Miqueas 3
3
Di'll dan bsele'e ke be'nn mar ka' llnebia
1Lewzenay re' llnebiare, na re' nakre be'nn braw ke Israel,
¿Bixha bi llayal neze re'
dan nak dalixhejen?
2Axha re' llwiere dawen'na na llawere gunle da mar,
ll-lallre yidber ke be'nn yell kian,
na llakwantere sre llit.
3Ne' nbante yell kian llawre le ake',
ll-lallre xper aken na llichjre lliten yo aken,
llunere le ake' ke ber da chaj lo yes.
4To lla walwillre Xanllon,
na le'e bi wallie'e keren.
Na kena wkuachre re'
nike da mar ka' ba ben ren.
Di'll da llayechj be'nn ka' llayixjwe di'll wxhiye
5Yell kian naw ake' nez xhinj,
xtol be'nn ka' llayixjwe di'll, na ziye ake' le ake',
na lle ake' be'nn ka' su ake' nbaraz keten llwe ake' da llejllaw ake',
axha llakdilren ake'
be'nn ka' bi llwe da llejllaw ake'.
Xanllon lle'e be'nn ka' llayixjwe di'llen:
6Bill gak
redawere tllele
na bill gak wayixjwere da zegak,
willen wakoachen ke be'nn kaꞌ llayixjwen,
na llan wayaken xchul.
7Be'nn ka' llayixjwen, na be'nn waneya ka'
wagan ake' raw yelsdo.
Na bitbi di'll dell we ake',
kanaken bill walli Diozen xtill aken.
8Axha nada', Miqueas, espíritu ke Xanllon
llasllan nada' konen yelwar, na llunen nada' be'nn wen dalixhej, na llayundiprallen nada',
nench'na yepa be'nn Israel ka' ke nak ake' be'nn wednay, na llun ake' daxhinj.
Dan bagan bi byinj ke Jerusalén'na
9Lewzenay dani re' be'nn llnebia, na be'nn braw ke Israel,
re' llwiere dalixhejen
na llchukre yoyte dan nak lixhejen,
10llunchaore Jerusalén'na, yell xhen dan lli raw ya' Sión'na,
rawe gan llrarj llen'nan, na bi llunre yel korchis da nak dalixhej.
11Be'nn braw ka' sjalla raw yell xhen'na, llwe ake' latj llxoayay ake' le ake',
bxus ka' llchihxj akte keten llroellsed akren,
na be'nn ka' llayixjwe da zegak lekse ka' llchihxj akte,
zuyib ake' ne ake' Xanllon llakrene'e neto':
Xanllon zerene neto',
bitbi da mar gak keto.
12Nallen xtol re',
Jerusalén, yell xhen ke ya' Sión'na,
waganen ka to yu lix,
na wayinjen,
na ya' gan zu yoda'on to
wakoach yix ka' len.
Избрани в момента:
Miqueas 3: ZPUPAT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте