Jua 18
18
Nga kichjabé nga̱tun Kjesuu ku tsangiju̱ ꞌñu
1Nga je nga tsinengire̱ kju̱a̱nda Namiña Diuu̱ Kjesuu, kiju ja xi kjibakuyáre̱ ngu ngande jma tiñare xanga xi ꞌmí Sedron.
2-5Je kitsjua én Juda̱ Iskariote̱ nga kjabe nga̱tun Kjesuu. Ndá bé ngande jma sindu Kjesuu kju̱ ja xi kjibakuyáre̱, nga̱tꞌa kjín ndiya kutku kui ngande. Ku ku̱a̱cha, jichú Juda̱ kui ngande kju̱ ngu tjiꞌñuꞌen ja jón romano̱. Tekuácha jichú jun xi kunda niꞌya ni̱ngu̱xi̱, xi kitsingiya chanaꞌmi tetjunꞌen ni̱ngu̱xi̱ kju̱ ja fariseo̱. Tjimajun ya, michiti, kandi kju̱ ya xi ndiꞌi ꞌbetku.
Kjesuu je tjijínre najmi xi ku̱mataꞌin. Nga kube nga ndiba tjiꞌñuꞌen xu̱ta̱, itju ku kikjaꞌa ndiya, ku tsinengiyáre̱:
—ꞌYá xi tjiminchitsjáijnu.
—Kui xi ꞌmí Kjesuu xi chja̱ Nasare —skengi kui ja.
Ku̱i̱cha kitsúre̱ Kjesuu.
—Án xi ku̱a̱cha ꞌmína.
6Ku ja jón kju̱ ja xi kunda niꞌya ni̱ngu̱xi̱ nga̱tun ixú sku ꞌmí tꞌanangi. 7Ku jaskan, tsinengiyánire Kjesuu:
—ꞌYá xi tjiminchjitsjáijnu.
—Kuí xi ꞌmí Kjesuu xi chja̱ Nasare —te̱ skengini kui ja.
8—Je ku̱a̱ kixínjnu nga án xi ku̱a̱cha ꞌmína—kitsú Kjesuu—. Tsa án xi tjiminchitsjáijnu, titjuájnu ngande nga fue xu̱ta̱ xi tjimajúnna.
9Ku̱a̱cha kumá nga itjusún én xi tekuini Kjesuu tsichja: «Ngují xu̱ta̱ kichajá xi ji kitsiꞌína.»
10Te̱ kui ura, Ximo̱ Pe itsjé mitiꞌe̱ ku tsatetꞌa ñajun ngandá xta̱ xi ꞌmí Malko, musuꞌe xu̱ta̱ xá te̱tjunꞌen chanaꞌmi. 11Tekuini ura, Kjesuu ku̱i̱cha kitsúre̱ Pe:
—Chjaye mitiri. Namiꞌna je kua kitsúna nga kju̱a̱niꞌin kju̱a̱ꞌa a̱n, a sꞌejinjínri nga tjínguna nga kju̱a̱ni̱ma̱ kju̱a̱ꞌa a̱n.
12Xu̱ta̱ jun xi ngutku ma, kju̱ xta̱ xi sián tetju̱nre̱ jun kju̱ jun xi kunda niꞌya ni̱ngu̱xi̱, skabe Kjesuu ku ꞌyetꞌáꞌñu. 13Tjún Aná tsangiju̱re̱, nchaba chꞌaꞌe̱ Kaifa, xi kui nu sian tetjúnre̱ ja chanaꞌmi. 14Ni̱tjin xi jaꞌa, Kaifa je ku̱a̱cha kitsúre̱ jaxá tetjunꞌen xu̱ta̱ judio̱ nga ndá tjin nga ngútse xu̱ta̱ ꞌmé, ku ꞌbangi na̱xi̱nanda.
Tsibejí yajo̱ꞌe Pe tsa bé Kjesuu
15Ximo̱ Pe kju̱ ngingu xta̱ xi kjibakuyáre̱ Kjesuu kitjengire. Ku xta̱ xingu bejin xi sian tetjúnre̱ chanaꞌmi, tsasꞌejun Kjesuu niꞌya ndabaxa jma kitjián Aná. 16Ta̱nga nga kube nga kjindetsin kisasen Pe, itjú ku tsichjajo tsakjin xi tikunda kjinde̱tju̱a̱, tuxi ma tsikꞌasꞌen ngaya. 17Ku kui tsakjin tsinengiyáre̱ Pe:
—A mítsa jí xi tekuácha tsutjai tjengiri kui xta̱.
—Junjín, án jín, —ku̱a̱cha skengi Pe.
18Tuxi chꞌán kjima kui ni̱tjin, musuꞌe xta̱ xá tetjunꞌen chanaꞌmi kju̱ ja xi kunda niꞌya ni̱ngu̱xi̱, ndiꞌi kitsiꞌñu tꞌanangi nga tsiꞌasure yajo̱ꞌe. Ku tekuácha kitsitiña yajo̱ꞌe Pe nga mejénre kitsiꞌasure yajo̱ꞌe.
Kjesuu ku xta̱xá tetjunꞌen ja chanaꞌmi
19Xta̱xá tetjunꞌen chanaꞌmi tsinengiyáre Kjesuu, nga̱tꞌaꞌe xu̱ta̱ xi kjibakuyáre̱ mí kju̱a̱kitakun xi kjibakuya . 20-21Ku̱i̱cha kitsú Kjesuu:
—Mí xa án chjinengiyéna. Ngixku̱n ngieje xu̱ta̱ nga tsichjaꞌa̱n. Tutsjai nga niꞌya ni̱ngu̱xi̱ꞌe xu̱ta̱ judio̱ ikuyána xu̱ta̱ kju̱ niꞌya ni̱ngu̱xi̱, ngují najmi xi tjiꞌmana nga kjibakuyaꞌa̱n. Chjinengiyéri xu̱ta̱ xi je tsitꞌena. Kuí xi kuitsuyári én xi je tsichjaꞌa̱n.
22Nga ku̱i̱cha kitsú Kjesuu, ngu xta̱ jón xi kunda niꞌya ni̱ngu̱xi̱ tsꞌujin ku ku̱i̱cha kitsúre̱:
—¡Kuajícha chjungire xta̱xá tetjunꞌen niꞌya ni̱ngu̱xi̱!
23Ku ku̱i̱cha skengi Kjesuu:
—Tsa ngu én xaba kixiꞌan, tixuyéna jmá xi kui. Ta̱nga tsa ndá tjin najmi xi kixiꞌan, mí xa basénna.
24Ku jaskan Aná kitsingiya Kjesuu, tukú tjitꞌaꞌñu ngisa nga tsangichꞌáre̱ Kaifa, xta̱ xi sián tetjúnre̱ ja chamaꞌmi.
Te̱ ku̱a kitsúni Pe nga bejí ꞌya xi ꞌmí Kjesuu
25Nga kuacha kjima kui najmi, tuku tjitsiꞌásure yajo̱ꞌe Pe jma tjitse ndiꞌi, ku tjin xi tsinengiyáre:
—A mítsa jí xi tsutja tjengiri Kjesuu.
—Junjín, an jín — tuku nga tjitsu Pe nga bejí.
26Jaskan ngu musuꞌe xu̱ta̱ xá tetjunꞌen chanaꞌmi, xi xikjin ma xta̱ xi tsatere ñajun Pe, ku̱i̱cha kitsúre̱:
—¡Án xi kubera ngande jma kichjabeꞌñu Kjesuu!
27Te̱ tjitsúni Pe nga junjín. Ku kuima ura, skindá xa̱nda̱ xicha.
Kjesuu ku xta̱ xi ꞌmí Pilato̱
28Tuxi tꞌajñu kiꞌnatsje Kjesuu nganiꞌyaꞌe Kaifa ku ndabaxaꞌe xitetjun romano̱ tsangiju̱. Xu̱ta̱ xá tetjunꞌen ja judio̱ tsasꞌejín ndabaxá, nga̱tꞌa xu̱ju̱n kju̱a̱kixiꞌe xi tsjuajíre̱ kju̱a̱ nga basꞌen niꞌyaꞌe xu̱ta̱ xi judio̱ji, nga kjia chinejin ni̱ñu̱ nga jñu sꞌuíꞌe Paskua̱. 29Kui kju̱a̱ Pilato̱, xitetjun romano̱, itjú ku ku̱i̱cha kitsúre̱:
—Mí jee xi tjifanejnu kuí xta̱.
30Ku̱i̱cha skengi ngieje kui ja:
—Tsa xu̱ta̱ xabají janda kꞌuijí jindibajo̱jni̱.
31Ku̱i̱cha kitsúre̱ Pilato̱:
—Tangijújnu ku tijéjnu xukúcha tsu xu̱ju̱n kju̱a̱kixijnu.
Ku̱i̱cha skengi xu̱ta̱ xá judio̱:
—Tsjuajíjni kju̱a̱ kju̱a̱kixijni̱ nga xu̱ta̱ nikjesúnjni̱.
32Ku̱a̱cha itjusun én xi tsichja Kjesuu mí kju̱a̱nima xi kju̱a̱ꞌa nga ꞌmé.
33Ku jaskan Pilato̱, tsasꞌenni niꞌya ndabaxaꞌe, tsichjare̱ Kjesuu ku tsinengiyáre̱:
—A kjáin nga jí xi xta̱xá tetjunꞌen xu̱ta̱ judio̱.
34Skengi Kjesuu, ta̱nga tekuácha tsinengiya:
—A jí xi ku̱a̱cha makjinri, a xu̱ tjin xi je kitsuyari nga̱tꞌaꞌna.
35Ku̱i̱cha kitsú Pilato̱:
—A ngakjain xu̱ta̱ judio̱ chasena. Tekuini xu̱ta̱ na̱xi̱nandari ku ngitku chanaꞌmi xi inchatsikasꞌenri. Mí xi kiniꞌin.
36Ku̱i̱cha skengi Kjesuu:
—An, xukují xu̱ta̱ xá tetjunꞌen kꞌui nga̱sunde tsaꞌan. Tsa kuaracha tsakain, kiskantjáirena xu̱ta̱ xi yajajo̱na ku kitsjuajíra kju̱a̱ nga skabeꞌñuna ja xi inchatetjúnre̱ xu̱ta̱ judio̱.
37—A kju̱a̱xikjain nga jí xi xta̱xa tetjunꞌere kui ja —te̱ kitsúni Pilato̱.
Ku̱i̱cha skengi Kjesuu:
—Tsa jí xi ku̱a̱cha bixi... An sa, jiꞌiꞌan kui nga̱sunde nga najmi xi kju̱a̱xikjain xiyaꞌa̱n. Ku ngieje xu̱ta̱ xi bé ku chja̱ najmi xi kju̱a̱xikjain tꞌena.
38—Mí xi mejénre tsu én xi kju̱a̱xikjain —tsinengiya Pilato̱.
Tsjuande Pilato̱ nga nikꞌen Kjesuu
Ku nga je ku̱a̱cha kitsú, tsꞌutjíni Pilato̱ jma tsuba xu̱ta̱, ku ku̱i̱cha kitsúre̱:
«Ngují jee sakúna nga̱tꞌaꞌe kui xta̱, xi tsjuána kju̱a̱kixi tsa tsijena. 39Ta̱nga tusáni jún ngajnu nga ꞌnatsje ngu xu̱ta̱ xi sian nduya nga ma sꞌui Paskua̱. A mejénjnu nga ꞌbatsjeꞌan xta̱ tetjunꞌen xu̱ta̱ judio̱.»
40Nga sꞌei ku̱a̱cha kumá, Pilato̱ nduya isén ngu xta̱ xi ꞌmí Barraba. Ki kju̱a̱, nga tsinengiya Pilato̱ tsa mejénre nga nixan xta̱xá tetjunꞌen xu̱ta̱ judio̱, ku skindaya yakaꞌa ja xi kꞌi̱a̱ tsuba̱: «¡Junjín, kuijí xta̱! ¡Barraba xi ꞌnatsje!»
Избрани в момента:
Jua 18: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO