Hechos 9
9
Sáulu jakajkusti
1Sáulu Acheri jurhengorherichani xáni kurhunheani útasï uandikukuekaxaptiteru. Ísï jimbosï táta k'érini jinguni nípti, 2ka arhispti eska karakatechani úkuapiringa enga k'umanchekua tángorhentskua Damasku anapuechani pákuapiringa, ka ísï úni jupiani ka Jerusaleni k'uanhaskuantaani achetichani ka uarhitichani engaksï jimbanhe xanharini chúxapani jápkia. 3Ka xanhari jimbo, Damasku niárani jámani, auandarhu anapu t'íntskua ma mátirku uirhipandaspti; 4ka Sáulu kuarhatsespti, ka uandakua ma kurhaspti enga arhimpka: “Sáulu, Sáulu, ¿Andirinisï jupikani úejki?”
5Ka Sáulu arhispti: “¿Néskiri Tata?” Ka uandakua ma mókukuntaspti: “Ji Jesusiska ima engari t'u jupikakuekani jaka.” 6[Jiájkani Sáulu manaraparini xáni chéni uandaspti: “Acha, ¿Amberisï úejki eska ji úaka?” Ka Acha arhispti:] “Jauara kókuani ka iretarhu inchaaku, jimari arhinhaaka ambe engari úaka.”
7Ima engaksï Sáulu jinguni nirani jápka ískuksï pákareratixapti, jimbokaksï sési jimbo kurhaxapka ka nóksï nemani exesïrempti. 8Jiájkani Sáulu jauaraspti, nájkiruka éskani jápka nónemani exespti. Jimboksïsï jupijtapapti Damasku inchaatani, 9ka tanimu jurhiatekua jima jarhasti pátenharhitini ka nómbe ma uékaspti arhani.
10Ka Damasku irekaxapti jurhengorheri ma enga Ananiasï arhinhempka, enga Acha tsánharhitapka ka arhini: “¡Ananiasï!” Ka ima arhispti: “Acha, ixu jarhaska.”
11Ka Acha arhispti: “Jauara ka ni ambukutarhu enga jurhimbitku arhinhajka, ka Júdasïo kurhangorhe acheti Társu anapuni ma enga Sáulu arhinhajka. Jimboka ima uandamukukorhexaka, 12ka jánhaskaspti achetini ma enga Ananiasï arhinhempka, ka ima ínchaspti ka p'ajtsïkusti ka Sáulu éskantaspti.”
13Jiájkani Ananiasï uandaspti: “Acha, uánekuechajtsïni ima achetiri ambe aiangusti, na enga xáni nósesi káaka Jerusaleni chéti ireta erakukatechani. 14Ka ixu jamberijtuksï kéri tátecha sésekua íntskusti eska ima jupiapiringa iámendu imechani engaksï chéti jakangurhikuani k'éri ambe arhijka.”
15Ka Acha arhintaspti: “Ni jimbokani ji imani eraantaska eska ima iámendu no judiuechani ka imecheri irechechani ka Israeli uájpechani aianguantaani jámaaka, 16jimbokani ji exeraaka na enga jucheti jakangurhikua jimbo xáni nósesi nitamanchakorheaka.”
17Jiájkani Ananiasï niraspti ka k'umachekuarhu inchaspti ka p'ájtsïkuparini arhispti:
–Erachi Sáulu, Acha Jesusi engakini xanhari jimbo xarhacheka engari jurhani jápka, axastirini t'úngeni jinguni ka eskari éskantaaka ka eskari Espiritu Sántuni p'iuaka.
18Ka jimajku éskuecharhu chésïni járhati uénharhiantaaspti ka éskantaspti. Jiájkani jauaraspti ka itsï atajtsïkunhaspti. 19Ka enga t'irepkia, uíuinhaxentaspti ka namuni jurhia Damasku pákaraspti imecha jinguni engaksï Jesusini jakajkuempka.
Sáulu Damasku arhijtsïkpesti
20Ka Sáulu uénaspti uandantani k'umanchekua tángorhentskuecharhu eska Jesusi Diósï Uájpeska. 21Ka ima engaksï kurhajchempka ískuksï pakarerasïrempti ka uandasïremptiksï:
–¿Andi no ísï Jerusaleni imechani ataani káuempki engaksï Jesusini jakajkuempka? ¿Andi nójtsïni indesï jupikani uékeni engajtsïni k'éri tátechani jinguni pákuekani jápka?
22K'óru Sáulu sánhani arhixapti jarhamekua jinguni judiuechani engaksï Damasku irekani jápka arhiani, ka no jánhastantaaxapti jimboka xarhatasïrempka eska Jesusi Krístueska.
Sáulu Judioechani uéjkuasti
23Ka namuni jurhia jimbo, judiuechaksï tángorhentatini, pakatperaspti néna engaksï Sáuluni uandikupiringa, 24ka Sáulu mítespti ambe engaksï úskuni jápka. Chúrekua ka jurhiakua iretarhu inchaakukuarhuksï jarhasïrempti erontani uandikuekanksï, 25ka ima engaksï Jesusini jakajkuempka chúrekuaksï tsïntsïkatarhu isï xúndi jimbo iretarhu késkuntaspti.
Sáulu Jerusaleni niárasti
26Enga Sáulu Jerusaleni niárapka, jurhengorhericha jinguni tángorhentskuekaxapti ka iámenduechaksï chérhesïrempti jimbokaksï no úsïrempka jakajkuni eska imajtu Jesusini jakajkuxapka. 27Jiájkani Bernabe, Jesusiri uandakua páricha jinguni páspti, ka aianguantaaspti eska Sáulu xanhari jimbo Achani exespka, ka eska Acha uandaxekuspka, ka aianguantaaspti na enga Sáulu Damasku uandantapka Jesusiri jakangurhikuani nósani chémuparini. 28Ka Sáulu Jerusaleni imecha jinguni pákaraspti ka imecha jinguni jámani jarhasïrempti. 29Ka méntku nósani chémuparini Táteri ambe uandantasïrempti, ka judioecha jinguni engaksï gríegu uandempka, uénasptiksï arhirhperani, k'óruksï ima uándikunisï uékani jápti. 30Engaksï jakajkuti erachicha íni ambe mítepka, Sáulunksï Sesarea páspti ka jima uératinksï Társu axaspti.
31Imani jurhiatekuechani, Jesusiri tángorhekua Judea ka Galilea ka Samaria ísï sési jakuaksï jatsispti, ka Achanksï janhanharhiparini irekaxapti ka Espiritu Sántueri jarhojperata jimbo uánenhaxapti.
Na engaksï Eneasïni ambakerantaka
32Enga Pédru iámenduechani p'urhembeani jamani jápka, p'urhembeasptijtu imani engaksï Jesusini jakajkuempka engaksï Lida irekapka. 33Ka jima exentaspti achetini ma enga Eneasï arhinhempka, enga iúmu taminu uéxurhini apondikupka, jimboka no úsïrempka jauarani. 34Ka Pédru arhispti:
–Eneasï, Jesukristukini ambakerantaxati, jauara ka k'uírakuani irhikorhentsï.
Ka ima jauajpatsespti. 35Ka iámenduechaksï exespti engaksï Lida ka Saroni irekapka, ka Acha Jesusinksï jakajkuspti.
Dórkasï tsítanhantasti
36Ka jiájkani ísï Jópe irekaxapti uarhiti ma enga Tabita arhinhempka, imajtu Jesusini jakajkuxapti (“Enga Dórkasï” arhikuekajka gríego jimbo). Ima uarhiti méntkisï sési ambe úrisïrempti ka kánekua jarhojpesïrempti, ka kómu jándichani ambe intsïmbeasïrempti. 37Ka imani jurhiatekua jimbo p'amenchaspti ka uarhispti. Engaksï jikuarantapka, k'umanchekuarhu iótakuarhuksï péntaspti. 38Ka jimboka Lida uératini Jópe no káni iauaneska, jurhengorherichaksï mítetini eska Pédru jima jámaxapka, tsimani achetichanksï axaaspti eskaksï kómarhipiringa: “Ásï iónda ka ju sóntku juchantsïni jinguni.”
39Jiájkani Pédru imecha jinguni niraspti. Enga niárapka iótakuarhuksï karhataspti, ka jimaksï iámendu uarhiti tsîndicha ueparini uirhipandapaspti jupikatianksï sïritakuechani ka xukuparhakua enga Dórkasï úkuantauempka enga nótki uarhimpka. 40Jiájkani Pédru iámenduechani petantaarini, tinguixurhispti ka uandamukukorhespti, ka Dórkasïni erateparini arhispti: “¡Tabita, jauarantsï!”
Ka ima éskantaspti ka Pédruni exerini jauaraspti, 41ka Pédru jupijkuspti ka jauatani; jiájkani ióarhiantaaspti jakajkutichani ka uarhiti tsîndichani ka Dórkasïni tsítantatini exerantaaspti. 42I ambe Jópe iámu mítekorhespti, ka uánekuaksï Acha Jesusini jakajkuspti. 43Ka Pédru imani iretarhu pakaraspti sáni namuni jurhia, Simonio enga sïkuiri ambakerani ánchekorhempka.
Избрани в момента:
Hechos 9: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.