San Juan 12
12
Uarhiti ma enga Jesusini p'untsumekua atandukuka
1Páskueri k'uínchekua kuímu jurhia andamutani, Jesusi Betania niraspti, jima enga Lásaru irekani jápka, ima enga Jesusi tsítantapka. 2Ka jimaksï chúrekua t'irekua úkuntaspti; ka Marta ambe kéntpeni jámaxapti, ka Lásaru máteruechani jinguni Jesusini pámbexapti t'ireni. 3Ka Maria ma tsúntsu ambakiti p'untsurhukua p'índitaspti, enga kánekua jukaparhaka, ka Jesusini atandukuspti; ka jauiri jimbo kutsundukuntaspti. Ka p'untsurhukua uinimtakurhantaspti. 4Ka Júdasï Iskariote, enga jurhengorheri jémbepka, ka enga tátsekua Jesusini intsïnharhitpepka, uandaspti:
5–¿Andi no sánderu sésipirini eska inde p'untsumekua ataranhantapiringa, enga sáno ma uéxurhini ánchekorhekata jukaparhaka, ka no jatsikorherichani íntsani?
6Júdasï ísï uandaspti k'óru, no jimboka xáni no jatsikorherichani p'amojkuapiringa, sánderu sáni ísï uandaspti jimboka sïpajkurhespka, ka sïparhukusïrempti jimboka tumina jatakua ima kámani jarhasïrempka. 7Jesusi arhispti:
–Isku exe, inderini p'untsumekuani patsachexapti jucheti jántskuarhu uékani úrani. 8Jimbokajtsï no jatsikorherichani méntkisï exeani jauaka, ka jíndenijtsïni no méntku ixu jatsiaka.
Lásaruntuksï uékaxapti atani uándikuni
9Uánekuaksï judiouecha Betania niraspti engaksï mítepka eska Jesusi jini jámaxapka, ka nóksï Jesusintkusï eranhaskani jápti jini exeni, Lásaruntuksï jini uéksïrempti exeni, imani enga Jesusi tsítantapka. 10Ísï jimbo, tátecheri urhejtsïkurichaksï uandaspti eskaksï Lásaruntu atapiringa uándikuni. 11Jimbokaksï Lásarueri tsíntskua jimbo uánekua judiouecha nóteru andaparhakuerasïrempkia ka Jesusinksï jakajkukusïrempti.
Jesusi Jerusaleni niárasti
12Uánekua niáranhaspti Jerusaleni páskueri k'uínchenhani, ka pauandekuarhu enga na mítekorhepka eska Jesusi iretarhu niárapiringa, 13pímu jupikatini ninhaspti kúmanhani, ka uinhachanhasïrempti:
–¡Kuájchakujtsïni! ¡Inde újchakurakatesti enga Acheri jakangurhikua jimbo jurhani jaka, enga israelicheri Irecheka!
14Ka Jesusi ch'anchaki sapichuni ma xéntaspti ka jataspti, eska karakatarhu na arhijka:
15“Sioni ireta, ásï che;
xe chéti Irecha jurhaxatiia
ch'anchaki sapichuni ma jatapuni”
16Uénani jámanksï jurhengorhericha indeni ambe no kurhangusïrempti, tátsekua k'ória, enga Jesusi na k'érikuarhu péranhapkia, jiájkanksï míantasptia eska imanisï arhimpka, ka eska iámendu ambe engaksï xáni úkupka, karakata jarhaspkia.
17Ima engaksï xáni exepka enga Jesusi Lásaruni ióarhintapka tsítantani, uandantasïremptiksï. 18Jimbojtusï uéranhapti Jesusini kúmanhani, jimbokaksï kurhajchpespka eska imasï ísï ambe xarhatapka. 19Ka fariseouechaksï k'óru arhijperaxapti:
–Xéxakijtsïa eskachi ísï nómbema andaaka. Exe je ¡Iámenduechaksïsï chúxapajtia!
Grieguechaksï máru Jesusini jirinhantaxapti
20Máruksï griéguecha Jerusaleni karhamaspti k'uínchekuarhu Diósïni k'éri ambe arhini. 21Imaksï Felipeni andarheraspti, Betsaida Galilea anapuni, ka kómuarhisptiksï:
–Tata, uéksïngaksï Jesusini uandaxekuni.
22Felipe, Andresïni niraspti aianguni; ka tátsekuaksï márku, Jesusini aianguntaspti. 23Jesusi arhiaspti:
–Janostia jurhiata enga Acha Uájpa k'érikuarhu péranhaaka. 24Sési jimboksïni arhixaka, eska eka ma erhakua tríju no echerindu andatseraska ka tsïuantani, ísku pakaraati; ka eka tsïuantaska, uánekua jukantaati. 25Nema enga tsípekuani jukari xénhchakorhejka, sánderu sóntku uarhisïndi; ka nema enga íni parhakpenirhu imeri tsípekuani no xáni xénhchajka, méntku isï anapu tsípekua jatsiati. 26Engarini nema uéjka marhuacheni, chúxapuerini, ka nani engani ji jauaka, jucheti jarhojpiri jima jauati. Ekarini nema marhuacheaka, Táte, k'éri arhiati.
Jesusi uandantasti eska uarhiakia
27“Kánekua nósesi p'ikuarhenhexaka. Ka ¿Ambesïni uandaia? ‘¡Táte, iásïrini kuájpentsï!’ ¡Ka ambesïni úni juki andi jiájkani! 28Táte, chéti jakangurhikua k'érikuarhu péra.” Jimajku auandarhu kurhanchekorhespti:
“K'érikuarhu péraskia ka ménderuni k'érikuarhu péraaka.”
29Enga xáni jima janhapka ka engaksï kurhapka uandasïremptiksï eska piritaspka. Máteruksï uandasïrempti:
–Ánjeli másï uandajpati.
30Jesusi arhiaspti: Inde enga kurhanchekorheka no jíndeni jimbosï juti, sánderu sáni chári jimbosï juti.
31Iásïstia engaksï parhakeni anapuecha arhinharhikunhaaka; iásï parhakpeni anapu juramuti petajpanhantaatia. 32Ka jiájkani engani ji echerindu uératini tarhatanhaaka, iámu jíndeni jinguni antsitpeaka.
33Inde uandakua jimbo jánhastpexapti néna enga uarhipiringa. 34Ka imaksï arhispti:
“Jucha juramukua karakata jimbo míteska eska Erakukata nómeni uarhisïnga. ¿Néna jimborisï arhijki eska uétarhesïnga eska Acha Uájpa tarhatanhaaka? ¿Néski ima Acha Uájpa?”
35Jesusi arhiaspti: “Sónderku, nóteru iónia, eramarhandekua cha jinguni jámaxati. Xánhara je iásï engajtsï útasï eramarhandekuani jatsika, eskaksïni no pájpakandekua andanguaka; ne enga pájpakandu xanharajka, no mítesti nanisï nirajki. 36Engajtsï útasï eramarhandekuani jatsika jakajkuku je, ka eramarhandekuajtsï uájpeuaka.” Enga na ísï uandapka, Jesusi jarhareaspti ka jirikorhekuani.
Nóksï úsïrempti jakajkukuni
37Ka nóksï jakajkukusïrempti, náuejki xáni k'érati ambe xarhatakuapka; 38ka ísï jámani úkorhexapti eska Diósïri uandari Isaiasï na uandarini jápka:
Acha, ¿Ne ka néjtsïni juchari aiangperakuani jakajkucheski?
Ka ¿Ne ka ne Acheri uinhapekua exeranhaski?
39Ka nóksï úsïrempti jakajkuni, jimbokajtu Isaiasï uandaspka:
40Pátenharhitaasti,
mintsita chuperakuasti;
eskaksï no úaka exeni,
ka eskaksï no úaka mintsita jinguni kurhanguni,
ka nóksï jimbanhentani,
ka ji ambakerantaani.
41Isaiasï ísï uandaspti jimboka exekuspka t'íntskua ka jimbosï imeri ambe uandapti.
42Ka náuejkiksï máru juramutipka, uánekuaksï jakajkukuspti, k'óruksï fariseuechani chérheani no uandantasïrempti jimbokaksï jámapiringa tángorhentskuarhu petanhantani. 43Ka jimbokaksï sánderu xénhchaspka eskaksï parhakpeni k'éri ambe arhinhaaka, eska Diósï k'éri arhiani.
Ne engarini mintsikajka, imanisï mintsïkajti engarini axaka
44Jesusi uinhachaspti uandani: “Ne engarini mintsikajka, nórini jíndenisï mintsïkajti, imanisï mintsïkajti engarini axaka; 45ka ne engarini jíndeni exejka, imanisï exejti engarini axaka. 46Ji eramarhendekueska, parhakpeni jurhaska eskaksï iámendu ima engajtsïni míntsïkaska nóteru pájpakandu jámaakia. 47Enga nema jucheti uandakuechani kurhauaaka ka no úraani, ji nómbema arhisïnga, jimbokani no arhianharhikpenisïni juka, p'ímutpenisïni juka. 48Nema engarini no jiókorhejka ka nójtu jiókorheni jucheti uandakuechani, jatsikorhestia ne enga arhinharhikuaka: Jucheti uandakua arhinharhikuati parhakpeni k'amarhuni jámani 49jimbokani no jucheti jimbosïni uandaka, Táterinisï axati, ka imarini arhisti ambesïni arhijpea ka uandani, 50ka ji míteska eska imeri juramukua méntkisï anapu tsípekueska. Ísï jimbo, ambe engani ji uandajka ísï uandasïnga eskarini jucheti Táte na arhirini jaka.”
Избрани в момента:
San Juan 12: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.