Miqueas 2
2
Yel llnebia ke be'nn ka' llsakzin
1Niachraz ke be'nn ka' ket lla't ake' llazirall ake',
na llun ake' xbab ka gun ake' da mar,
na kete llenin llun ake' kan ba ben ake' xbaben,
le yo rallna ake' yel llnebian.
2Llzerall ake' yell-liw ake', na llka akten,
llzerall ake' yo' ake', na llban akten.
Llsakzi ake' be'nn nachen na rente bichluellj ake' ka',
na rente xan yell-li'on na rente da sjade ke'e.
3Nallen ne Xanllon:
Lekse ka' nada' ba bena xbab, ka guna ke re'.
Wsela to da wzoayiach re'
ga bill gak gunllre ke lluntegare,
na bill tare wxenlall kwinle,
le za' lla da binkaraze.
4Ke lla'na wtitj akre re', na gul ake' kere,
na gul yia'ch ake'. Na ye ake' re':
Do kenakllo ba blleyillo,
yell kellon, dan nbane Xanllon,
baballa xane, na nuksnu gukren len,
yell-liw lix keto ka', ba bla aken
konen be'nn ka' bi nxenlall Dios.
5Nallen re' gukre yell kia
na billbi yell-liw gunlla re'.
Be'nn mar ka' llayixjwe
6Bi yed ake' wadzen akre neto' da ze gak. Ne ake'.
Daxhinjen bi yedxhenen neto'.
7¿Nak de'e yell ke Jacoben cha?
¿O cha Dioznan ba bnite yel nexjrall ke'en?
¿Kan llun Diozen cha?
¿Bixha bi llakren xtillen
kon ren be'nn ka' llun da lixhejen cha?
8Re' ba bayechjre, llwiere yell kian.
Na llkare rall xharan aken,
be'nn ka' ba bayed byiaj raw wdilen,
llun ake' xbab ke ba bara aken, na nullno bi gune le ake'.
9Nor ka' nak yell kia
llarayre le ake' lo yo' rill ake' ka',
na rente xhi'nn ake' ka', bakare
yel baran dan ba be akaben.
10Lechas, lewayaj.
Le gani' bill naken to latj ga yezirallre,
xtole daxhinjen dan ba benle rawen,
na wlleyia dokenaken.
11Cha' zu be'nn llirje'e di'll wxhiye, na ne:
Nada' llayixjwera ke xis uva na ke nis zu.
Ka be'nn nin llazrall be'nn ka' sjalla raw yellen wayixjwere le ake'.
Diozen ba bchebe'e wazre'e yell ke'en
12Watup wachaya yoyte yell ke Jacoben,
watupa yeto chop be'nn ka' bagan ke Israelen.
Watupa le ake' ka llatup ake' xhir, nench'na wllaba lo rej,
ke walle txhonj bayix ba nazlas ga sjallaba llawba,
na gun ake' llakia kwis kakse ga sjalla be'nn zangure.
13Diozen kwia rawe'e wsarje xnez aken,
na le aken naw ake' le'e,
na yelloj ake' reij yo' ke yell xhen'na.
Xan ake', be'nn wnebian
kwiarawe'e raw ake'.
Избрани в момента:
Miqueas 2: ZPUPAT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте