यहुन्ना 5
5
अठतिस बौरशा रौ रोगी च़ांगौ कौरणौ
1इऊं बुशु बासिऐ यहुदिऊ लोगु रौ एक साज़ौ हुऔ, और यीशु यरुशलेम शहरा लै डैऔ। 2यरुशलेमा दी भेरी रै बौड़ै-दारा काऐ एक पाणी रौ ताल (सौर) आ ज़ेथलै इब्रानी बोली दी बैतसैदा बोलाई। तेसरी पांज़ देउड़ी ई (पांज़ बाटै थी ज़ो बौड़ै दारा बाशीऐ थी ज़ेथ माथै छ़ापर भी थौ)। 3इऊं धुरै दी भौरी बिमार, आखी रै शेड़ै, लौंगड़ै और शुकै औन्दै शरीरा रै (पाणी हिलणै री आशा दी तिऐ रौआ थै) 4कैलैकि खास बौगता दी सौरगदूत तेस सौरा दी उतरियौ पाणी हिलावा थै। पाणी हिलदी बारै ज़ुण-कुण पैहलै तेस सौरा दी डिया थौ ता सेऊ ठीक हुआ थौ च़ाऊ तेसदी केज़ी भी बिमारी कैलै ना औआ थी। 5तिऐ एक आदमी थौ, ज़ो एक बिऐ ठाहरा साला ओउलै बिमारी दी थौ पौड़ौ औन्दौ। 6यीशुऐ सेऊ पौड़ौ औन्दौ देखीयौ और इणौ ज़ाणियौ कि सेऊ भौरी दिना ओउलै आ एज़ी हालता दी पौड़ौ औन्दौ, तिणीऐ पुछ़ौ, “का तू ठीक हुणौ च़ाहा ई?” 7तिणी बिमार आदमीऐ तेसलै ज़वाब दैऔ, “ओ प्रभु, ज़ेबी पाणी हिला आ, ता मुं एस पाणी रै सौरा दी निणै वाल़ौ कोई नाईं। पर मैरै पहुंच़णै कु पैहलै दुजौ आदमी पाणी मांझ़िऐ डिया आ।” 8यीशुऐ तेसलै बोलौ, “उठ, आपणौ बिस्तरौ च़ुंग और आण्ड-फिर।” 9सेऊ आदमी खरकच़ार ठीक हुई गौ, और आपणै बिस्तरै च़ुंगियौ आण्डदै-फिरदै लागी गौ। 10सेऊ आरामा रौ दीन थौ। एथीलै यहुदी मुख्यै लोग तेसलै ज़ो ठीक हुऔ थौ, बोलदै लागै, “मुसा रै नियमा रै मुताबिक ताउंलै बिस्तरौ उठाउणौ ठीक नाईं।” 11तिणीऐ तिउंलै ज़वाब दैऔ, “ज़ुणिऐ हाऊं ठीक कियो ऊ, तिणीऐ मुलै बोलौ, ‘आपणौ बिस्तरौ च़ुंग, और आण्ड-फिर।’ ” 12तिंउऐ तेसकु पुछ़ौ, “सेऊ कुण आदमी आ, ज़ुणिऐ ताउंलै बोलौ, ‘बिस्तरौ च़ुंग, और आण्ड-फिर?’ ” 13पर ज़ुण आदमी ठीक हुई गौ थौ सेऊ भी नाईं ज़ाणा थौ कि मुं च़ांगौ कौरणै वाल़ै कुण आ?, कैलैकि सेज़ी ज़ागाह दी भौरी भीड़ हुणै री वज़ाह कु यीशु तिदरु डेई गौ थौ। 14इऊं बुशु बासिऐ सेऊ यीशु कु परमेश्वरा रै घौरा दी मिलौ। यीशुऐ तेसलै बोलौ, “देख, तू ठीक हुई गोई: दुजी बारै पाप ना कौरै, इणौ ना च़ांई हुऔ कि इणै कौरी ताउंलै कोई बौड़ी मुसीबत आशा।” 15तिणी आदमीऐ डेइयौ यहुदी स्याणेऊ लै बोली गौ कि ज़ुणिऐ हाऊं ठीक कियो ऊ सेऊ यीशु आ। 16एथ कौरी यहुदी यीशु सताउंदै लागै, कैलैकि सेऊ इणै काम आरामा रै दिना दी कौरा थौ। 17एथीई बुशा माथै यीशुऐ तिउंलै बोलौ, “परमेश्वर ज़ुण मैरौ बाब आ सेऊ सौदा काम कौरा आ, और मुंइऐ भी तिणी कौरणौ च़ांई।” 18यीशु री एज़ी बुशै शुणियौ यहुदी स्याणेउऐ तेस झ़ांगणा री भौरी कोशिश कौरदै लागै, कैलैकि तिणीऐ आरामा रै दिना रौ रिवाज़ चोड़ौ, और परमेश्वरा लै आपणौ बाब बोलीयौ आपुलै परमेश्वरा रै बराबर माना थौ।
छ़ोहरु रौ हक्क
19एथ माथै यीशुऐ तिउंलै बोलौ, “हाऊं तुमुलै सौच़्च़ौ-सौच़्च़ौ बोलाऊ, छ़ोहरु आपु ई कुछ़ नाईं कौरदौ, सिरफ सेऊ ज़ो बाब परमेश्वर कौरदै देखा आ। कैलैकि ज़ो-ज़ो काम बाब कौरा आ तिऊं काम छ़ोहरु भी तिणै कौरीऐ कौरा सा। 20पर बाब परमेश्वर छ़ोहरु आइलै प्यार छ़ाड़ा सा और ज़ो-ज़ो काम सेऊ आपु कौरा आ, तिऊं सारै काम तेसकै देखाल़ा आ। और सेऊ एथकु भी बौड़ै काम तेसकै देखाल़ा, ताकी तुमै हैरान हुआ। 21ज़िणौ बाब परमेश्वर मौरै औन्दै उठावा और तौंइऐ ज़िउंदै कौरा, तिणी ई छ़ोहरु भी ज़ास च़ाहा लौ तिऊं ज़िउंदौ कौरा आ। 22बाब परमेश्वर कासी रौ फैसलौ नाईं कौरदौ, पर फैसलै रौ सारौ हक्क छ़ोहरु कै सौंभाल़ी गौ आ, 23कि सारै लोग ज़िणौ बाब परमेश्वरा री इज़्ज़त कौरा ई, तिणी ई छ़ोहरु री भी इज़्ज़त कौरा। ज़ो छ़ोहरु री इज़्ज़त नाईं कौरदौ, सेऊ बाब परमेश्वरा री ज़ुणिऐ सेऊ भेज़ौ औन्दौ आ, इज़्ज़त नाईं कौरदौ। 24हाऊं तुमुलै सौच़्च़ौ-सौच़्च़ौ बोलाऊ, ज़ुण मैरौ वचन शुणियौ मैरै भेज़णै वाल़ै माथै विश्वास कौरा आ। सौदा री ज़िन्दगी तेसरी आ। तेसलै सौज़ा नाईं मिलदी नाईं औन्दौ। पर सेऊ मौरणै कु पार हुइयौ सौदा री ज़िन्दगी दी पहुंच़ी गौ आ।
25“हाऊं तुमुलै सौच़्च़ौ-सौच़्च़ौ बोलाऊ सेऊ बौगत आशा सा, और आबै आ, ज़ेथदी मौरै औन्दै आदमी परमेश्वरा रै छ़ोहरु री आवाज़ शुणा लै, और ज़ुण शुणा लै सै ज़िवा लै। 26कैलैकि ज़ेज़ी रीती कौरी बाब आपु दी ज़िन्दगी छ़ाड़ा सा, तिणी रीती कौरी तिणीऐ आपणै छ़ोहरु कै भी एऊ हक्क दैऔ आ कि आपु दी ज़िन्दगी छ़ाड़ा। 27और तेसकै दुनिया रै सारै लोगु रौ फैसलै कौरणै रौ हक्क भी दैऔ औन्दौ आ, एथीलै कि सेऊ आदमी रौ छ़ोहरु आ। 28इणै कौरी हैरान नाईं हुऔ। कैलैकि सेज़ौ बौगत आशा आ कि ज़ेती मौरै औन्दै ई सै तेसरी आवाज़ शुणियौ निकल़ियौ आशा ई। 29ज़ुणिऐ भौलाई आ कौरी ऐन्दी सै ज़िन्दगी दी दुजी बारै ज़िउणा लै उठाई, और ज़ुणिऐ आ बुराई कौरी ऐन्दी सै सौज़ा लै दुजी बारै ज़िउंदै हुआई।
यीशु रै बारै दी गवाही
30“हाऊं आपु कौरी कुछ़ नाईं कौरी बौल़दौ। ज़िणौ बाब परमेश्वरा कु शुणाऊ, तिणी ई लोगु रौ फैसलौ कौराऊ, और मैरौ फैसलौ सौच़्च़ौ आ, कैलैकि हाऊं आपणी मौरज़ी कौरी नाईं पर आपणै भेज़णै वाल़ै री मौरज़ी च़ाहा ऊ। 31अगर हाऊं आपु ई आपणी गवाही देऊ, ता मेरी गवाही सौच़्च़ी नाईं। 32एक ओर आ ज़ुण मेरी गवाही दिआ सा, और हाऊं ज़ाणाऊ कि ज़ुण मेरी गवाही दिआ आ, सै सौच़्च़ी आ। 33ज़ेबी तुमुऐ लोग यहुन्ना बपतिस्मौ दैणै वाल़ै काऐ मैरै बारै दी पुछ़णा लै भेज़ै ई और तिणीऐ सौच़्च़ाई री गवाही देई आ। 34पर हाऊं आपणै बारै दी आदमी री गवाही नाईं च़ांहादौ। तैबै भी हाऊं इऊं बुशै एथलै बोलाऊ कि तुमुलै छ़ुटकारौ मिला। 35यहुन्ना ता ज़ौल़दौ और च़मकदै दिवै ज़िणौ थौ, और तुमुलै कुछ़ बौगता झ़ांऊ तेसरै प्याशै दी मौगन हुणौ आच़्छ़ौ लागौ। 36पर ज़ो मुकै गवाही आ सै यहुन्ना री गवाही कु बौड़ी आ। कैलैकि ज़ो काम बाब परमेश्वरै मुकै पुरौ कौरना लै आ दैऔ औन्दौ मतलब ज़ो हाऊं कौराऊ, सै काम मैरै गवाह ई कि बाबा रै हाऊं भेज़ौ औन्दौ ऊ। 37और बाब ज़ुणिऐ हाऊं भेज़ौ औन्दौ ऊ, तिणीऐ मेरी गवाही देई आ, तुमुऐ ना केबी तेसरी हाक शुणी, ना तेसरौ रूप देखौ। 38और तेसरौ वचन मौना दी टेकाल़ी नाईं छ़ाड़दै, कैलैकि तुमै मैरौ विश्वास नाईं कौरदै ज़ुण परमेश्वरै भेज़ौ आ। 39तुमै पवित्रशास्त्रा दी लोड़ाई, कैलैकि सौमझ़ा ई कि तेथदी सौदा री ज़िन्दगी तुमुलै मिला आ। और एऊ पवित्रशास्त्र ई आ ज़ो मेरी गवाही दिया आ। 40तैबै भी तुमै सौदा री ज़िन्दगी पाइणा लै मुं काऐ आशणौ नाईं च़ांहदै। 41हाऊं लोगु कु इज़्ज़त नाईं च़ांहादौ। 42पर हाऊं तुमु ज़ाणाऊ कि तुमु दी परमेश्वरा लै प्यार नाईं। 43हाऊं आपणै बाब परमेश्वरा रै हक्का कौरीऐ ऊ आशौ औन्दौ, और तुमै मुं नाईं अपणाउंदै। अगर दुजौ कोई आपणै हक्का कौरी आशा, ता तेस तुमै अपणावा ई। 44तुमै मुं माथै विश्वास नाईं कौरदै कैलैकि तुमै दुजै कु इज़्ज़त च़ाहा ई और परमेश्वरा री इज़्ज़त तुमै नाईं कौरणौ अपणाउंदै ज़ो सिरफ सौच़्च़ै परमेश्वरा री तौरफा कु आ। 45इणौ नाईं ज़ाणौ कि हाऊं बाब परमेश्वरा काऐ तुमु दी आरोप ला ऊ। तुमु दी आरोप लाइणै वाल़ौ ता मुसा आ, ज़ास माथै तुमारै भरोसौ आ छ़ाड़ौ औन्दौ। 46कैलैकि अगर तुमै मुसा रौ विश्वास कौरा थै, ता मैरौ भी विश्वास कौरा थै, एथीलै कि तिणीऐ मैरै बारै दी लिखौ औन्दौ आ। 47पर अगर तुमै मुसा रै लिखी औन्दी बुशु माथै विश्वास नाईं कौरदै, ता मेरी बुशु माथै किणौ विश्वास कौरा ई?”
Избрани в момента:
यहुन्ना 5: BFZ-NT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
This work is licensed under Creative Commons Attribution-ShareAlike 4.0 License.