Nugana 22
22
‘UPWA 22.
1Ta iage getedi si gumwara ga gete ‘i apwesa, Eaubada Aberaamo ‘i toona, ta ‘i eonena, Aberaamo; ta ‘i ona, ‘Abo‘agu. 2Ta ‘i ‘ona, Gete tuga natuio ‘u da ‘au‘ewa, natuio me‘olotona tebweuna, tauna ‘u obobomena, tauna Isaako, ta ‘asa Moria ‘ena ‘u da tauia; ta ‘ena ‘u da ‘ebwaea‘ena ‘ebwaeadaita gabugabuna manuna ‘e bweu ‘oea manuna ‘emuia ia da simana ‘enaia. 3Ta Aberaamo ‘i unuboi, ta ‘ina ase ‘ana ‘ebegeru ‘i sa‘una, ta ‘ina tubuau ‘e rua i ‘au‘ewedi ma‘enao, ta Isaako natuna; ta kaiwe ‘i gesina ‘ebwaeadaita gabugabuna manuna, ta ‘i tooro, ta esena nina manuna Eaubada ‘ena ‘i simana ‘ena ‘i tauia. 4Asiata ‘e toninaia Aberaamo i ‘ita tu‘e, ta esena nina i ‘itena ‘edasoraia. 5Ta Aberaamo ‘ina tubuau ‘edia ‘i ona, Gete bada wa da miami ase ma‘emiao, ta ‘abo‘agu ta goama me‘olotona gote ‘ena ‘a da tauia; ta ‘a da bwagobwago, ta ‘a da ‘ila limanama ‘emia. 6Ta Aberaamo ‘ebwaeadaita gabugabuna ‘ana kaiwe i ‘ewena, ta natuna Isaako ‘ena ‘i e‘a‘arina; ta nimanega awe ‘ara‘arata ta sisi i ‘ewedi; ta siterua si arua ga si tauia rererea. 7Ta Isaako tamana Aberaamo ‘ena ‘i ona, ta ‘i gwae, Tamagu: ta ‘i ona, Gete ‘abo‘agu, natugu. Ta ‘i ona, U ‘ita, awe ‘ara‘arata ta kaiwe: ta mane lami ‘ebwaeadaita gabugabuna manuna? 8Ta Aberaamo ‘i gwae, Natugu, Eaubada tauna lami ‘ebwaeadaita gabugabuna manuna ‘i da e‘itai: ta ‘enega siterua si arua ga si tauia rererea. 9Ta esena nina manuna Eaubada ‘ena ‘i simana ‘ena si apwesa; ta ‘ena Aberaamo ‘ebetaria i ‘abina, ta kaiwe ‘i sa‘u ‘ai‘ailina, ta natuna Isaako ‘i ionina, ta ‘ebetaria ‘ena ‘i e‘enoina, kaiwe ‘enaia. 10Ta Aberaamo nimana ‘i gilagasi, ta sisi i ‘ewa natuna sabi ununa. 11Ta Ieoba ‘ina anelose garewega ‘ena ‘i bwau, ta ‘i gwae, Aberaamo, Aberaamo: ta ‘i ona, Abo‘agu. 12Ta ‘i gwae, Gea‘abo nimamuiega goama ‘u unuunui, ta gea‘abo ‘e bweu iage ‘ena ‘u da guiguinue: gete ‘enega ia mwaratoni ta ‘enega ‘oio Eaubada ‘u matautena, natuio me‘olotona, natuio tebweuna, ‘eguiega nigea ‘u egagare ta enega. 13Ta Aberaamo i ‘etatu‘e, ta ‘i dune, ta wa ‘ita, murinaia sipi me‘olotona ‘e bweuna kunanega kaiwe ‘ena ‘i loetaia: ta Aberaamo ‘i tauia ta sipi nina i ‘ewena, ta i ‘ebwaea‘ena ‘ebwaeadaita gabugabuna manuna natuna ‘ana lopa‘eru. 14Ta Aberaamo esena gote ‘i eesena Ieobaire: na‘ieana si gwae ga batua, Ieoba ‘oeana ‘ena si da ‘itena. 15Ta Ieoba ‘ina anelose garewega ‘i bwau e ruama Aberaamo ‘ena, 16ta ‘i gwae, Ieoba ‘i ona, Taugu ‘enega ia ona‘upa‘upa ni‘atu, iage gete ni‘atu ‘u guinuena ta ‘enega, ta natuio me‘olotona, natuio tebweuna nigea ‘u egagarena, 17ga onaoboboma ‘enega ia da onaobobomeio, ta gieiau ‘enega tubumuao ia da gieiau na‘ieana kwadimao garewaia, ta na‘ieana kaukau le‘awa ‘enaia; ta tubuio ‘ana tarauwarao ‘adi ‘awa ‘i da ‘ewena; 18ta tubuio ‘enega ‘asa iauiauna bare‘uia si da bobo‘ana; ‘enagu ‘u nonona ta ‘enega. 19Ta ‘enega Aberaamo i ‘ila ‘ina tubuauiao ‘edia, ta si tooro ta si tauia rererea Beeriseba ‘enaia; ta Aberaamo Beeriseba ‘ena ‘i miami.
20Ta iage getedi si gumwara ga gete ‘i apwesa, si simana Aberaamo ‘enaia, si gwae, U ‘ita, Milika, tauna wate waine nina tasio Naora ‘ena natunao ‘i enatunedi; 21Usa ‘ina tomatua, ta Busi tasina, ta Kemuela Arama tamana; 22Keseda ta, Aso ta, Piladasa ta, Idilapa ta, Betuela ta. 23Ta Betuela natuna Rebeka: site eta getedi Milika ‘i enatunedi Naora ‘ena, Aberaamo tasina. 24Ta mwanena megidarina, tauna ‘ana esana Reuma, tauna wate Teba ta, Gaama ta, Taasa ta, Maaka ta, ‘i enatunedi.
Избрани в момента:
Nugana 22: DOBOT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the British and Foreign Bible Society in 1919