KEJADIAN 17
17
Henembilahap paltuk lamuhup ulug Allahn Abram hiyag itfag ane
1Abram indag tibag sali mo ilig am wirig am turukmu teng hinahan nubam hilag num fimahen 99 atfagma Ninikni Allah at olohotma inam atfareg ubam ele uruk lit, ”An Allah mondabi nineyon welahi. Haren An nele eneg holtuk lit telep peruk lahi ane eneg turuk laruhun. 2Anden sali hat hubam emberuk lit humalikisi humbusagsi anggolo amuhup ulug emberuk lahi,” ibagma 3Abram ino orohole han kinangma sahung atfag. Sahung tegma Allahn ele uruk lit, 4-5#Rm 4:17”Anden sali hubam emberuk lahiyon tu: Ap o pumbuk anggolo welamuhubon unumba hat aruhun. Ari fahet hat hunuk Abram urukon ino embeselug Abraham suwal haptuk lahi.#Abraham: Ibrani enele fam unuk Abraham ino men, ap anggolo unumba urukon men ambi reg. 6Anden hineyap habuhukmu haren ondohowonen endebuhubon arimano anggolo amuhupteg o pumbuk wal-wal wereg lit enele wal taneg uruk lamuhup. It arimano sehelimuwen ap suwon raja oho in atuk lamuhup.
7 #
Luk 1:55
Anden hat men humalikisi fobikon men Hinikni Allah An welaruhuk ulug sali emberuk lahiyon aru mondabi weregman eneg napeleg aruhu fug.
8 #
Kis 7:5
Kinang Kanaan tu fam hat pohon hag toho welahen angge famen hat humbusagsi menen kinang aru obog toho mondabi ngi amuhuben og hisahukteg it fahet Inikni An welaruhuk,” il laruk lit, 9”Anden sali emberuk lahiyon tu hat men humalikisi fobikon menen hininggik ine roho seneg lamuhup. 10#Kis 7:8; Rm 4:11Hat men humalikisi ap angge obog toho henembilahap paleg lamuhup. 11-13Ap umalik indag enebuhup sali o likinen atuk halug enembilahap paltuk lamuhup. Henemingmingangge hinibamen indag amuhubonet ap o winamon onggo paloho hilaruk lamuhubonet ap angge obog toho enembilahap paltuk lamuhup. Anden sali hunubam emberuk lahiyon aru mondabi welaruhuwon fahet honoluk toho welamuhuben henembilahap paleg ane ari enehangge hit hunubam welaruhu. 14Enembilahap paleg elehon arimano Allahn sali emberisiyon ino pisan isarusa ulug hit An numalikisi henesehelimuwen elehap enebuhup,” ulug hiyag itfag.
15Hiyag itfareg nin ele uruk lit, ”Huhe unuk Sarai urukon ino umbusuhunteg Sara suwaluhun. 16Anden at ineyap tuhukmu malik ap angge indag huruhu. Ap o pumbuk anggolo welamuhubon inisinga at welaruhu. Aren ondohowonen endebuhubon enesehelimu ap suwon raja oho in atuk lamuhup,” ibag.
17Ari ibagma Abraham ino orohole han kinangma sahung atfareg wenggel haruk lit, ”Ap indag tibag sali mo ilig am wirig am turukmen teng uhan 100 atukonen malik endebuk teg? Sara ino oho mondabi sabal 90 tahun atisireg nangginoho malik enderuhu?” ulug indimu inda yatuk latfag. 18Ari turuk lit Abraham inowen Allah hiyag utuk lit, ”Haren ehenon ari we Ismael eneg Abraham ubalmangge wereg ulug at ubam turuk laruhun,” ibagma 19Allahn te, ”Ari peruk lam fug! Huhe Sara inowen malik ap angge indag huruhumu unuk Ishak suwaluhun.#Ishak: Ibrani enele fam unuk Ishak ino men, inda yatisi urukon men ambi reg. Anden sali hubam emberuk lahiyon ari hikit toho hamloho men aren ondohowonen endebuhubon oho Anden fet enesugmen eneg welamuhup. 20Ismael fahet oho haren heng ehen ane ari hikit toho turuk laruhuk. Anden at ineyap tuhukmu aren ondohowonen endebuhubon anggolo amuhup. At ino ap ununggul unuk nisanggowen unumba welaruhumu aren enderuhuwonen endebuhubon arimano o pumbuk humon welamuhup angge famen 21Anden it Inikni welaruhuk ulug sali imbihiyon ari eneg we Ishak huhe Sara inowen indag huruhuwon fahet ihi. Mo ilig aruhureg wirig aruhumu at ino indag aruhu,” ibag. 22Ari obog toho hiyag itfareg Abraham embeselug libag.
23O ino sambil Abraham inowen Allahn hiyag itfag ane hikit toho amloho Ismael men amingmingangge ibamen indag atfahonet onggo paloho hilibahonet ap angge ibam welatfahon arimano obog toho enembilahap pal enepfag. 24-26Abraham ebe mondabi sabal 99 tahun atfagma amloho Ismael indag tibag sali mo ilig am wirig am turukmu nuwalen atfagma o misihim sambil ino eneg enembilahap pal eneptuk lit 27ap angge Abraham men ambiyeg welatfahon arimano oho obog toho enembilahap pal enepfag.
Избрани в момента:
KEJADIAN 17: YLI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
@ LAI 2018