Eyɔɔ 18

E bere Yeso

1Èndzobo chɛ Yeso à shi mɛ̀ɛrɛ tsàʼrà Ngwe ngɛ, engɔ mane bɔ bɛɛrɛ abwa mɔ nyɛn kpɛ̀n ebɔrɔndim Kidrɔn. Ǹkɛmɛ deʼ à na aŋu, engɔ nè bɔ bɛɛrɛ abwa mɔ nyii efwɔ. 2Éngɛ nɔ Judas me nɛɛ afwɔ yɛ mbɔʼnga Yeso à na bwò shùnu aŋu nè bɔ bɛɛrɛ abwa mɔ. 3Éngɛ Judas à zeʼe a ǹkɛmɛ aŋu me tse embè ebe bɔ ebiri deʼ mane bɔ kɛ́ byɛ m̀fɔ̀rɔ̀ zhiri mane bɔ Farisii â me saa ngɛ. Angɔ à ne beʼre etam, akɛ̂ʼ mane eku ebiri. 4Yeso me nɛɛ ebwa wɛ à ma ngo gli ekwa ngɔ ngɛ. Engɔ biiri ebe ebaŋabɔ kpe, “Mbɔn na ke awɛ?” 5Angɔ gii kpe, “Yeso gho Nazarɛd.” Yeso gíì kpe, “Na mmɛ wu.” Judas wɛ à fɛrɛ Yeso ngɛ me tama abwaʼ angɔ. 6Èndzobo chɛ Yeso à ga kpe, “Na mmɛ wu” ngɛ, angɔ gooro amɔ achim, dye ngyo, shi godo a chwâ. 7Yeso wu biiri kpe, “Mbɔn na ke awɛ nɔ?” Angɔ gii kpe, “Yeso gho Nazarɛd.” 8Yeso gíì ebe angɔ kpe, “Mmɛ à shi ga endɔn kpe mmɛ ne egho wɛ mbɔn ma ke ngɛ. Mala mbɔn ma ke angu, mbɔn saa abɔ bɔnɔ shi e ngɔɔ.” 9Ebwa wunɔ à gli énde mbɔʼtye ebwa wɛ engɔ à ga ngɛ gli éŋwaʼa kpe, “Àtɛ, mmɛ de ke shi nyiimi gho deʼ ŋwaʼ abwaʼ angɔ byɛ ngwo à ndɛʼ ena ngɛ bo.” 10Éngɛ nɔ Shimun Petoro à ne fere ebye mɔ, è chwaʼ fɔ̀rɔ̀ àtimi gho afwɛʼ angwa zhiri anyi. Ekumu gho afwɛʼ wɛ à na Malkos. 11Yeso bwe ebe Petoro kpe, “Shwee ebye ngwɛ a mbɛʼ! Mmɛ ke enyii yɛ àtɛ ngu à ga kpe mmɛ ka zɔ ngɛ zɔ?”

Yeso efàarà Anas

12Éngɛ abɔ ebiri byɛ mane gho kɛ̀ amɔ mane bɔ kɛ́ Juu bèrè Yeso, koro ebwo ngɔ. 13Angɔ à dye nu engɔ zeʼe ebe Anas, àtɛ eye Kayfas wɛ à mwɔ angwa zhiri efwɔ anɔ̂m yɛ ngɛ. 14Kayfas à ne egho wɛ à ga ebe eto bɔ Juu kpe e we nara kpe gho ŋwaʼ ku ene ato bɔ ngɛ.

Petoro tɔn Yeso ekyɛ mbèmbè

15Shimun Petoro mane gho bɛ̀ɛrɛ abwa tsɛrɛ â na geʼge à kiri Yeso. Na aŋu angwa zhiri à me nɛɛ egho bɛ̀ɛrɛ abwa wunɔ ngɛ, è sàa engɔ nyii ne Yeso emwɔ angwa zhiri. 16Bɛʼngɛ Petoro à tam mɔ enduʼnkɛmɛ ese. Éngɛ egho bɛ̀ɛrɛ abwa wɛ angwa zhiri à me nɛɛ engɔ ngɛ wu zeʼe è ga ebe aŋwɔaye afwɛʼ wɛ à mwɔ ene afwɛʼ ngɛ kpe è saa Petoro nyii. 17Eŋwɔaye wɛ biiri ebe Petoro kpe, “Ngwo ke ma gho bɛ̀ɛrɛ abwa bi ebe egho wunɔ bo?” Petoro gii kpe, “gbaʼ ngwo we nyimi gho.” 18Efɔɔ à na kwaʼ, bɔ afwɛʼ mane bɔ kɛ́ me ge éwu ma zhwa. Petoro tam ebɛɛ edzɔwu wɛ angɔ à me ge gɛ̀rɛ̀ ma zhwa ngɛ.

Angwa zhiri biiri abwa ebe Yeso

19Éngɛ angwa zhiri à biiri abwa ebe Yeso mbɔʼ bɔ bɛɛrɛ abwa mɔ mane abwa yɛ engɔ à ma tee ngɛ. 20Yeso gíì kpe, “Mmɛ à shi ga apɛpɛ ebe bɔ akɛkɛ. Mmɛ shi tee abwa efwɔ atsam abɛ, mane efwɔ ndɔngwe kɛ̀ yɛ mwɔ afwɔ bɔ Juu gimkpaʼ ma ngɔɔ sɔ̀ŋɔ̀ ngɛ. Mmɛ à ke ga ebwa deʼ ene egeʼ bo. 21Ngwo biiri ena kpe ayɛ? Biiri ebe abɔ byɛ â ma zo abwa yɛ mmɛ à ma tee ngɛ. Éŋwaʼa angɔ be nɛɛ ebwa wɛ mmɛ à ma ga ngɛ.” 22Èndzobo chɛ Yeso à ga énde ngɛ, egho kɛ̀ bi ebara ngɔ chi efɛ kpe ebwo bere efàarà paab, e ga ebe engɔ kpe, “Na aghɛʼnji é gii ega ebe Angwa zhiri yɛngɛ?” 23Yeso gíì kpe, “Mmɛ me go ebwa deʼ ngwo toʼro ena. Mmɛ shi ga éŋwaʼa, ǹji yɛ ngwo fɛ ngu ngɛ ne ga kpe ayɛ?” 24Éngɛ Anas saa engɔ ebe Kayfas angwa zhiri.

Petoro wu tɔrɔ Yeso

25Aŋu à ma le ngɛ, Shimun Petoro à ma bli tama aŋu ma zhwa éwu. Éngɛ angɔ biiri ebe engɔ kpe, “Ngwo ke ma gho bɛ̀ɛrɛ abwa ngɔ ebi bo?” Engɔ gii kpe, “Ke mwɔ mmɛ bo.” 26Gho afwɛʼ bi abwaʼ abɔ afwɛʼ angwa zhiri, ghongwa egho wɛ Petoro à fɔrɔ àtimi ngɔ ngɛ ndooro amɔ biiri kpe “Mmɛ à ke zɔ awɛ nè engɔ efwɔ ǹkɛmɛ bo?” 27Petoro wu tɔn. È sa mɛ̀ɛrɛ̀ eklo ngɛ, èkoʼo tsoʼ.

E nu Yeso ngɔɔ ebe Paylet

28À shi enchwenchwe ntwɛn, angɔ nu Yeso abɛ Kayfas ngɔɔ a ǹtɔʼ gho kɛ efwɔ abɛ. Eto bɔ Juu â ke nyii a ǹtɔʼ aŋu bo, mbɔʼnga â na ke é shi akwâ a me pɛ na aŋu atsɛrɛ Mose à me shi ngɛ, mbɔʼtye angɔ me né nde antara fɔɔ ekere. 29Éngɛ Paylet wɛ à mwɔ gho afwɛʼ ekara ngɛ gli ese biiri kpe, “Mbɔn toʼro ebwa wɛ egho wunɔ me le ngɛ.” 30Angɔ gii kpe, “Mala engɔ à ne ma le abwa bɔɔbɔɔ bo, shi mbyɛɛ ke nu engɔ zeʼe engɛ̂ bo.” 31Paylet gâ ebe angɔ kpe, “Mbɔn nu engɔ sɛʼ aŋu atsɛrɛ ndzɔn me tee ngɛ.” Abɔ Juu byɛ tɔn ga kpe, “Mbyɛɛ ke le ekama deʼ é zhudu gho bo.” 32À gli énde, é le kpe ebwa wɛ Yeso à shi dye toʼro m̀pè ewu yɛ engɔ ma ngo ku ngɛ gli éŋwaʼa. 33Éngɛ Paylet à wu ghɛɛbɛ nyii a ǹtɔʼ, zɔʼ Yeso biiri ebe engɔ kpe, “Ngwo na m̀fɔ̀ bɔ Juu?” 34Yeso biiri ebe engɔ kpe, “Ne ezhuŋu njɛ yɛ? Kà na bɔ tsɛrɛ a ga ngɛ mbɔʼ mmɛ?” 35Paylet gii kpe, “Mmɛ na gho Juu? Na bɔ mbyɛ mane m̀fɔ̀rɔ̀ zhiri a nu awɛ ndɛ̀ʼ ena. Ngwo ne le ebwa yɛ?” 36Yeso gíì ebe engɔ kpe, “Ebwa m̀fɔ̀ ngu ke mwɔ efwɔ ese zɔnɔ bo. Mala a mwɔ efwɔ ese zɔnɔ, shi bɔ byɛ e ma kìrì angu ngɛ, a ngwè ato ndza gɛ̀rɛ̀ kɔn eto bɔ Juu kpe angɔ ka angu bere. Bɛʼngɛ ebwa m̀fɔ̀ ngu ke me mwɔ efwɔ ese zɔnɔ bo.” 37Paylet gii kpe, “Éngɛ ga kpe ngwo na m̀fɔ̀?” Yeso gíì kpe, “Ngwo kpe mmɛ na m̀fɔ̀. Â be angu efwɔ ese zɔnɔ é bɛrɛ antsɛ ene éŋwaʼa. Gho ŋwàʼaŋwàʼ wɛ e me doʼo éŋwaʼa ngɛ we nɛɛ kpe ebwa wɛ mmɛ ma ga ngɛ ne éŋwaʼa.” 38Paylet biiri ebe engɔ kpe, “Éŋwaʼa na ayɛ?” Éngɛ engɔ gɛrɛ wu gli ese aŋu bɔ Juu â me shunu ngɛ biiri ebe angɔ kpe, “Mmɛ ke zɔ ká anyɛʼ ebwa bɔɔbɔɔ deʼ wɛ egho wunɔ me le ngɛ bo. 39Bɛʼngɛ na atiʼi ndzɔn kpe mmɛ pweere ghodzɔm ŋwaʼ è ndɛ̀ʼ endɔn anji antara fɔɔ ekere. Mbɔn be ke kpe mmɛ ndɛʼ m̀fɔ̀ bɔ Juu endɔn?” 40Angɔ flaba akwâ ga kpe, “Keʼ nɔ! Ke mwɔ engɔ bo. Ndɛʼ angbɛɛ Barabas!” Barabas wunɔ à na egho bi abwaʼ ǹtìmi deʼ yɛ à fwo tù abɛ efwɔ ebiri ngɛ.

Избрани в момента:

Eyɔɔ 18: nbt

Маркирай стих

Споделяне

Копиране

Искате ли вашите акценти да бъдат запазени на всички ваши устройства? Регистрирайте се или влезте

Научете повече за Aŋwɛʼrɛ Ebuumu Fe Nè Ngwe

Eyɔɔ 18

Популярни библейски стихове от
Eyɔɔ 18

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eyɔɔ 18

Eyɔɔ 18

Популярни библейски стихове от Eyɔɔ 18

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eyɔɔ 18

Популярни библейски стихове от
Eyɔɔ 18