San Juan 13
13
Jesusi jurhengorheri jémbechani jupandukuasti.
1Páskueri k'uínchekua andamutani, Jesusi mítetini eska ixu parhakpeni jurhiata janokuspkia uéjpentani ka Táte jinguni níntani, xénhchaaspti parhakpeni anapuechani engaksï imani chúxapempaka, ka k'amarhuni jamberi xénhchaasti. 2Engaksï chúrekueri t'ireni jápka, nóambakiti Júdasï Iskarioteni, Simoni uájpani, p'ikuarhenhetaraspti eska Jesusini intsïnharhitpepiringa, 3Jesusi míteparini eska Táte iámendu ambe íntskuspka ka eska ima Diósïni jimbosï júpka ka eska ménderu Diósïni jingunisï níntani jámempka, 4jauaraspti jima enga t'ireni jápka, p'iraspti enga tájtsïtatini jápka ka takusï ma jóangorheni. 5Tátsekua urhanirhu ma itsï jatsiraspti ka uénaspti jurhengorheri jémbechani jupandukuani ka imani takusï jimbo kutsundukuantaaspti enga jóangorhetini jápka.
6Enga Simoni Pédruni andarherapka; ima arhispti:
“Acha, ¿Nénajturini t'u jupandukua?”
7Jesusi arhispti:
“Nótkiri kurhanguaka íni engani ji úni jaka: Tátsekua sánderuri kurhanguakia.”
8Simoni Pédru arhispti:
“Nómendurini jupandukuaka.”
Jesusi arhispti:
“Engakini no jupandukuska nóri jíndeni jinguniuaka.”
9Simoni Pédru arhispti:
“Acha, ásïrini jinijku jupanduku jiájkani, jupajkutarini ka jupajtsïtajturini.”
10Jesusi arhispti:
“Ima enga jikuarini jaka, no uétarhesïndi juparhekorheni, [jupanduntanderkusï uétarhejtia] iámu pímbinhasï jarhasti. Ka chájtsï pímbinharhati jarhaska, enga úka nójtsï iámendu pímbinharhaska.”
11Mítetixapti ne enga intsïnharhitpepiringa, jimbosï uandapti: “Nójtsï iámendu pímbinharhaska.”
12Enga na k'amarapka jupandukuani, xukuparhantaspti, ménderu uaxakantaspti jima enga t'ireni jápka, ka arhiaspti: “¿Kurhanguskijtsï ambeksïnisï úche?”
13“Chájtsïni arhisïnga ‘Jurhentpiri’ arhini, ka ‘Acha’ arhini, ka sésijtsï arhisïnga jimbokani jindeska. 14Nájkirukani ji Acheka ka Jurhentpirini jupandukuskaksïni, chájtujtsï jatsiska jupandukperani. 15Jimbokaksïni ji uénaxaka exerani, ka eskajtsï chájtu ísï jámaaka eskaksïni ji na kámaka. 16Sésesi jimbomenduksïni arhixaka: Jántspiri no sánderu ambesti eska ánchetpiri jémba, ka ánchperata úrijtu no sánderu k'éristi eska ima enga axaka. 17Isïjtsï mítetinia, sési ambejtsï íntsïnhaaka engajtsï ísï jámaska.”
18No iámendu cha jimbosïni arhini jaka; ji míteaska engani erakuakia; enga úka úkorhenisï úkorheati enga Karakata jaka: Ima enga jíndeni jinguni t'ireni jaka t'auarhekuekaxatirinia. 19“Méntkuksïni arhixaka, enga nótki úkorheni jaka, ka jiájkani enga na ísï úkorheakia jakajkuakajtsï eskani Jíska. 20Sésesi jimbomenduksïni arhixaka: Ne enga jiókorheska imani engani ji axaka jíndenirini jiókorhexati, ka ne engarini jíndeni jiókorheska, jiókorhexati Imani engarini axaka.”
Jesusi uandantasti eska Júdasï intsïnharhitpeaka
(Mt 26.20-25; Mc 14.17-21; Lc 22.21-23)
21Enga na ísï uandapka, Jesusi uandanheaspti ka uandantaspti:
“Sésesi jimbomenduksïni arhixaka eskarini cha ma isï intsïnharhitpeaka.”
22Jurhengorherichaksï ísku eratperaspti, ka nóksï jánhaskasïrempti nénisï arhini jápi. 23Jurhengorheri ma, enga Jesusi sánderu xénhchempka, Jesusini píretini uaxakatixapti. 24Ka Simoni Pédru nínharhikuspti ka arhini: “Kurhamarhe nénisï arhini jaki.” 25Ima Jesusini andanharhikueratini kurhamarhespti:
Acha, ¿Néua?
26Jesusi arhispti:
“Imeuati ne engani kurhinda kuakarhutakata íntskuska.” Ka enga na atarhutapka, Júdasï Iskariote íntskuspti Simoni uájpani.
27Ka enga ima ápka Satanasi incharhespti. Jesusi arhispti:
“Sóntku u ambe engari úkuekani jaka.”
28Ka nónema enga xáni jima t'irenhani jánhapka kurhanguspti andisï ísï arhini jápi. 29Ka jimboka Júdasï tumina patsaripka, máruksï eratsesïrempti eska Jesusi arhikuekaxamempka: “Kókuani pia enga k'uínchekuarhu úrakua kueratani jaka”, o eska no jatsikorherichani sáni ambe íntsaapiringa.
30Enga na ápkia enga intsïnhapka, uéntapaspti. Ka chúrekuesptia.
Juramukua jimbanhe
31Enga Júdasi na uérapka, Jesusi uandaspti: –Iásïstia enga Acha Uájpa k'érikuarhu péranhaka ka Diósï Imeri jimbo k'éri ambe arhinhasti. 32Enga Diósï Ima jimbo k'érikuarhu péranhaka, Diósïjtu k'érikuarhu péraati imani, ka sóntkusï k'érikuarhu pérani jámtia 33“Jucheti uátsïticha, sánderkusïni cha jinguni jauakia. Chájtsïni jirinhantaaka, ka májkueni eskani judiouechani na arhiaka, eska jima engani ji nirani jámka, chájtsï no úaka nirani, ka chánksïntu májkuenksïni arhixaka. 34Jimbanhe juramukua máksïni jurajkuchexaka: Eskajtsï xénhchperaaka. Májkueni eskaksïni ji na xénhchkaka, chájtu májkueni xénhchpera je. 35Ísï jámantsï mítperaaka eskajtsï jucheti jurhengorheriska ekajtsï xénhchperaska.”
Jesusi uandantasti eska Pédru no míteni uandapiringa
(Mt 26.31-35; Mc 14.27-31; Lc 22.31-34)
36Simoni Pédru arhispti:
–Tata, ¿Andi naniri niraxamki? Jesusi arhispti:
–Iásïrini no úaka chúxapani jima engani ji nirani jámka; tátsekuarini chúxapaakia.
37Pédru arhispti:
–¿Andikinisï iásï no ua chúxapani? ¡Ji t'úngeni jimbo jamberi uarhiaka enga ísï k'uaniska!
38Jesusi arhispti: –¿Ambe, t'u uarhia jíndeni jimbo? Sésesi jimbomendukini arhixaka: T'arhechu nótki jamberi uerani jauati, engarini t'u t'uíni tanimu xanharhi no míteni uandaakia.
Избрани в момента:
San Juan 13: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.