KEJADIAN 18
18
Allahn malik ap angge og huruhuk ulug Abraham hiyag itfag ane
1Welatfareg hun Abraham ino usa ahen o Mamre werehon itano iraham weregma Ninikni Allah at olohotma inam atfag. O ino sambil unukoho mo oloken Abraham ino ibam o sabo witfahon sokolma heriyeg lit 2#Ibr 13:2orohole leko yet harukmen ap hinahan at aluke fil unduhukmu yet isibag. Yet isibareg Abraham ino in atug enembeg libareg orohole han kinangma sahung atuk lit, 3”Niknisi, hiren an nubahet hinindi nasug lahep halug pisan niyalug lalihip fug. An hit henemingmingangge welahireg 4ik hinanggik laminmu hunuyug umatihipteg e alma tuwen kel talihip. 5Hit kel tarukmu anden suburu roti og hisa laminon nalihipteg hinine atuk halug lalihip. Niknisi, an nambeg wahep angge re kel ta fug angge lalihip fug,” ibagma iren te, ”Wah nare, haren ehen ane ari timihin,” ibag.
6Ibagma Abraham ino folo-folo olma kibareg Sara hiyag utuk lit, ”Folo-folo roti anggen fano roho lilibug tohon sum misig wamihinteg tag toho wiratmihin,” ulug hiyag itfareg 7pupu angge wam endetuk ambeg libareg wam sapi umalik mondabi fanowon eke wibareg folo waroho esetmihin ulug amingmingangge eke og itfag. 8Og itfareg wam sapi ag humu wibareg wam esetfahon ino men walug ap ambeg watfahon itano og isa watfag. Og isa watfagma e ino alma heriyeg lit suburu narukmu Abraham amuwen let eneptuk latfag.
9Let eneptukmu iren, ”Huhe Sara kema wereg?” ulug kapal hibagma, ”Olma wereg,” ulug hiyag isibag.
10 #
Rm 9:9
Hiyag isibagma it itano misihen ele uruk lit, ”Mo ilig aruhureg wirig aruhumu huhe Sara inowen malik ap angge indag tahureg weregma an suhuloho henembeg waruhuk,” ibag.
Ari urukmu itano Sara ino sokolma ap ino ambol fil unduhuk lit holeg latfag. 11O itano li Abraham men Sara men mondabi sabal atfareg Sara ino pikalem sap turuk ane eleg atfag. 12#1Ptr 3:6Ari roho wereg lit Sara inowen, ”An nahun men mondabi sabal atukukteg nenehap hilik atisi angge famen nangginoho nahun men nenehiyeg toho nohokuk?” ulug indimuwen inda yatuk latfag.
13Inda yatuk latfagma Ninikni Allahn Abraham kapal haruk lit, ”Nungge fahet Sara indimuwen wenggel haruk lit, ’An sabal atikikteg nangginoho malik endebuk teg lahi?’ ulug inda yarehek? 14#Luk 1:37Hinikni Allahn tuk fug tehon wereg ano? Anden ihiyon hikit toho mo ilig aruhureg wirig aruhumu huhe Sara inowen malik ap angge indag tahureg weregma henembeg suhuloho waruhuk,” ulug hiyag itfag.
15Ari ulug hiyag itfagma Sara inowen akolen inda yarihi fug ulug awiya wibag. Awiya wibagma Ninikni Allahn, ”Haren tem toho inda yarehen,” ulug hiyag itfag.
Abrahamen Sodom inap fahet Allah fam heng tibag ane
16Ari ulug hiyag itfareg ap hinahan itano wilip atfareg larukmu Abrahamen kema monde hunubahamin ulug ambiyeg libag. Laruk lit o Sodom yet haruk ambeg libareg 17Ninikni Allahn indimuwen peruk lit, ”Anden tuhuk peruk ane fahet Abraham iline awiya wamin fug. 18Aren ondohowonen endebuhubon anggolo amuhupteg o pumbuk humon welamuhup. At aru feneyen Anden ap o pumbuk obog toho inineyap eneptuk laruhuk. 19Aren umalikisi men iren endebuhubon men milal enebuhumu An nele eneg holtuk lit onori men let-ler atuk lamuhuben at aru mumal tarikik. Iren fano ane eneg turuk lamuhup halug Anden sali at tu ubam emberikikon hikit toho turuk laruhuk,” pibareg 20Abraham ubam ele uruk lit, ”Sodom Gomora inaben An enembol yig nutuk lit onolok ane eneg turuken ap winonen enele ya nga urukon Anden holtikik. 21Ari fahet tem toho onolok ane eneg turuken uruk ano ulug pen isa wambimin,” ulug hiyag itfag.
22Hiyag itfagma ap watfahon itano piren Sodom fil libagma Ninikni Allah eneg Abraham men welatfag. 23Wereg lit Abraham ino Ninikni Allah iraham libareg hiyag utuk lit, ”Nikni, Haren ap fano ane turukon men siyag ane turukon men mangno roho unusimin peruk lahen? 24Ap teng piren siyag ane turuk elehon wereg halug o aru Haren siyahap tehen ha reg ano? It ariya onoluk welamag ulug Sodom inaben siyag ane turukon hambolmayap turuk lit siyahap enepmihin fug. 25Ap fano ane turukonet siyag ane turukonet mangno roho unusimihin fug. It arimano alem misihon eneg unubam aruhu rohon, Nikni, Haren pehen ane timihin fug. Haren ap kinangma werehon obog toho alem unubam weregma haltuk ahun welahen angge re it aruma unubam oho pikir ane eneg timihin!” ibag.
26Ari ibagma Ninikni Allahn, ”O Sodom aru ap teng piren fano ane turukon weregma yet isamin halug it ariya onoluk welamag ulug Sodom inaben siyag ane turukon nambolmayap turuk lit siyahap enepmin fug,” ibag.
27Ibagma Abraham inowen nin ele uruk lit, ”Nikni, an ap kinangmon kinang alinlan hag toho wereg lit Hat hubam nele uk fug teg lahi angge famen nele palimu roho ihireg ketiya iminon fahet oho Haren hindi niyimin. 28Ap fano ane turukon teng piren itano enebe fuwaben alindik toho eleg halug enebe fuwaben eleg ulug o aru siyahap tehen ha reg?” ibagma Ninikni Allahn, ”Ap fano ane turukon teng piren itano enebe fuwaben eneg alindik toho elegma yet isamin halug o aru siyahap timin fug,” ibag.
29Ari ibagma Abraham inowen nin ele uruk lit, ”Ap fano ane turukon teng misig nubam hilag nuwalen 40 wereg halug ke roho peruk lahen?” ulug kapal hibagma Ninikni Allahn, ”Ap teng misig nubam hilag nuwalen itano fano welamag ulug timin pihi ane embesemin,” ibag.
30Ibagma Abrahamen, ”Nikni, nin eke iminon fahet pet nabuk fug! Ap fano ane turukon teng misig eneg 30 wereg halug nangginoho timihin?” ibagma Ninikni Allahn, ”Enebe teng misig weregma yet isamin halug wenggelihi ane timin fug,” ibag.
31Ibagma Abrahamen, ”Nikni, Hat hubam nele uk fug teg lahi angge famen nambong se roho ihireg nin eke iminon fahet holok ha fug. Ap fano ane turukon likin fumahen 20 eneg wereg halug nungge timihin?” ibagma Ninikni Allahn, ”Enebe likin fumahen eneg weregma yet isamin halug o aru elehap timin fug,” ibag.
32Ibagma Abrahamen nin hiyag utuk lit, ”Nikni, hindi siyag ha fug! We misihim eneg eke imin. It enebe numen eneg wereg halug nungge ane tuk teg?” ibagma Ninikni Allahn, ”Enebe numen eneg wereg halug o aru siyahap timin fug,” ulug hiyag itfareg 33libagma Abraham oho ibam libag.
Избрани в момента:
KEJADIAN 18: YLI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
@ LAI 2018