Hechos 6
6
Iúmu tsimani jarhojpirichaksï erakunhasti
1Imani jurhiatekuechani, engaksï jakajkuticha uánepani jápkia, gríegu uandarichaksï uénaspti ebreuechani arhiani eskaksï uarhiti tsîndicha gríeguecha, nóksï májkueni intsïnhasïrempka mándani pauani jarhojperatani. 2Jiájkanksï témbeni tsimani Jesusiri uandakua páricha tánpentaspti ka arhijpesptiksï:
–Nósesi jauati eskani jucha jurajkuaka Diósïri uandakuani, ka ambe kéjtatachenksïni jamani. 3Jiranhaa je iúmu tsimani erachi engachi íni ánchekorhetani míndauaka engaksï sési míntsinharhikueuaka ka engaksï uinirini jauaka Espiritu Sántuni ka mímixenksï. 4Ka jucha no jurajkuntaaka uandamukukorheni ka Diósïri uandakuani aiangpeni.
5Iámenduechaksï ísï sési exespti ka Estebanunksï eraantaspti, acheti kánekua jakajkuti ma enga Espiritu Sántuni uinirhekorhetini jápka, ka Felipeni ka Prókoroni ka Nikanorini ka Timonini ka Parmenasïni ka Nikolasïni Antiokia anapuni enga judioueni jakajkuntapka. 6Ka ínksï Jesusiri uandakua párichani jinguni páaspti, ka imaksï kómarhijpekuaspti ka p'ájtsïkuasptiksï.
7Acheri uandakua kánekua mítekorhepaxapti, ka Jerusalenksï jakajkuticha uánexapti; ka ístuksï uánekua tátecha jakajkukuani chúxapaxapti.
Na engaksï Estebanuni jupikaka
8Estebanu, Diósïri kóndentskua ka uinhapekua uinirini, k'éri míndechani ambe úasïrempti k'uiripuni japarini. 9Ka kúngorhekuntasptiksï tángorhekuarhu anapuecha engaksï “Libertu” arhikatepka, ka Sirene anapuecha, ka Alejandria anapuecha, ka Silisia ka Ásia anapuecha Estebanu jinguni arhirperani. 10Ka k'óruksï no úsïrempti Estebanuni andani enga mímixekua ka Espiritu jinguni uandempka. 11Ka achetichanksï máru sïpatekuarhu maiamuaspti eskaksï uandapiringa eskaksï Estebanuni kurhajchaspka na enga Moisesini ka Diósïni nósesi arhini jápka. 12Ka iretarhuksï manatpespti, ka achamasïchani ka juramukua jurhentpirichantuksï manataaspti, ka Estebanunksï jupikaspti ka k'éri tángorhekuarhuksï páspti. 13Ka páasptiksï máru engaksï chkuándiraparini arhiparhatani jápka:
–I acheti útakuntaxati k'éri tiósïoni ka juramukuantu útakuxati. 14Jucha kurhajchakorheska enga inde uandaka, eska Jesusi Nasareti anapu íni k'éri tiósïoni xérentaaka, ka eska mójtakuaka p'indekuechani engajtsïni Moisesi jurajkucheaka.
15Iámendu ima engaksï k'éri tángorhentskuarhu uaxakatini jápka, Estebanunksï eratespti ka ima ánjeli méni jánharhintaspti.
Избрани в момента:
Hechos 6: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.