Nugana 21
21
‘UPWA 21.
1Ta Ieoba Sara ‘ena ‘i apwesa na‘ieana ‘i onaona, ta Ieoba Sara ‘ena ‘i guinua na‘ieana ‘i gwaegwae ni‘atu. 2Ta Sara i ‘euwana, ta Aberaamo ‘ena iawasina dudurana ‘ena me‘olotona ‘i enatunena, tuta ‘ai‘aila nina manuna Eaubada ‘ena ‘i ona ni‘atu. 3Ta Aberaamo natuna me‘olotona ‘ena ‘i tubua, tauna Sara ‘ena ‘i enatunena, ‘i eesena Isaako. 4Ta Aberaamo natuna Isaako ‘ena ‘ana asiata ‘e eta ga ‘i dabena, na‘ieana Eaubada ‘ena ‘i loina. 5Ta Aberaamo, ‘ena natuna Isaako ‘i tubua ‘enaia, ‘ana iakwara ‘e wan anaredi. 6Ta Sara ‘i gwae, Eaubada edagi ‘i sa‘u ‘eguia; iauiaudi si nonona ma‘ieagu ‘a da edagi. 7Ta ‘i ona, Iaita nai Aberaamo ‘ena ‘i da gwae, ‘aene Sara gogama ‘i da esusu? Iawasina dudurana ga natuna me‘olotona ‘ena ia enatunena ta enega.
8Ta goama ‘i sinabwa, ta si gagina: ta asiata ‘enega Isaako si gagina Aberaamo sagari sinabwana ‘i bubuna. 9Ta Sara, Agari kena Aigupito natuna me‘olotona, tauna Aberaamo ‘ena ‘i enatunena, i ‘itena ‘i tuietuiea. 10Ta ‘enega Aberaamo ‘ena ‘i ona, waine‐ioniionina gete ta natuna me‘olotona ‘u da pa‘i iaulei: waine‐ioniionina gete natuna gea‘abo ‘i da to‘ewa‐gwegwe natugu ma‘ieana, tauna Isaako ma‘ieana. 11Ta iage nina ‘i mwauwawasae Aberaamo matanaia natuna manuna. 12Ta Eaubada Aberaamo ‘ena ‘i ona, Gea‘ abo matamuia ‘i da mwau goama me‘olotona nina manuna, ta ‘imu waine‐ioniionina manuna; iage iauiauna ‘enega Sara ‘i eonaio, ‘enana ‘u da nono; Isaako ‘ena tubumuao si da eesedi. 13Ta wate waine‐ioniionina natuna ‘enega ‘asa ia da bubuna, tauna natuio ta ‘enega. 14Ta Aberaamo ‘i unuboi, ta masura ta boasi mabwarana i ‘ewedi, ta Agari ‘ena i ‘ebwaena, ‘a‘aranaia i sa‘una, ta goama, ta ‘i etunena: ta ‘i tauia, ta mitawa Beeriseba ‘ena ‘i lopilidadana. 15Ta boasi bwara ‘ena ‘i gumwara, ta goama ‘i sa‘una kaiwe ‘e bweu ‘agaraunaia. 16Ta ‘i tauia, ta ‘edasoraia mariesenaia ‘i miatoa, ‘atua tupu ‘ina pili ‘edasora: ‘i gwae ta ‘enega, Goama ‘ina mwawasa gea‘abo ia da ‘ita‘ita. Ta mariesenaia ‘i miatoa, ta ‘enana ‘i tu‘e, ta ‘i dedoi. 17Ta Eaubada goama ‘enana ‘i nonona; ta Eaubada ‘ina anelose Agari ‘ena ‘i bwau garewega, ta ‘i eonena, Agari ie, mwa‘adega ‘oio? gea‘abo ‘u da ‘atesa‘ara; Eaubada goama ‘enana ‘i nonona ‘ena ‘i miami ta ‘enega. 18‘U da tooro, goama ‘u da ‘a‘ari, ta nimamuiega ‘u da giiaina; ia da bubuna be ‘i da e ‘asa sinabwana ta ‘enega. 19Ta Eaubada matana ‘i gie‘esasena, ta boasi wewerupwa i ‘itena; ta ‘i tauia, ta bwara ‘i loemaa boasiega, ta goama ‘i enumena. 20Ta Eaubada goama ma‘ieana, ta ‘i sinabwa; ta mitawaia ‘i miami, ta i ‘e to tupu. 21Ta mitawa Parana ‘ena ‘i miami: ta sinana mwanena ‘e bweuna i ‘au‘ewena ‘enaia Aigupito ‘enega.
22Ta tuta gote gete ‘i apwesa, Abimeleka ta ‘ina boda ‘idi tonugana Pikola Aberaamo ‘ena si gwae, si ona, Iage iauiauna ‘u guiguinue Eaubada ma‘ieaio: 23ta ‘enega gete tuga ‘u da ‘ona‘upa‘upa gete ‘ena ‘eguia Eaubada ‘enega ‘aene gea‘abo ‘u da bubuna kakokabo ma‘ieagu, nai natugu ma‘ieaio, nai tubugu ma‘ieaio: ta na‘ieana nua‘ole‘ole ‘emuia ia guinua, ‘oio ‘u da guinua ‘eguia, ta bwa‘a nina ‘enaia ‘ena ni‘atu ‘u miami. 24Ta Aberaamo ‘i ona, Ia da ona‘upa‘upa. 25Ta Aberaamo Abimeleka ‘i ba‘ena wewerupwa manuna, tauna Abimeleka ‘ina toguinuao si ‘oae‘oaena. 26Ta Abimeleka ‘i gwae, Nigea ia mwaratoni iaita nai iage gete ‘i guinuena: ta nigea ‘u eonagu, ta nigea ia nonona, ta batua tugaesi. 27Ta Aberaamo sipi ta bulomakau i ‘ewedi, ta Abimeleka ‘ena i ‘ebwaea‘edi; ta siterua ‘ona‘upa‘upa si bubuna. 28Ta Aberaamo iau ‘ina lami me wainedi ‘e sebeni ‘i sa‘u dumedumedi. 29Ta Abimeleka Aberaamo ‘ena ‘i ona, Lami me wainedi ‘e sebeni getedi ni‘atu ‘u sa‘u dumedumedi mwa‘adega? 30Ta ‘i gwae, Lami me wainedi getedi ‘e sebeni nimaguiega ‘u da ‘ewa, be ‘i da ‘ebe‐ita ‘eguia, ‘aene ‘abo‘agu wewerupwa gete ni‘atu ia salena. 31Ta ‘enega esena gote ‘i eesena Beeriseba; siterua si ona‘upa‘upa ruarua ta ‘enega. 32Ta ‘enega ‘ona‘upa‘upa si bubuna Beeriseba ‘enaia: ta Abimeleka ‘i tooro, ta Pikola ‘ina boda ‘idi tonugana, ta ‘asa Pilisitia ‘ena si ‘ila. 33Ta Aberaamo kaiwe tamarika ‘i asona Beeriseba ‘enaia, ta ‘ena Ieoba ‘ana esana ‘ena ‘i bwauiena, Eaubada Tomia Ataia. 34Ta Aberaamo me Pilisitia ‘idi ‘asa ‘ena ‘i miami ga asiata iauna.
Избрани в момента:
Nugana 21: DOBOT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the British and Foreign Bible Society in 1919