Hechos 10
10
Pédru Kornelio jinguni
1Sesarea acheti ma irekaxapti enga Kornelio arhinhempka, enga p'urhejkuticheri Italia anapu arhikatecheri urhejtsïkuripka. 2Ima chéni jémbo anapuecha jingunksï kánekua jarhojpeni jarhasïrempti, ka Diósïnksï janhanharhiparini irekaspti. Ka judiuechani jarhuataasïrempti ka Diósïni méntkisï kómarhikuarheni jarhasïrempti.
3Ka ima, ma jurhiatekua téjkamatiru ísï jánhaskaspti na enga Diósïri ánjeli ma inchakupka ka arhini: “¡Kornelio!” 4Ka ima ísku pakareraspti erateni ka chétku arhispti: “¿Ambe Acha?” Ka ánjeli arhispti: “Diósï kurhastia ambe engari uandamukukorheka ka chéti jarhojperata exestia, ka kánekua tsípexati. 5Axaa kókuani máru achetichani Jópe, eskaksï niuaka Simonini p'irani, imani engajtuksï Pédru arhijka. 6Ima Simonio jarhasti, imo enga sïkuiri ambakerani ánchekorhejka enga k'éri japundarhu uanakutini irekaka.”
7Enga ánjeli uandaxekupka, kéndikuspti ka Kornelio tsimani imeri jántspirichani ióarhiaspti, ka p'urhejkuti jakajkutini ma enga ima mintsinharhimpka, 8aianguantaspti ambe enga úkorhenchapka ka Jópe axaaspti.
9Ka pauandekua teruxutini ísïspti engaksï ima iretarhu niárani jápkia, Pédru taiatsïtakatarhu karharaspti uandamukukorheni. 10Ka uinhamendu karhimaspti ka ambe akuekaxapti; ka engaksï úmakuntani jápka jimajku uénaspti jánhaskani: 11Auandani mítakorhetini exespti ka takusïni jásï ma kétsexapti enga t'ápuru jórhupka, 12ka jimaksï jarhaspti iámendu jarhati manakorhericha, engaksï t'ámu jantsiri jukaaka ka engaksï antsikukorhejka ka káraticha.
13Ka jimajku nema uinhachakuspti: “Pédru, uandikua ka auantsï.”
14Jiájkani Pédru mókuspti: “Nómbe Acha, ji nómeni arhaska ambe enga juramukua no jiámukpejka.” 15Ka jimajku ménderu uandakua arhintaspti: “Ambe enga Diósï sési jájkuka, ásï arhi eska ikichakueni jáxeska.”
16Tanimu xanhari májkueni úkorhespti; ka takusï auandarhu p'íkunhantaspti. 17Ka Pédru méntku no jánhaskeraspti ambesï arhikuekeni enga ísï jánhaskapka, ka acheticha enga Kornelio axaapka, kurhangorhetinksï nani enga Simoni irekapka, chéni jémboksï andamukueraspti. 18Ka uámutatspesptiksï ka kurhangorhesptiksï jimaxamu jajkuarheni japi acheti ma enga Simoni arhinhajka, ka engaksï Pédru arhijka.
19Ka enga Pédru eratsentani jápka ambe enga jánhaskapka, Espiritu arhispti: “Tanimu achetichaksïni jirinhantaxati. 20Kétse kókuani, ka ásï tsimanitsimanearha ka ni imechani jinguni, jimbokani ji axaaska”. 21Pédru kétsespti ka achetichani enga Kornelio axaapka arhiaspti:
–¿Jíndentsïnisï jinhantajki? ¿Ambesï k'uani?
22Ka imaksï arhispti:
–Pímbinhasï ánjeli ma Kornelioni arhisti eskari niuaka cheni jémbo, ima p'urhejkuticheri urhejtsïkuristi, kaxumbesti ka Diósïni janhanharhiparini irekasti ka judiuechaksï sési ambe uandakuntasïndi, erokaxatikini ka kurhajchanikini uékasïndi ambe engari t'u arhiaka.
23Jiájkani Pédru incharaaspti ka jima jájkuarhetaaspti. Ka pauandekua jauaratintku imecha jinguni niraspti ka máru Jópe anapu erachichaksï pámbeaspti.
24Pauandekuaksï Sesarea inchaakuspti ka Kornelio chéni jémbo anapuechani jinguni ka pámpiri jémbecha jinguni enga ima sánderu uékauempka erokaaxapti. 25Enga Pédru ínchapka, Kornelio erokatintku uandajpasti ka tinguixurhikutini k'éri ambe arhispti. 26K'óru Pédru jauataspti arhiparini:
–Anhaxurhintsï, jíjtuni k'uiripueska.
27Ka uandajperatinksï, ima jinguni inchaspti ka jima exeaspti uánekuechani engaksï jima tángorhentatini jápka. 28Ka arhiaspti:
–Chájtsï míteska eska juramukua, judioni ma no jiáretasïnga uérakua anapu ma jinguni jarhani, k'órurini jíndeni Diósï exerasti eskani ji nónemani arhiaka eska ikichakueni jáxeska o eska no pímbinhaxeska. 29Ísï jimbosïni uékaka jurhani engani ioarhinhaka. Ka iásï uékapiringa míteni, ¿Andijtsïnisï ioarhi?
30Ka Kornelio uandaspti:
–T'ámu jurhiatekuestia engani juchenio téjkamatiru uandamukorheni jápka, ka achetini ma exeska urhepandini jacheni t'uput'upusï xukuparhatini, 31ka arhisptirini: Korenelio, Diósï chéti undamukukorhetani kurhastia, ka chéti jarhojperatani exestia. 32Jópe axajpe ka p'itajkorhe Simonini engajtuksï Pédru arhijka enga Simonio, ima enga sïkuiri ambakerajka enga k'éri japundarhu uanamukutini irekaka, imecho jájkorhexati. 33Ísï jimbosïni sóntku axajpeka eskaksïni nipiringa jirinhantani, ka sésiri úska ixu jarhania. Iásïchkani jucha ixu jarhaska Diósïni japarini ka kurhajchaksïni uékaxaka ambe engakini Acha juramucheka.
Na enga Pédru Koreliouo uandaka
34Jiájkani Pédru uénaspti uandani:
–Iásï jánhaskaskia eskachi Diósïni jimbo iámenduecha májkueni járhaska, 35ka eska nani uéjki Diósï sési exeasïnga imechani engaksï janhanharhijka, ka engaksï sési ambe újka. 36Diósï axakuaspti Israeli uájpechani, ambakiti aiangperakuani sési pájperakueri Jesukristuni jimbo, enga iámenduecheri Acheka. 37Chájtsï mítetixaka ambe enga úkorhepka Judea ísï, Galilea uénani ísï tátsekua enga Juánu itsï atajtsïkperakueri ambe arhijtsïkpepka: 38Na enga Diósï Espiritu Sántueri uinhapekuani íntskupka Jesukristu Nasareti anapuni, ka na enga ima jámempka sési ambe úparini, ka ambakerantaaparini imechani enga nóambakiti nósesi kántauempka, jimboka Diósï Jesusi jinguni jarhaspka. 39Jucha exekorheska iámendu ambe enga Jesusi Judea ka Jerusaleni úka, imani engaksï cháparhataparini uándikuka. 40K'óru Diósï tanimu jurhiatekua jimbo tsítantasti, ka xarhatachentasptijtsïni, 41no iámenduechani xarhakuantaaspti, juchantsïntku engachi exekorheka ka engajtsïni Diósï erakutini jápkia, jucha engachi ima jinguni t'ireka ka itsïmani enga ima tsíntapka. 42Ka juramuchestijtsïni eskachi aiangpentapiringa eska Diósïni imanisï uarhiricheri ka tsípiticheri arhinharhikpirini pérakuaka. 43Íri ambeksï iámendu Diósïri uandaricha uandantapti, eskaksï iámendu ima engaksï imani jakajkuaka, eskaksï imeri jakangurhikua jimbo k'amanharhintskuechani púamenhantaaka.
No judiuechaksï Espiritu Sántuni p'irasti
44Enga Pédru íni ambe uandani jápkateru, Espiritu Sántu iámenduechani andajtsïkueraspti engaksï kurhani jápka. 45Ka ima engaksï juramukuani janhanharhijka, engaksï Pédru jinguni nípka ískuksï pakareraspti engaksï no judiuecha jámberi nitatarhepka Espiritu Sántuni p'irani, 46jimbokaksï kurhajchaaspka máteru uandakuechani jimbo uandani ka Diósïnksï k'éri ambe arhini. 47Jiájkani Pédru arhiaspti:
–¿Andi nema no jiáretaua íchani eskaksï íjtu itsï atajtsïkunhaaka engaksï Espiritu Sántuni p'ikaia ísï eskachi jucha?
48Ka juramuspti eskaksï Jesukristueri jakangurhikua jimbo itsï atajtsïkunhapiringa. Jiájkanksï Pédruni kómarhispti eska namu jurhia imechani jingunderu pakarapiringa.
Избрани в момента:
Hechos 10: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.