San Lucas 17
17
Kʌnʌnta a bʌje'x a kʌxtik a si'pi
(Mt. 18.6-7,21-22; Mr. 9.42)
1Tu ya'a Jesús ti' u kʌ'sa winik: «Jach mʌnʌ' u mʌn u tar a mok ku ts'ek a kʌxtik a si'pi; ¡Jach yaj ba' ku bin u yue a mok ku bin tar ti'! 2Más ne tsoy wa ku jich'a u kar yete nukuch tunich, y ku pura' ix peta', ti' mu' ts'ek u kʌxtik u si'pi ti' a mok u yʌn chuniktʌ u yui'k u t'ʌn K'uj, 3¡Ki' kʌnʌnta a bʌje'x!
»Wa a bojo' ku kʌxmetkech, t'ʌne u xikin ti' u p'ʌtik; Wa ku sutik u t'ʌn ti' tech sa'se ti'. 4Wa jujump'e k'in siete wʌts' ku kʌxmetkech y ku ka sut ti' tech siete wʌts' ti' u k'atik tech: “Sa'se ten mʌnʌ' in ya metik”, sa'se ti'.»
Ʌnto' in ki aksik ti woro' ti' u t'ʌn K'uj
5A apóstoles tu yao' ti' ak Ts'uri:
—Ʌnto' in ki' aksik ti woro' ti' u t'ʌn K'uj.
6A Jesús tu ya'a:
—Wa ka waksike'x ta wor ti' K'uj, tak chichin a waksike'x ta wore'x ti' K'uj a bex u mijini u nek' a mostaza, toj jea' wei'k ti' a je' a che' u k'aba' sicómoro: “Jo'kabʌj y xen pʌk'a a bʌj ix peta'” y a che' je'e u yui'k a t'ʌnex.
A mok ku nʌj k'ʌna' yʌnti' u metik a baij ku ya'bati'
7Jesús tu ya'a:
«¿A teche'x, yʌn wa mok ku yei'k ti' u k'ʌni' tuk'in ku yu' tu meaj: “Oken ta kuta ta jʌnʌ” a lʌji' ku jub'tik u lu'm u kor o a ku kʌnʌntik uj me'? 8¿Mo' toj jai' ka wei'k ti': “Mete in wo'ch y ki tʌke a nok' y ka ya ts'ekten in wo'ch y in wuk'u, pachi chen u ts'oko ka jʌnʌ y ka wuk'u tech?” 9¿Yʌn wa ku yei'k ti' u k'ʌni', baij tech tsoy tu tu laj meta a ba' a'bti' u metik? Ten in tukrik, toj muj yei'k ti'. 10Bexi' a teche'x, tuk'in ka' laj mete'x tu woro a ba' a'bite'x a metik, a'e'x: “A to' mix k'ax moko', toj jai' ku k'ʌnko' y toj ja'ri' tak meta a to'o a'bito' ak metik.”
Jesús ku ch'ensik diez xi'ra u kʌnmo' a ya'ji a ku pok'o ot'e
11Tʌn u bin Jesús ix u beri Jerusalén, tʌn u mʌn tu xur u lu'mi Samaria y Galilea. 12Y ka tʌn u yoko yok'o jump'e kʌjta, jok' ira' ti' diez xi'ra u kʌnmo' a ya'ji a bex ku laj pok'o ot'e, chen nʌch xu'ro' ch'ikta. 13Y abotno', y bex tu yao':
—¡Jesús, wʌjkʌ'si, k'ʌs ch'ae otsi ti' to'!
14Kaj u yiraj Jesús, tu ya'tio':
—Xen e'sa' a bʌje'x ti' a mok ku meajo' yok'o u yatoch K'uj.
Chen ka tʌn u bino', toj ch'eni tio' u ya'jo'. 15Junturi' u bojo' a mok ch'eno', kaj yiraj toj ch'eni, sutpʌji tu yʌn Jesús, y k'ʌ'm kaj abotnʌj:
—¡Baij tech K'uj, kaj jach ch'ensen beje'! 16Kaj k'uchi tu yʌn Jesús, tu xonkitubʌj ix lu'm y tu ya'a:
—Baij tech Jesús.
Y a lay a xi'ra lʌji' u winki u lu'mi Samaria. 17Jesús tu ya'a:
—¿Mo' diez xi'ra tin ch'ensa? ¿Tuj bino' a nueve? 18¿Mix k'ʌs mok suti u yei'k ne tsoy ba' ti K'uj toj jari a je' a xi'ra ti u tar u jer kʌjta?
19Y Jesús tu ya'ti' a xi'ra:
—Lik'en, taka' bin; tech ch'enech tu ta ki aksa ta wor ten.
Jesús ku tsikbʌtik bik ku bij tar tu ku wesintik K'uj a tiʌ kʌ'
(Mt. 24.23-28,36-41)
20A u winiko' a judíos a ku ya'batio' fariseos, tu k'ato' ti' a Jesús tuk'in ku bin tar tu ku wesintik K'uj a tiʌ kʌ', Jesús tu nuka:
—Tu ku wesintik K'uj a tiʌ kʌ' muj bin u ya'e tuk'in ku bij tar. 21Mix mok ku bu ya'e: “Way tiʌ”, “Tiʌ tita”; toj ki wei'k teche'x beje' toj ya tiʌ yete teche'x tu ku wesintik K'uj a tiʌ kʌ'.
22Jesús tu ya'ti' tiu kʌ'sa winiko':
—Binukaj tar u k'ini tuk'in ne poch a wike'x u Ti'a Xi'ra y ma' ba wire'x. 23Yʌn mok ku bin u yei'k teche'x: “Way tiʌ”, “Tiʌ tita”; chen ma' bine'x y ma' t'urke'x u pach. 24A bex ka wike'x u jajap k'uj ku laj sasichʌ tu woro a kʌ', bex ka ba wire'x u sut u Ti'a Xi'ra. 25Chen yʌn ti' u yʌ u mʌsik ne ya'p ne mo' tsoy ba' y binukaj p'akta tiʌ a je' a winiko' a kuxʌ' beje'. 26A bex mʌni yok'o u k'ini a Noé uchik, bex ku bij sut u Ti'a Xi'ra. 27Tʌn u jʌno', tʌn u yuk'o', tʌn u ch'ei'ko' u lak'o, tuk'in kaj k'uchi u k'ini a Noé oki ix a yaj chem, tari ne k'ʌ'm u ya'ri y laj buri tu woro a kʌ', y tu woro a winik laj kimi. 28Bexi' bex mʌni u k'ini a Lot uchik, tʌn u jʌno', tʌn u yuk'o', tʌn u mʌnik u bao', tʌn u kanik u bao', tʌn u pʌk'ik u yo'cho', tʌn u metik u yatocho'; 29Chen u k'ini kaj jok'i Lot ix u kʌjta Sodoma, K'uj tu chaa' u tar k'ak' ix kʌ' yete tunich a ku ya'bati' azufre, y tu woro a winik laj kimi. 30Bex ku bin ye'se u k'ini tuk'in ka sutuk u Ti'a Xi'ra.
31»A lay u k'ini, wa tiʌ winik ix u jo' u yatoch, y tu woro u ba' tiʌ ichi ix u yatoch, mu' yeme u ch'ae; a mok tiʌ tu meaj ix u kor, bexi' mu sut tu yatoch. 32¿Mo' wa k'ʌjʌ' teche'x a ba' tu meta u lak' a Lot? 33Tu woro a mok ku tukrik u takik u bʌj ti' ma' u kimi, a lay binukaj kimi; y a mok muj tukrik u kimi a lay jeu bin ix kʌ'.
34»Ki wei'k teche'x, a lay ak'ʌ' ka sutken, ka'to' wenuka' yok'o jump'e ch'ak; junturi' ku bin pʌya' y a juntu ku bij p'ʌta'. 35Ka'to' ch'upra tʌn u juch'o' ket, junturi' ku bin pʌya y a juntu ku bin p'ʌta'.» 36Ka'to' xi'ra tʌn u meaj ix u kor; Junturi' ku bij pʌya' y a juntu ku bij p'ʌta'.
37Kaj ts'o'ki u tsikba Jesús, u kʌ'sa winiko' tu k'ato' ti';
—¿Ts'uri, tuku bij mʌn a je' a ba' ka tsikbʌtik?
Jesús tu nuka tio':
—Tu cha' u bʌk'e a kimen a winik, ti' ku bin u much'e u bʌjo' aj ch'om.
Избрани в момента:
San Lucas 17: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC