Jua 12
12
Ngu chjun incháre̱ ndijua sijén tsjái Kjesuu
1Jón ni̱tjin tjen ngisa nga bitju sꞌui Paskua̱, Kjesuu kijí nangi Betania̱. Kꞌi̱a̱ kitjian Lasaro, xta̱ xi Kjesuu kitsikjáiyáre̱.
2Kui ngande, ja xi ndá yáꞌa Kjesuu ꞌyendayáre̱ najmi xi chine. Lasaro kju̱ Kjesuu yámexa kisꞌendutꞌa, ku xi chine kjiꞌbéya ndichja xi ꞌmí Marta̱. 3Maria̱, xi ngingu ndichja, skabe ngu lometa ndijua sijén xi ꞌñú chjí ku tsjái Kjesuu ꞌyejun. Ku tsjátku kitsixijún, ku ndáꞌe̱ ndijua sijén tsangaya ngieje ngaya niꞌya.
4Ta̱nga xta̱ xi kjibakuyare, xi ꞌmí Juda̱ Iskariote̱, kui xi jaskan kjabe nga̱tun Kjesuu, ku̱i̱cha kitsú:
5—¡Tsá tukꞌuáre̱ kistéña kui ndijua sijén! Tusáre̱ sakuña tón xi tseꞌe ján uchan ni̱tjin nga nixa, ku kui tón kumá kikinchajoña xu̱ta̱ xi ꞌñú ni̱ma̱ tjima.
6-8Jaskan Kjesuu ku̱i̱cha kitsúre̱ xta̱ xi ꞌmí Juda̱:
—¡Ngatu kuaji bixiri! Nga̱tꞌa kui ndijua sijén kifayá ni̱tjin nga fueñajínꞌan. Ku nga̱tꞌaꞌe xu̱ta̱ ni̱ma̱, tutsjái nga tiña kꞌuematꞌájnu, ta̱nga tutsjáijí ni̱tjin nga sakújnuꞌan.
Ta̱nga Kju̱a̱xikjáinni, Juda̱ mase̱njínre̱ xu̱ta̱ xi ni̱ma̱; ku̱a̱cha tsú nga̱tꞌa cheje, nga̱tꞌa kui xi fayá tónꞌen Kjesuu kju̱ ja xi kjibakuyare, tíkja chéje tón tsiꞌin.
Kúcha ꞌbendaya chanaꞌmi tetjun nga mejénre tsikꞌen Lasaro
9Kjín xu̱ta̱ judio̱ xi sindu Jerusalen tsitꞌe nga Kjesuu jichú Betania̱; ku ku̱a̱cha kumá nga kijí kui ngande, tukuijítsa nga mejénre bé Kjesuu xu̱ta̱, nga̱tꞌa tekuácha mejénre nga bé Lasaro, xta̱ xi kitsikjáiyáre̱ Kjesuu.
10Nga kisꞌejínre̱ chanaꞌmi xi ꞌñú xáꞌe xi ngitku ni̱ngu̱xi̱, tekuácha ꞌyendaya nga mejénre tsikꞌen Lasaro, 11kjínma xu̱ta̱ judio̱ xi ngingují najmi te̱ mejénre nga̱tꞌaꞌe chanaꞌmi, ku Kjesuu kisꞌematjengi ngiejere.
Ku̱i̱cha tsasꞌen Kjesuu na̱xi̱nanda Jerusalen
(Mt 21.1-11; Mr 11.1-11; Lk 19.28-40)
12Kjín xu̱ta̱ kijí na̱xi̱nanda Jerusalen jma bitju sꞌui Paskua̱. Ni̱tjin xima nchajúnni, tsitꞌé yákaꞌa xu̱ta̱ nga Kjesuu kju̱a̱ꞌi kui na̱xi̱nanda, 13tsate xka̱ꞌe yaxkajen ku kikjáꞌa ndiya̱ Kjesuu, ku̱i̱cha tsú nga inchakjíndaya:
«¡ꞌNatsjengíjni, Namiña Diuu̱jni!
¡Kꞌuechjíre̱ xi ndiba nga̱tꞌaꞌe Namiña Diuu̱!
¡Kꞌuechjíre̱ Xta̱xá tetjunꞌen Israe!»
14Xi nga̱tꞌa tseꞌe Kjesuu, kisꞌejñasunre ngu burru chubachi xi sakúre ndiyá. Ku̱a̱cha itjusun xi tjitsuya Xu̱ju̱n Enꞌen Namiña Diuu̱:
15«¡Ngatu tkunjínjnu
xu̱ta̱ na̱xi̱nanda Jerusalen!
»¡Je ndiba xi Xta̱xá tetjunjnu!
¡Ngu burru chubachi tjisunre nga ndiba!»
16-19Xi kisꞌendu Betania̱ kui ni̱tjin, nga Kjesuu kitsikjáiyáre̱ Lasaro, ku̱a̱cha ꞌyénijmi kui najmi tkun ngande Jerusalen. Ki kju̱a̱ itjú xu̱ta̱ nga kikjáꞌa ndiyá Kjesuu. Ta̱nga xu̱ta̱ fariseo̱ tekui temá kuatsúre̱ xikjin: «Chaséjnu, ¡ngieje xu̱ta̱ tjimatjengire! Ngují najmi kuma siꞌánña.»
Nga tsaꞌángire̱, ja xi kjibakuyare Kjesuu makjinjínre̱ najmi xi ku̱a̱cha kjima; jaskan nga kꞌien ku jiyáre Kjesuu, jitsjénre̱ nga ngieje najmi xi kumataꞌin Kjesuu kꞌi̱a̱ tjitsuya xu̱ju̱n Enꞌen Namiña Diuu̱.
Kjesuu te̱ tsuyani nga nikꞌen
20Já xi kꞌi̱a̱ tjimajínre̱ xu̱ta̱ na̱xi̱nanda Jerusalen jma bitju sꞌui Paskua̱, kꞌi̱a̱ tsuba̱ yákaꞌa xu̱ta̱ ngriego̱.#12.20 Ngriego̱: Xi mejénre tsú nga xu̱ta̱ judio̱jí, ta̱nga tsiꞌin xukúcha ngáre ni̱ngu̱xi̱ judea̱. 21Kui ja kijí ngande Ngalilea̱ nga mejénre bé Lipe, ngu xta̱ xi kjibakuyare Kjesuu, ku ku̱i̱cha kiꞌmíre:
—Ndia̱ꞌna, mejénjni nga chaséjni Kjesuu.
Lipe, xi ndiba ngande Betsaida̱, 22kijí tsuyare Jandre̱, ku ngiajó kui ja kitsuyare Kjesuu. 23Ku ku̱i̱cha kitsú Kjesuu:
—Jé jichú nitjinꞌen nga ngieje xu̱ta̱ sꞌejínre najmi xi kju̱a̱xikjain, ꞌyá xi kjindiꞌe xu̱ta̱ nga̱sunde. 24Yájnu jun nga tuꞌe trigo̱ ngují najmi tsjua, tusá tsa nangi meje̱n ku ꞌme. Kútsa ꞌme, tusá ꞌñú chan bajare̱ najmitjé. 25Tsa bixujnu jun nga ꞌñú chjeꞌe̱ yajo̱jnu ku ñaꞌanjínjnu xki̱, sakujíjnu kju̱a̱mijñachun ngu xi kaꞌa. Ta̱nga tsa bixujnu nga chjeꞌejí yajo̱jnu kꞌui nga̱sunde, ku ñaꞌánjnu xki̱ najmi xi xinjnu, kjiatsa sakujnu kju̱a̱mijñachun ngu xi kaꞌa. 26Tsátjin xi jún mejénjnu basenñajunjnuꞌan, tjinere nga ñaꞌánjnu xki̱. Jma nga̱tjen tejñaꞌan, tekuácha kꞌi̱a̱ ꞌbéndu xi kuasenñajúnna, ku Namiꞌna tsjuare kju̱a̱ndá.
27»Kui ni̱tjin tjeꞌñu ón kjimáre̱ anima̱ꞌna, ku bejíꞌa̱n mí xi kjimana. Tu̱ mejénna xiyána Namiꞌna ngatu kju̱a̱niꞌinjín ngatsikjaꞌana. Ta̱nga kuají tsiꞌinꞌan, nga̱tꞌa jiꞌíꞌan kui nga̱sunde nga tsikitjusunꞌan najmi xi kitsúna. 28Tusáni ku̱i̱cha xínna: “Nami, takíri nga̱sunde ngaꞌñuri.”
Tekuíni chu̱ba̱, janda ndiu̱jmi kinuꞌyáre ngu nda̱ xi ku̱i̱cha kitsú: «Je ikuꞌan ngaꞌñu xi tjínna, ku te̱ bakúñaꞌa̱n ngingu ndiya.»
29Xu̱ta̱ xi kꞌi̱a̱ tsuba̱ kitsú nga choꞌa̱n xi kitꞌere. Ku kjaꞌi xi kitsú: «Ngu kjinditsjeꞌe Namiña Diuu̱ tsichjajo̱ Kjesuu.» 30Ta̱nga ku̱i̱cha kitsúre̱ Kjesuu:
«Kui én xi kinuꞌyájnu, mejénre nga baseju̱njnu tuxi sꞌejínjnu nga̱tꞌaꞌna. 31Kjatꞌei chajnu xi kju̱a̱xikjain nga xu̱ta̱ xi chja̱ kui nga̱sunde majére; kju̱ xi tjitsiꞌin manda nga̱sunde, xi ꞌmí xindajin, ku kjindetsin nikjaꞌa. 32Ta̱nga, ni̱tjin nga sꞌetꞌaꞌan kru, ku kjia janda sꞌejínre ngieje xu̱ta̱ nga̱tꞌaꞌna.»
33Nga kitsú Kjesuu nga kru sꞌetꞌa, najmi xi kitsú nga ku̱a̱cha ꞌmé.
34Ku xu̱ta̱ tsinengiyáre̱:
—Mí xá ku̱a̱cha bixiji nga kru sꞌetꞌa Kjindiꞌe xu̱ta̱ nga̱sunde. ꞌYá kui xi Kjindiꞌe xu̱ta̱ nga̱sunde. Ku̱a̱cha tsú Xu̱ju̱n Enꞌen Namiña Diuu̱ nga xi janjin Namiña Diuu̱ nga ꞌBatsjengiña ngují ni̱tjin kju̱e̱ ni̱tjinꞌen.
35-36Ku ku̱i̱cha kitsú Kjesuu:
—Ngi chubatse ni̱tjin tejñajínjnu ngisa. Tisꞌejínjnu nga̱tꞌaꞌna teꞌa nga tejñajínjnu kꞌui. Tsa sꞌejínjnu nga̱tꞌaꞌna, mejénre tsú nga ꞌbema nga tuku asen ngisa, tuxi kꞌuanachajujíjnu ni̱tje̱n, nga̱tꞌa xi ꞌbéma jñu bejí jma nga̱tjen fué.
Nga je ku̱a̱cha kitsú, xín kijí Kjesuu ngu ngande jma najmí xi sakutsjáire.
Inchasꞌejinjínre̱ xu̱ta̱ nga̱tꞌaꞌe Kjesuu
37Kjín najmi xi makjinjínña kúcha bixuya xi kitsiꞌin Kjesuu ngakjáin xu̱ta̱, ta̱nga tekui xi kisꞌejinjínre xu̱ta̱ nga̱tꞌaꞌe. 38Kumá kui najmi nga̱tꞌa tjinére̱ nga bitjusún én xi kiski Isaia̱ chjine Enꞌen Namiña Diuu̱:
«Namiña Diuu̱ꞌna̱, ꞌyá xi je kisꞌejínre̱
én xi tjimajúnña.
ꞌYá xi je kikakíri ngajñuri.»
39Kui kju̱a̱ nga najmí xi inchasꞌejinre, nga̱tꞌa tekuácha kiski Isaia̱:
40«Namiña Diuu̱ xi tuxá taja itsjé,
ku kitsjuajíre̱ kju̱a̱nikjaitsjen,
tuxi kuají ngatumare̱
ku nga̱sꞌejinjínre̱ nga̱tꞌaꞌe,
ku te̱ ngatꞌangijí.»
41Isaia̱ kiski kui én nga̱tꞌa tjen ni̱tjin nga kube ngaꞌñu xi kꞌuere ku nga ngieje xu̱ta̱ skue xá xi tsiꞌín Kjesuu. 42Ngi ngu najmi, kjín xu̱ta̱ judio̱ ku yakaꞌa xi inchatetjúnre̱ na̱xi̱nanda kisꞌejínre nga̱tꞌaꞌe Kjesuu, ta̱nga najmí xu̱ta̱ kitsuyajíre̱, nga̱tꞌa kitsakjún tsa xu̱ta̱ fariseo̱ ꞌbatsjé ngaya ni̱ngu̱xi̱. 43Tusáni ndá mejénre baꞌa xu̱ta̱ nga̱sunde tukꞌuajíre̱ nga Namiña Diuu̱.
Nga̱sunde jiꞌi kꞌatsjengi Kjesuu
44ꞌÑu kitsiꞌin ndaꞌe Kjesuu nga tsichja:
«Tsa tjin xi sꞌejínre nga̱tꞌaꞌna, tekuácha sꞌejínre Namiña Diuu̱, xi kitsingiyana. 45Tsa tjin xi án béna, tekuácha je kube xi kitsingiyana. 46Án kui ndiꞌi xi kju̱a̱ꞌi tsitsejénna nga̱sunde. Xi sꞌejínre nga̱tꞌaꞌna jma jñujin kju̱a̱bixí.
47»Kju̱a̱ꞌijíꞌan tsa batejéna xi inchatꞌe én xi tebakuyaꞌan ku tsikitjusunjín. Jiꞌijíꞌan tsa batejéna xu̱ta̱ nga̱sunde, tusáni kju̱a̱ꞌikꞌatsjengiꞌa̱n. 48Xi án tsichꞌaona ku tsiꞌinjín xki̱ én xi tebakuyaꞌan, tekuíni én tsijére nga kjuetꞌa nga̱sunde.
49Nga̱tꞌa én xi texiyaꞌan, tu án subají xi kuatexinꞌan, kui Namiꞌna xi kitsingiyana kitsúna mí én xi tsubáre̱ bakuyaꞌan. 50Ku béꞌan nga xi tsiꞌin xki̱ kju̱a̱kixiꞌe Namiꞌna sakúre kju̱a̱mijñachún nguxikaꞌa. Kui kju̱a̱ nga je kixiyájnu ngieje én xi kitsú Namiꞌna nga bakuyajnu.»
Избрани в момента:
Jua 12: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO