Jua 17
17
Ku̱i̱cha tsichjatjai Kjesuu ja xi kjibakuyáre̱
1Nga je tsichjajo ja xi kjibakuyáre̱ Kjesuu, tsase ndiu̱jmi ku ku̱i̱cha kitsú:
«Jí kua Namiꞌna, je jichú ni̱tjin nga bakiri xu̱ta̱ kúcha tse ngaꞌñu xi tjínna. Ku tekuácha bakúna nga tse ngaꞌñu tjínri ku nga ndai xu̱ta̱.
2»Jí kitsiꞌína nga xá batejñaꞌan ku kitsiꞌína ngaꞌñu nga batexumana xu̱ta̱ xi chja̱ nga̱sunde, nga̱tꞌa tsjuána kju̱a̱mijñachún nguxikaꞌa xu̱ta̱ xi án kitsaꞌína. 3Sakúre kju̱a̱mijñachún nguxikaꞌa nga sꞌejínre nga̱tꞌari ku nga̱tꞌaꞌna; nga̱tꞌa jí xi jajinri Namiña Diuu̱ xi kju̱a̱xikjain, ku nga̱tꞌaꞌna, nga̱tꞌa jí xi kichjajínna nga xi ꞌbatsjengiꞌan na̱xi̱nanda, ku jí kiningiyéna nga̱sunde.
4»Je ikúna ngieje nga̱sunde nga tse ngaꞌñu xi tjínri, nga̱tꞌa itjusúnna ngieje najmi xi kibixina. 5Ku kjatꞌei, Nami, titjuéna ngaꞌñu xi tse xi kisꞌena nga jí jña tijñaña, nga kje mandaji kui nga̱sunde.
6»Xu̱ta̱ xi án kitsiꞌína je ikúna ꞌyáni jí. Nga sꞌei tsi kui xu̱ta̱, ku án kitsiꞌína kjatꞌei, ku inchatsikitjusun ngieje én xi kibixiri. 7Nga̱tꞌa je bé nga jí xi kitsiꞌína ngieje najmi xi tjínna, 8nga̱tꞌa je kitsjuána én xi kitsaꞌína, ku je kisijaꞌo énri. Je bé nga jí xi kiningiyéina, ku je kisꞌejínre.
9» Án betsꞌuara nga̱tꞌaꞌe ngieje kui xu̱ta̱. Minengijiꞌa̱n nga̱tꞌaꞌe xu̱ta̱ xi sꞌejinjínre nga̱tꞌaꞌna, xi tu najmi nga̱sunde inchatsikjo. Ta̱nga, minengitjaiꞌan xu̱ta̱ xi án kitsaꞌína nga̱tꞌa tekuácha tsi. 10Tsi ngieje najmi xi tjínna, ku ngieje najmi xi tjínri tekuácha tsaꞌa̱n. Ku nga ngieje kui najmi yáre̱ nga tuxi tse ngaꞌñu xi tjínna.
11»Jí ku̱a̱ Nami xi tijni ndiu̱jmi, ngi chubatse ni̱tjin chaja nga ngite kꞌuijí nga̱sunde batejñaꞌan, nga̱tꞌa jma tijni fueꞌan. Ta̱nga xu̱ta̱ xi sꞌejínre án tuku kꞌui nga̱sunde ꞌbendu. Kui kju̱a̱ minengire nga chaséri, ku tichjen ngaꞌñu xi kitsaꞌina tuxi ngútse ngatsiꞌin yajo̱ꞌe, xukúcha tijñaña jí ku án. 12Nga jña tejñajúnꞌan kui xu̱ta̱, tsasena nga ngieje ngaꞌñu xi kitsaꞌina ndá kiskunna, ku ngují xi kisꞌejinjínre̱ nga̱tꞌaꞌna. Tujma Juda̱tse xi ngují ni̱tjin kisꞌejínre nga̱tꞌaꞌna. Ku̱a̱cha itjusún najmi xi tjichja Xu̱ju̱n Enꞌen Namiña Diuu̱.
13»Kjátꞌe ꞌbutjiñaꞌan jmá tijni. Ta̱nga techjaꞌa̱n kui én nga tuku kui nga̱sunde tejña, tuxi tsjua ꞌbendure xuku an, anima̱ꞌen xu̱ta̱ xi sꞌejínre an. 14Je ꞌyénijmina énri, ku kui kju̱a̱ nchꞌo basére xu̱ta̱ xi chja̱ kui nga̱sunde, nga̱tꞌa ngite kuajícha kun kui xu̱ta̱ xuku ja xi ngisa, ku te̱ kuajícha kunꞌan nditsa án. 15Teminengijíre tsa kui ja chjubaꞌi kꞌui nga̱sunde, tusáni chaséri ku chjubaꞌíxinri Xindajin. 16Kuijí nga̱sunde chjaꞌa̱n, ku tekuácha kui ja. 17Énri xi kju̱a̱xikjain; ku nga tꞌére énri kui ja, ngatsikasꞌen ngiejeri yajoꞌe. 18Ku tetsingiyaꞌa̱n nga tsjuare énri xu̱ta̱ nga̱sunde, xukúcha kiningiyéna jí. 19Je kitsjuári ngieje kju̱a̱mijñachúnꞌna, ku ku̱a̱cha mejénna nga tsiꞌin xu̱ta̱ xi tjimatjengina, xi sꞌejínre nga̱tꞌaꞌna.
20»Tu kuijítse nga̱tꞌaꞌe xi minengiꞌan, tekuácha minengiꞌa̱n nga̱tꞌaꞌe xi sꞌejínre̱ nga̱tꞌaꞌna nga kuitꞌé énꞌna. 21Minengira nga ngútse ngatuma ngieje xi jña tjima, ku xukúcha tjimaña jí ku án, tekuácha ngútse nga̱taꞌa xikjin nga ngatꞌemaju̱nña. Ku kjia nga sꞌejínre xu̱ta̱ nga̱sunde nga jí kiningiyena. 22-23Tuku kui ngaꞌñu xi kitsaꞌina, kitsjuána ja xi kisꞌema tjengina, tuxi ma nga ngu nga̱taꞌa xikjin. Xi mejénre tsu nga ngu chꞌájni xingiji̱n, kuí ku an, xukúcha ngu kichꞌaña xingiña, jí ku an. Ku̱a̱cha nga ndá kꞌuendu kjín, ku sꞌejínre xu̱ta̱ nga̱sunde nga jí kiningiyena, ku nga tjóri xukúcha tjóri an.
24»Jí kua Namiꞌna, jí kitsaꞌína xu̱ta̱ xi sꞌejínre nga̱tꞌaꞌna, ku mejénna nga ngatsikitjusun énꞌna, tuxi ngatubé xu̱ta̱ ngaꞌñu xi kitsaꞌína, nga̱tꞌa tjóri an janda nga kjie najmí kui nga̱sunde.
25»Jí kua Namiꞌna, jí xi mári nitsje kjua, ta̱nga xu̱ta̱ xi chja̱ kꞌui nga̱sunde bejí kúcha ndá nitsjeji kju̱a̱. Án xi ndá béra, ku xu̱ta̱ xi jí kitsaꞌína bé nga jí kiningiyéna. 26Je kixiyana ꞌyáni jí, ku tutsjái nga xiyana, tuxi jña bixkantjáijni̱ énri, ku ngatsitjó xikjin xukúcha tjóña xingiña.»
Избрани в момента:
Jua 17: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO