Hechos 7
7
Estebanu k'éri tángorhentskuarhu kuájpekorhesti
1Ka k'éri táta kurhamarhespti:
–¿Jeteru ísïski?
2Ka Estebanu mókukuntaspti: “Kurhajtsïni je erachicha ka achamasïcha, Diósï enga k'éri t'íntskueka, juchari táte Abranini xarhakuspti enga Mesopotamia irekani jápka, jiájkani enga nótki Arani nirani jápka irekorheni, 3ka arhispti: Chéti iretarhu uéaku ka jurajkua chéti k'umanchekuarhu anapuechani ka imani echeri jimbori niuaka engakini ji exeraaka. 4Ka ima Kaldeuechani uéakukuantaaspti ka Arani irentaspti, ka enga tátjemba uarhipka, Diósï jima uératini íni echerini jimbo juáspti engajtsï iásï cha irekorheni jaka. 5Ka ixu méntku nósani echeri íntskuspti, ni imani enga atastani jápka. K'óru aiakuspti eska sïrukua jémbani íntskupiringa enga ima uarhipiringia nájkiruka ima nótki ma sapini kámempka. 6Diósï arhispti eska sïrukua jémba máteru nani uérakua anapueni irekapiringa, ka eskaksï jántspetaapiringa ka eskaksï ma irepeta uéxurhini nósesi káapiringa. 7Ka Diósï uandaspti: Ji arhinharhikuaka imani iretani engajtsï jántspekuni jamani jauaka; ka tátsekuajtsï uéakukuantauaka ka ixujtsïni marhuacheaka. 8Ka pakatperakua ma arhiaspti eskaksï ts'iuekuarhu sïkuiri p'ikujtsïtapiringa, ka Abrani Isakini kángorhespti ka iúmu tanimu jurhiatekua jimbo ts'iuekuarhu sïkuiri p'ikujtsïkukuspti. Ka Isaki Jakobuntu májkueni kámaspti, ka Jakobu témbeni tsimani uájpechani engaksï judio anapu achepka. 9Jakobu uájpechaksï, erachi jémbaniksï Joseni epurhesïrempti ka Ejiptu anapuechanksï atarakuantaspti; k'óru Diósï Jose jinguni jarhaspti, 10ka ambe enga xáni úkua jinguni nitamanchakorhempka Diósï jarhuataspti, ka kóndentaspti ka mímixerani enga Faraonini jinguni jápka, irecha Ejiptu anapu jinguni enga Joseni juramuti úpka Ejiptu ka irecho.”
11“Ka jiájkani ísï Ejiptu ka Kanani kánekua k'arhingua japuspti, ka juchari táte tua anapuechaksï t'irekua nómberakorhexapti. 12Enga Jakobu mítepka eska Ejiptu tríju kánekua japuspka, ma xanhari axaaspti juchari tua anapu tátechani. 13Ka engaksï tsimani úni jamani nípka, Jose aianguantaspti erachi jémbechani eskaksï márkuespka, ka Faraoni mítespti Joseri márku jémbechani. 14Tátsekua Jose, tátjemba Jakobuni p'ijtajkorheaspti iámendu imo anapuechani jinguni, engaksï tanimu ekuatse témbeni iúmuepka. 15Ka Jakobu Ejiptu kétsemaspti ka jima uarhispti ka ístuksï juchari táte tua anapuecha jima uarhispti. 16Ka iámenduksï Sikemi pánhantaspti jatsinhantani, imani jántskuarhu enga Abrani Amori uájpechani píakuantaapka.”
17“Enga jurhiatekua andaparheni jápkia enga Diósï Abranini aiakupka, Israeli anapuechaksï Ejiptu t'uíni uánesptia, 18ka Ejiptu máteru nema irechesptia ka ima Joseni no mítespti. 19Ka ima irecha juchari iretani, juchari tua anapuecha k'arhaaspti ka nósesi káaspti ka juramukuaspti eskaksï charhakuechani tsîtaapiringa, eskaksï uarhiraapiringa, ka ísïksï nóteru uánenia. 20Ima jurhitekuechani Moisesi andajpenuspti, ka Diósï kánekua xénhchasïrempti, ka tanimu kutsï tátjemba ka amamba jinguni t'arhexespti. 21Ka tátsekuaksï jurajkuspti, ka Faraoni uájpa tarhataspti ka ísï t'arhexerakorhespti eska ambe uájpeni. 22Moisesi Ejiptu anapuecheri mímixekua jurhendanhaspti, ka achamasï mésti enga sési mítekupka néna uandani ka néna jamani.”
23Ka enga tsimani ekuatse uéxurhini jatiripkia, erachi jémba Israeli uájpechani p'urhembenhchaaspti. 24Enga exepka na enga Ejiptu anapu ma, Israeli anapuni ma nósesi kántani jápka atani, ichaakuspti kuájpentani, ka Ejiptu anapuni uándikuspti. 25Jimboka Moisesi ísï p'ikuarhenhexapka, enajkiksï erachi jémba Israeli uájpecha jánhaskani japi eska Diósï Moisesini jimbo euajpeantaapiringa, k'óruksï ima nósani ísï eranguntaxapti. 26Ka pauandekua, Moisesi andarheraaspti tsimani Israeli anapuechani engaksï uarhiperani jápka, ka inchaakukuaspti uékani jarharetaani ka arhiaspti: Chájtsï márkueska, ¿Andijtsïsï ísï kámperajki?. 27Ka ima enga nósesi kámani jápka máteruni, Moisesini p'ákchakuspti ka arhini: ¿Andi nékini arhiski eskari juchari juramutiuaka ka arhijtsïni ambechisï nósesi úni jaki? 28¿Andi jíndenturini uándikua, ísï eskari uitsindekua Ejiptu anapuni na uándikuka? 29Moisesi ísï kurhaarini sïpakorhespti ka Madiani niraspti irekani, ka jima tsimani uájpechani kángorheaspti. 30Ka tsimani ekuatse uéxurhini jimbo, ánjeli ma xarhakuspti Sinai juátarhu, jima enga nónema irekaka, tsïtunirhu ma enga tixarani jápka. 31Ka Moisesi kánekua ísku pakareraspti ísï exerini, ka enga andarherani jápka sési exeni, Acha jimajku kurhaakorhespti: 32Jíska chéti tua anapuecheri Diósï, Abraniri Diósï, ka Isakiri Diósï ka Jakobueri. Ka Moisesi manaraparini nóteru tékaasïrempti eraani. 33Ka Acha arhispti: “P'iuaa chéti kuarhachichani, jimboka ini echeri engari atastatini jaka ji arhutakata jatsiska. 34Ji exeskia jucheti iretani, na enga Ejiptu xáni nósesi nitamakorheni jaka, kurhaaskia na engaksï jirejiremeni jaka, ka kétseska p'ímutantaani. Iásï juíni, Ejiptukini axaaka.”
35“Ka Moisesiniksï, imani engaksï no jiókorhepka ka arhisptiksï: ‘¿Nékini juramutini ka arhinharhikpitini péraski?’, Diósï imani axaspti eska juramuti ka p'ímutantspiri ánjeli jimbo enga tsïtunirhu xarhakupka. 36Ka ima úspti eskaksï jurajkunhapiringa, k'éri ambe ka mínda ambe úparini Ejiptu tsimani ekuatse uéxurhini, ka ístu japunda charhapemerhu ka jima enga nónema irekaka. 37Ísti Moisesi enga Israeli anapuechani arhiapka: ‘Diósï chári erachini ma imeri uandari úati, ísï eska jíndeni ka imantsï kurhajchaaka’. 38Ísti Moisesi, enga ireta jinguni tángorhentatini jápka jima enga nónema jámka, ka enga ánjeli Sinai juátarhu uandajpempka ka juchari tátechani aianguantaani, ka enga tsípikueri uandakuechani p'iuaka ka juchantsïntsïni aianguantaasti.
39Ínksïsí juchari tátecha no úekapti kurhandirakuni, ískuksï xéspti, ka sánderuksï Ejiptu k'uanhatsenhchantaxapti. 40Ka Aroniniksï arhisti: Úcheajtsïni diósïchani engajtsïni juchantsïni urhechepaaka, jimbokani jucha no míteska ambexamu úkorhencha Moisesi engajtsïni Ejiptu petantaka. 41Ka jiájkanksï úakasï sapichuni ma úspti, ka jimaksï imani eratakuani kéjtsïtakuspti, ka k'uínchekuaksï ma úkuntaspti imani ambe engaksï újkuntapka. 42Ka Diósï kéndikukuaspti, ka jurajkuaspti eskaksï jóskuechani ambe k'éri ambe arhiapiringa. Ísï eska na karakata jaka Diósïri uandaricheri karakatecharhu;
‘Israeli anapuecha,
¿Andi chájtsïni tsimani ekuatse uéxurhini
kéjtsïtacheski jima enga no irenhaka?
43Sánderujtsïsï Molokiri kuákuani ka
Refaniri jóskuantsï pájtakorheaska,
imani eratakatechani engajtsï újkukorheaka
engajtsï k'éri ambe eratajka.
Ísï jimboksïni ji Babilonia jima
sánderu chúaka.’
44Juchari tátechaksï jima enga nónema irekaka jima jatsispti tiósta aiatsperakuerini, ísï eska na juramupka ima enga Moisesini arhipka eska ísï jásï ma úpiringa na enga jásï ma exepka. 45Juchari tátecha engaksï tióstani jurajkumenhapka, Josue jingunksï pájtaspti inchaakutspeni jima enga Diósï petaatpepka juchari tátechani japarini, ka jimajkani jamberi enga Dabipka. 46Ima enga Diósï xáni jaiapanhentapka, ka Dabi Diósïni sésekua kurhakuspti tiósïo ma úni nani enga Jakobueri sïrukua úpiringa k'éri ambe arhini. 47Ka Salomonisï tiósïoni úkupti. 48Nájkiruka auandarhu anapu Diósï no k'umachekua k'uiripu jimbo úkatarhu irekaka. Eska na uandaka Diósïri uandari:
49‘Auanda jucheti k'éri uaxantskuesti
ka parhakpeni jucheti jatandukua.
Acha uandaxati,
¿Andi na jásï májtsïnisï k'umanchekua úchea?
¿Nanisïni ji mintsikorhea?
50¿Andi no jucheti jájki úski iámendu íni ambe?’
51¡Inchajtsïmasïngajtsï! ¡Nójtsï p'ikuarhenhesïnga ka nójtsï kurhasïnga eskaksï no judiuecha! Chájtsï méntkisï Espiritu Sántuni no jiókorhesïnga. Májkuentsï jarhaska eskaksï chári tua anapuecha. 52¿Chári tátechaksï náki Diósïri uandarini no atakuekaski? Uándikuastiksï imani engaksï uandantaka Kaxumbitiri jukuani, imani engajtsï cha iásï intsïnharhitpeka ka uandikuntsï. 53Chájtsï no kurhandirakusïnga Juramukuani imani engajtsï ánjelichani jimbo p'ika.”
Estebanuksï uándikusti
54Íni ambeksï kurhaarini, kurhunhexaptiksï xáni ikiani ka sïnichaksï kirisïmeantaspti Estebanuni ikiakuni. 55Ka Estebanu Espiritu Sántuni uinirhikorhetini, eranchespti ka exespti Diósïri t'íntskuani, ka Jesusini enga Diósïni jurhinkandani jakupka. 56Ka uandaspti:
–Exexaka auanda mitakorhetini jarhani ka acheti Uájpani enga Diósïni jurhijkandani jakuka.
57Ka Estebanu uinhachaspti ka iámenduechaksï míndikorhespti ka sájparherasptiksï. 58Iretarhuksï petaatantaspti ka tsakapkuerasptiksï. Ka ima engaksï chkuándiraparini ambe arhiparhatani jápka, takusï ambeksï tumbini ma k'uanindutaspti enga Sáulu arhinhempka.
59Ka engaksï tsakapu k'uanirani jápka, Estebanu uandamukukorhexapti: “Acha Jesusi, p'íkuntsï jucheti espirituni.” 60Ka tinguixurhitini uinhachaspti: “¡Acha, ásï ambe k'amanharhirantaa!”
Ka ísï uandarini uarhispti.
Избрани в момента:
Hechos 7: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.