Eyɔɔ 17
17
Yeso tsàʼrà Ngwe mbɔʼ bɔ bɛɛrɛ abwa mɔ
1Aŋu Yeso à shi mɛ̀ɛrɛ gà abwa zɔnɔ ngɛ, engɔ kɔʼ ezob gɛ̀rɛ̀ tsàʼrà Ngwe. Yeso gâ kpe, “Àtɛ, endzobo yɛ shi koʼo, ndɛʼ enɛŋɛrɛkɛ ebe ŋwɔ ngwɛ é le kpe engɔ ndɛʼ eghɔ kɛ́ engɛ̂. 2Ngwo shi ndɛʼ ekama ebe engɔ edɔm bɔ kpe, engɔ ndɛ̀ʼ etyê kengudu ebe abɔ byɛ ngwo à shi ndɛʼ ebe engɔ ngɛ. 3Etyê kengudu wunɔ me ga kpe, angɔ nɛɛ awɛ ngwo Ngwe, yɛ mwɔ éŋwaʼa ngɛ gɛ̀rɛ̀ nɛɛ Yeso Kristo wɛ ngwo à tɔm ngɛ. 4Mmɛ à shi ndɛʼ eghɔ kɛ́ efwɔ ese gɛ̀rɛ̀ mɛ̀ɛrɛ̀ afwɛʼ yɛ ngwo à ndɛʼ ena é fwɛʼ ngɛ. 5Àtɛ, ndɛʼ eghɔ kɛ́ ena afwɔ yɛ ngwo mwɔ ngɛ, eghɔ yɛ à mwɔ de ngwo sa ndèerè ese ngɛ. 6Mmɛ shi le abɔ byɛ ngwo à ndɛʼ ena efwɔ ese ngɛ nɛɛ awɛ. Angɔ à na bɔ mbyɛ, ngwo ndɛʼ angɔ ena. Angɔ gɛrɛ shi zo ega ngwɛ. 7Enjitsɔ angɔ be nɛɛ kpe ela gimkpaʼ byɛ mmɛ me le ngɛ ne zeʼe engɛ̂. 8Ekɔn wɛ ngwo à ndɛʼ ena ngɛ, mmɛ gɛrɛ shi ndɛʼ ebe angɔ, angɔ gɛrɛ shi bɛrɛ aga yɛ. Angɔ shi nɛɛ éŋwaʼaŋwâʼ kpe mmɛ ne zeʼe engɛ̂, angɔ gɛrɛ me bɛrɛ kpe ngwo à sàa angu. 9Mmɛ wa tsàʼrà Ngwe ene angɔ. Mmɛ ke ma tsàʼrà Ngwe ene ese bo, bɛʼngɛ tye ene angɔ byɛ ngwo à ndɛʼ ena ngɛ, mbɔʼnga angɔ ne zeʼe engɛ̂. 10Abɔ byɛ mmɛ me le ngɛ na àmbyɛ, angɔ byɛ ngwo gɛrɛ me le ngɛ, mwɔ ambu. Éngɛ e shi ndɛʼ eghɔ kɛ́ ena nyɛ̀rɛ̀ zèʼe achim angɔ. 11Enjitsɔ, mmɛ wa sàarà ese ma zeʼe engɛ̂, bɛʼngɛ angɔ ma tsɔmɔ efwɔ ese. Àtɛ wɛ me pɛ ngɛ, kɔʼɔ angɔ ene ekama ekumu ngwɛ, ekumu wɛ ngwo à ndɛ̀ʼ ena ngɛ, mbɔʼtye angɔ mwɔ gho ŋwaʼ na aŋu me mwɔ nè ngwo nɔ. 12Èndzobo chɛ mmɛ à mwɔ nè angɔ ngɛ, mmɛ à kɔʼɔ angɔ gɛrɛ le angɔ tsɔmɔ anchwɔnchwɔ ene ekama ene ekumu ngwɛ, ekumu wɛ ngwo à ndɛʼ ena ngɛ. Tsɛ̀ʼ gho deʼ abwaʼ angɔ à nyim bo, à tye engɔ wɛ à me doʼo é nyim ngɛ, é le kpe ebwa wɛ efwɔ aŋwɛʼrɛ Ngwe ngɛ gli éŋwaʼa. 13Enjitsɔ mmɛ na zeʼe engɛ̂, bɛʼngɛ mmɛ na ga abwa zɔnɔ shi bli efwɔ ese, mbɔʼtye angɔ me né nɛɛ ǹji ene egɛnɛ mɛ̀ɛrɛ̀ na aŋu mmɛ gɛrɛ me le ngɛ. 14Mmɛ à shi ndɛʼ ega ngwɛ ebe angɔ byɛ e mwɔ àmbyɛ ngɛ, ese sa gwè angɔ mbɔʼnga angɔ ke bli na bɔ efwɔ ese nɔ bo, nkirinkin na aŋu mmɛ gɛrɛ ne bli efwɔ ese bo ngɛ. 15Mmɛ ke ma ke kpe ngwo chi angu efwɔ ese bo, bɛʼngɛ mmɛ na ke kpe ngwo kɔʼ angɔ eblabwo gho abwa bɔɔbɔɔ. 16Angɔ ke bli na bɔ efwɔ ese nɔ bo, nkirinkin aŋu mmɛ ne mwɔ na gho efwɔ ese bo ngɛ. 17Le angɔ me pɛ é fwɛʼ engɛ̂ ene éŋwaʼa. Ngwo ne éŋwaʼa 18Aŋu ngwo à sàa angu efwɔ ese ngɛ, na aŋu mmɛ gɛrɛ ma sàa angɔ efwɔ ese. 19Mmɛ shi le kpe ekwa ngu pɛ é fwɛʼ engɛ̂, mbɔʼtye angɔ gɛrɛ le kpe angɔ pɛ é fwɛʼ engɛ̂ ene éŋwaʼa.”
Yeso tsaʼra Ngwe ene abɔ byɛ e me bɛrɛ ngɛ
20Mmɛ ke ma tsàʼrà Ngwe tyetye ato abɔ byɛ e me bɛrɛ ngɛ bo, bɛʼngɛ mmɛ gɛrɛ na tsàʼrà ato abɔ byɛ e ma ngo bɛrɛ ene mmɛ, nyɛ̀rɛ̀ zèʼe ene ekɔn wɛ angɔ ma sɛ̀ɛrɛ̀ ngɛ. 21Mmɛ wa tsàʼrà Ngwe kpe angɔ mwɔ ene ega ŋwaʼ. Àtɛ, angɔ mwɔ nè ntsɔ na aŋu ngwo mwɔ nè mmɛ, mmɛ gɛrɛ mwɔ nè ngwo ngɛ. Mmɛ gɛrɛ wa tsàʼrà Ngwe kpe angɔ mwɔ na ntsɔ nɔ mbɔʼtye ese bɛrɛ kpe na ngwo à sàa angu. 22Mmɛ à shi ndɛʼ eghɔ kɛ́ yɛ ngwo à ndɛʼ ena ngɛ ebe angɔ, mbɔʼtye angɔ me né mwɔ ene ega ŋwaʼ na aŋu ntsɔ mwɔ ngɛ. 23Mmɛ we mwɔ nè angɔ, ngwo gɛrɛ mwɔ nè mmɛ. Mmɛ wa zhuŋu kpe angɔ me né tsɔmɔ ene ega ŋwaʼ ngɔɔ mɛ̀ɛrɛ̀, mbɔʼtye ese nɛɛ kpe na ngwo à sàa angu, ngwo gɛrɛ me doʼo angɔ na ngwo me doʼo angu ngɛ. 24Àtɛ, ngwo shi ndɛʼ angɔ ena, mmɛ gɛrɛ ma ke kpe angɔ mwɔ ene afwɔ yɛ mmɛ mwɔ ngɛ. Éngɛ mmɛ na ke kpe angɔ me né zɔ enɛŋɛrɛkɛ ndza, enɛŋɛrɛkɛ yɛ ngwo à ndɛʼ ena ngɛ, mbɔʼnga ngwo à doʼ angu dye sa zɛʼɛ ese. 25Oh Àtɛ wɛ me koʼro ngɛ! Ese ke nɛɛ awɛ bo, bɛʼngɛ mmɛ we nɛɛ awɛ, éngɛ abɔ bɛɛrɛ abwa bɔnɔ be nɛɛ kpe na ngwo à sàa angu. 26Mmɛ à le angɔ nɛɛ ekumu ngwɛ, mmɛ gɛrɛ wa fɔɔ embè é le ngɛ. Éngɛ edoʼ yɛ ngwo me le ene mmɛ ngɛ, gɛrɛ ya ngo mwɔ nè angɔ, mmɛ mɔmbwo gɛrɛ mwɔ nè angɔ.
Избрани в момента:
Eyɔɔ 17: nbt
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022, CABTAL