ်မိမိကြီးမြတ်သူတစ်ဦးဖြစ်သည်ဟု ပြောဆိုသဖြင့် လူလေးရာခန့်သည် သူ၏နောက်သို့လိုက်ကြ၏။ သို့သော်လည်း ထိုသူသည် အသတ်ခံရပြီးနောက် သူ၏နောက်လိုက်များသည် လူစုကွဲ၍ ပျောက်ကွယ်သွားကြ၏။ 37ထို့နောက် သန်းခေါင်စာရင်းကောက်ချိန်၌ ဂါလိလဲပြည်သား ယုဒအမည်ရှိသူတစ်ဦးသည်လည်း လူများကို စည်းရုံးခဲ့၏။ သူသည် အသတ်ခံရသောအခါ သူ၏နောက်လိုက်အားလုံးသည်လည်း ကွဲလွင့်သွားကြ၏။
38ထို့ကြောင့် ယခုလက်ရှိအမှု၌ သင်တို့အားကျွန်ုပ်ပြောလိုသည်မှာ ဤသူတို့နှင့် မပတ်သက်ကြနှင့်။ သွားကြပါစေ။ ဤအကြံအစည်သည် လူ၏အကြံအစည်ဖြစ်လျှင် ကျရှုံးပျက်စီးပါလိမ့်မည်။ 39သို့ရာတွင် ဘုရားသခင်၏အကြံအစည်တော်ဖြစ်ပါက သင်တို့သည် ထိုသူတို့ကို တားဆီး၍မရနိုင်ပါ။ ဤအမှု၌ သင်တို့ကိုယ်တိုင်ပင်လျှင် ဘုရားသခင်ကို ဆန့်ကျင်တိုက်ခိုက်သောသူများဖြစ်ပါလိမ့်မည်” ဟု ပြောလေ၏။
40သူတို့သည် ဂါမလျေလ၏အဆိုကို လက်ခံကြသဖြင့် တမန်တော်တို့ကိုခေါ်၍ ကြိမ်ဒဏ်ပေးပြီးနောက် ယေရှု၏အမည်နာမကို အမှီပြုလျက် မဟောပြောရန် အမိန့်ပေးကာ လွှတ်လိုက်ကြ၏။
41တမန်တော်တို့သည် ယေရှု၏အမည်နာမကြောင့် အရှက်ခွဲခြင်းကိုခံထိုက်သူများအဖြစ် ဘုရားသခင်မှတ်ယူတော်မူသောကြောင့် ဝမ်းမြောက်လျက် တရားလွှတ်တော်မှ ထွက်သွားကြ၏။ 42ထို့နောက် ယေရှုသည် ခရစ်တော်#5:42 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ဖြစ်သည်ဟူသော သတင်းကောင်းကို ဗိမာန်တော်၌လည်းကောင်း၊ အိမ်များ၌လည်းကောင်း နေ့စဉ်မရပ်မနား ဟောပြောသွန်သင်ကြ၏။
Избрани в момента:
တမန်တော် 5: BCB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.