प्रेरित 3
3
लेगडे भिखारी रा ठीक हूँणा
1पतरस होर यूहन्ना दपोहरा बाद प्रार्थना रे वक्ते प्रर्थना घरा बे, नांहदे लागेदे थी। 2होर लोका जन्मा का लेगड़े एकी मणशा, लेगडे आणदे लागे थी, जासू त्याह रोज मंदिरा रे दुआरा सेटा शोभले ना रे दूआरा सेटा, बशेगी डांहदा थी, कि सह मंदिरा में नाहणे आले कअ भीख मांगे। 3जेबा तेऊ पतरस होर यूहन्ना देहुरे बे नांहदे भाली, तेबा तेऊ बिनती करी करे भीख मांगी। 4पतरस यूहन्ना संघे तेऊ फेरा बे ध्याने संघे हेरू होर बोलू, हामा फेरा बे हेर। 5तेबा सह कुछ मागणे री आशा संघे त्याह फेरा बे हेरदअ लागअ।
6जेबा पतरसे बोलू, चांदी होर सुना तो महा सेटा नांई आंहदा, पर जोह महा सेटा साहा सह हांऊ ताह बे दिंदा; नासरी यीशु मसीह रे ना कअ चल फिर। 7होर तेऊए सह दाहिने हाथा कअ ढाकु होर चूआकू, होर तेभरी तेऊरी टांगा होर ठुंगा में ताकत आई। 8सह पटीकी करे खडअ होऊ होर हांडदअ फिरदअ लागअ; होर हांडदअ होर ठुरदअ होर परमेश्वरा री स्तुति करदअ तेऊ संघे मंदिरा बे नाठअ। 9सभी लोके सह हांडद फिरदअ होर परमेश्वरा री स्तुति करदअ सह हेरू। 10सह पह्छेणु की यह सह भिखारी सा जोह मंदिरा रे दुआरा सेटा भीखा मागदअ हुंदा थी, होर ऐसा घटना संघे जोह तेऊ संघे होई, त्याह हैरान होर परेशान होई।
मंदिरा में पतरसा रा उपदेश
11जेबा सह पतरस होर यूहन्ना बे ढाकी दे थी, तेबा सबे लोका हैरान होई करे तेऊ कुण्डा में जोह सुलैमान कहलाऊंदा थी, तेऊ सेटा बे ठुरी करे आए। 12यह हेरी पतरसे लोका बे बोलू, हे इस्राएलयों, तमे एऊ मणशा बे किबे आच्म्भा करदा होर हामा फेरे एहडे किबे लागेदे हेरदे की माना हामे आपणी सामर्थ्य या भक्ति संघे यह हांडदअ फिरणे रे लायक बणाऊ। 13अब्राहम होर इसहाक होर याकूबा रे परमेश्वरा रे हमारे बजुर्ग रे परमेश्वरे आपणे सेबक यीशु मसीहा री महिमा करी, जोह तमे ढाकु, होर जेबरे सह पिलातुस तेऊ छाडने रा न्याय बणाऊ, तेबा तमे तेऊ सामने इन्कार करू। 14तमे तेऊ धर्मी होर पवित्रा रा इन्कार करू होर बिनती करी की एकी हत्यारे थारी तणी छाडे। 15होर तमे सह जिंदगी रअ कर्ता मारु, जूंणे परमेश्वर मुंएदे में जिऊंद करू होर ऐसा गला रे हामे गुआही साहा। 16होर तेऊरे ना, तेऊरे बुशाहे संघे जोह तेऊरे नांए संघे साहा एऊ मणश बे जासु तमे जाणदा होर हेरा सामर्थ्य दीनी एऊ बुशाह जोह तेऊरी समर्थे सगे, यह थारे सामने बिलकुल भला चांगा करू।
17एबा हे भाईयो, हांऊ जाणदा कि यह काम तमे अज्ञानता में करू, होर एडा थारे सरदारे भी करू। 18पर जूंणा गला परमेश्वरे सबे भविष्यद्वक्ता रअ मुंहा कअ पहिल ही बोली दी थी, कि तेऊरे मसीहा दुःख चकणा, त्याह तेऊ एडी रीति संघे पूरी करणी। 19तेबा मना फेरा होर बापस इछा कि थारे पाप मिटे जासू संघे परमेश्वरा रे सामने मना फिराए होर थारे पाप मटाई दे। 20होर प्रभु तमाबे शांति रा वक्त दे तेबा सह जो पहिले का ठराऊदअ मसीह मतलब यीशु बे तमा लोका सेटा बे भेजणअ। 21जरुरी साहा कि सह स्वर्ग तेबरे तणी रहण जेबरे तणी सभी गला रा सुधार ना होए जासकी चर्चा परमेश्वरे पूराणे वक्ता में आपणे पवित्र भविष्यद्वक्ता रे मुंहा का करी आसा। 22जेड़ा मूसा बोलू, परमेश्वर थारे भाई मेंज़ा का तमाबे महा साही एक भविष्यद्वक्ता खडअ करनअ जोह तमाबे बोललअ सह तमा शूणना। 23हर मणश जोह भविष्यद्वक्ता री नांई शुणलअ त्याह लोका तेउरे प्राण नष्ट करने।
24होर शमूएल का तेऊ बाद तक जेतरे भी भविष्यद्वक्ता करन आले बोले त्याह सभीये याह धयाडी रे बारे में फयाडा दिना। 25तमे भविष्यद्वक्ता री संतान होर तेऊ बचना रे सभागी साहा जोह परमेश्वरे थारे पूर्वजे संघे बान्ही दे साह, जेबा तेऊ अब्राहमा कअ बोलू, तेरे बंश संघे धरती रे सभी मणशे आशीष पाऊंणी। 26परमेश्वरा आपणे सेबका चकी करे पहिले तमा सेटा भेजी, कि तमा में हर एकी बे तेऊरी बुराई का फेरी करे आशीष दे।
Избрани в момента:
प्रेरित 3: ISJNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.