यहुन्ना 4
4
यीशु और सामरी ज़ाती री छ़ेउड़ी
1तैबै ज़ेबी प्रभु कै पौतौ लागौ कि फरीसीउऐ शुणी गौ कि यीशु यहुन्ना कु ज़ादै च़ेलै चाणा और बपतिस्मौ दिआ आ। 2पर यीशु आपु नाईं तेसरै च़ेलै बपतिस्मौ दिआ थै। 3तैबै सेऊ यहुदिया परदेशा छ़ाड़ियौ दुजी बारै गलीला परदेशा लै डैऔ, 4और तिऊं सामरीया परदेशा बाटीऐ डेउणौ ज़ुरुरी थौ। 5एथीलै सेऊ सामरीया परदेशा रै सूखार नावां रै शहरा दी आशौ, ज़ो सेज़ी ज़मीना काऐ आ ज़ो याकुबै आपणै छ़ोहरु युसुफा कालै देई थी। 6ज़ो कुंऔ याकुबै कोतौ थौ सेऊ कुंऔ भी तिऐ थौ। और यीशु बाटा ई हांडियौ खौड़ौ औन्दौ तेस कुंऐ काऐ बोशी गौ। एज़ी बूश दुसकै बौगता री आ।
7तेतिऐ एक सामरी छ़ेउड़ी पाणी भौरदै आशी। यीशुऐ तियांलै बोलौ, “मुलै पाणी पिलाऊ।” 8कैलैकि तेसरै च़ेलै इलाकै दी खाणै-पिणै री च़िज़ै खरीद दै थै डैऔ औन्दै। 9तिऐं सामरी छ़ेउड़ीऐ यीशु लै बोलौ, “तू यहुदी हुइयौ मुं सामरी छ़ेउड़ी कु पाणी कैलै मांगा ई?” कैलैकि यहुदी सामरिउ आइलै केज़ी भी च़िज़ा रौ वास्तौ नाईं छ़ाड़ा थै। 10यीशुऐ ज़वाब दैऔ, “अगर तू परमेश्वरा रै वरदान ज़ाणा थी, और इणौ भी ज़ाणा थी कि सेऊ कुण आ ज़ो ताउंलै बोला सा, ‘मुलै पाणी पिलाऊ’ ता तू तेसकु मांगा थी, और सेऊ ताउंलै ज़िन्दगी रौ पाणी दिआ थौ।” 11छ़ेउड़ीऐ तेसलै बोलौ, “ओ प्रभु, ताऊं कै पाणी भौरना लै ता कुछ़ आसतौ भी नाईं, और कुंऔ डुंगौ आ। तैबै सेऊ ज़िन्दगी रौ पाणी ताऊं कै किदरा कु आशौ आ? 12का तू आमारै पुराणै स्याणै याकुबा कु बौड़ौ ई, ज़ुणिऐ आमुलै एऊ कुंऔ दैऔ आ। और आपु ई आपणी सन्तान, और आपणै धौण-चाणा आइलै एथीई कु पिऔ?” 13यीशुऐ तियांलै ज़वाब दैऔ, “ज़ुण-कुण एज़ौ पाणी पिया आ सेऊ औज़ौ चिशौ हुआ आ, 14पर ज़ुण-कुण तेस पाणी कु पिया लौ ज़ो हाऊं तेसलै देउलै, सेऊ तैबै केबी भी चिशौ नाईं रौआ लौ। (ज़ेबी झ़ांऊ धौतरी रौआ ली) पर ज़ो पाणी हाऊं तेसलै देउलै, सेऊ तेसदी एक मूल़ बौणा आ ज़ो सौदा री ज़िन्दगी झ़ांऊ बौइंदै रौआ आ।” 15छ़ेउड़ीऐ तेसलै बोलौ, “ओ प्रभु, तेस पाणी मुलै दै ताकी हाऊं चिशौ नाईं रौऊ और ना पाणी भौरना लै एती दूर आशु।” 16यीशुऐ तिंया लै बोलौ, डेऊ, “आपणौ बोउटौ इदै औटाऊ।” 17छ़ेउड़ीऐ ज़वाब दैऔ, “कि हाऊं बिण बोउटै री ऊ।” यीशुऐ तियांलै बोलौ, “तू ठीक बोलाई, ‘ हाऊं बिण बोउटै री ऊ।’ 18कैलैकि तांई ऐ पांज़ बोउटै चाणी गौऐ ई, और ज़ास आदमी आइलै तू इबी ई सेऊ भी तैरौ बोउटौ नाईं आ एऊ तांइऐ सौच़्च़ौ ई बोलौ आ।” 19छ़ेउड़ीऐ यीशु लै बोलौ, “ओ प्रभु, मुकै लागा की तू भविष्यवक्ता ई। 20आमारै नाना बुड़ुऐ एज़ै धारा माथै आराधना की आ, और तुमै यहुदी बोलाई की सेज़ी ज़ागाह ज़िऐ आराधना कौरणी च़ांई यरुशलेमा दी आ”। 21यीशुऐ तियांलै बोलौ, “ओ बौइण, मेरी बुशु रौ विश्वास कर कि सेऊ बौगत आशणै वाल़ौ आ कि तुमै ना ता इऐं धारा माथै बाबा री आराधना कौरालै ना यरुशलेमा ई। 22तुमै सामरी लोग ज़ास नाईं ज़ाणदै, तेसरी आराधना कौरा ई और आमै यहुदी ज़ास ज़ाणी ई तेसी री आराधना कौरी ई। कैलैकि छ़ुटकारौ यहुदिऊ मांझ़िया कु आ। 23पर सेऊ बौगत आशा सा, और इबी भी आ, ज़ेथदी सौच़्च़ै भौगत बाबा री आराधना आत्मा और सौच़्च़ाई कौरी कौरा ई, कैलैकि बाब आपुलै इणै ई आराधना कौरणै वाल़ै लोड़ा आ। 24परमेश्वर आत्मा आ एथीलै ज़ुरुरी सा कि तेसरी आराधना कौरणै वाल़ै आत्मा और सौच़्च़ाई कौरी आराधना कौरा।” 25छ़ेउड़ीऐ तेसलै बोलौ, “हाऊं ज़ाणाऊ कि मसीह ज़ासलै ख्रिस्ट बोलाई, आशणै वाल़ौ आ। ज़ेबी सेऊ आशा लौ ता आमुकै सारी बुशै बोल़ा आ।” 26यीशुऐ तियांलै बोलौ, “हाऊं ज़ो ताऊं आइलै बोलदेऊ लागौ औन्दौ, सेऊ ऊ।”
च़ेलेऊ री वापसी
27तेतिऐ तेसरै च़ेलै आशी गौऐ, और हैरान हुऐ कि यीशु छ़ेउड़ी आइलै बुशै लाइंदै लागौ औन्दौ। तैबै भी कोइऐ ना पुछ़ौ, “तू का च़ाहा ई?” या “तिंया आइलै बुशै कैलै ला ई?” 28तैबै तिऐं छ़ेउड़ीऐ आपणौ पाणी रौ घौड़ौ तिऐ छ़ाड़ियौ इलाकै लै डेई गोई, और लोगु आइलै बोलदै लागी, 29“आशौ, एक आदमी देखौ, ज़ो कुछ़ मुंइऐ कियौ आ मुलै बोली गौ आ। हाऊं ता एस ज़ाणदौ भी नाईं का एऊ ता नाईं मसीह?” 30और सै गांवा कु निकल़ियौ यीशु काऐ आशदै लागै। 31एथरै बिच़ा दी तेसरै च़ेलेऊ ऐ यीशु कु इणी औरज़ कौरी, “ओ गुरु, कुछ़ खा एरी।” 32पर तिणीऐ तिऊं लै बोलौ, “मुं काऐ खाणा लै इणी रोटी आ ज़ास तुमै नाईं ज़ाणदै।” 33तैबै च़ेलेऊ ऐ आपु मांझ़िऐ बोलौ, “ज़ेबी आमै इदै नाईं थै तेबी का कुणिऐ गुरु लै कुछ़ खाणा लै आणौ आ?” 34यीशुऐ तिउंलै बोलौ, “मेरी रोटी एज़ी आ कि आपणै भेज़णै वाल़ै री मौरज़ी रै मुताबिक च़ालू और तेसरौ काम पुरौ कौरु। 35का तुमै इणौ नाईं बोलदै, ‘लौइणा लै इबी च़ार मिहनै ई पौड़ै औन्दै?’ देखौ, हाऊं तुमुलै बोलाऊ, आपणी आखी खोलियौ डोखरै दी नौदर लाऔ कि सै लौइणा लै आशी गौऐ। 36लौइणै वाल़ौ मज़दुरी पा आ और सौदा री ज़िन्दगी लै नाज़ कौठै कौरा आ, ताकी बौइणै वाल़ौ और लौइणै वाल़ौ दुइया मिलियौ खुशी मौनावा। 37कैलैकि इदै एज़ी काहवत ठीक बोशा आ: ‘बौइणै वाल़ौ ओर आ, और लौइणै वाल़ौ ओर।’ 38मुंइऐ तुमै एस डोखरै लौइणा लै भेज़ै ज़ासदी तुमुऐ मैहनत नाईं कि, दुज़ेऊ ऐ मैहनत की और तुमै तिउंरी मैहनता रै फल़ा दी साज़ी हुऐ।”
सामरिउ रै लोगु रौ विश्वास कौरणौ
39तेस इलाकै रै भौरी सामरिउऐ तिऐं छ़ेउड़ी री बुशै शुणियौ यीशु माथै विश्वास कियौ। कैलैकि तिआऐं यीशु रै बारै दी बोलौ थौ, “तिणीऐ भौरी कुछ़ ज़ो मुंइऐ कियौ आ, मुलै बोलौ आ।” 40एथीलै ज़ेबी सै सामरी तेस काऐ आशै, तैबै तेसकु औरज़ कौरदै लागै कि आमारै काऐ रौऔ। तैबै यीशु तिऐ दुई दिना झ़ांऊ रौ। 41तेसरै वचना शुणियौ तौंइऐ भी भौरी लौगुऐ विश्वास कियौ 42और तिऐं छ़ेउड़ी लै बोलौ, “ऐबै आमै तैरै बोलणै माथै विश्वास नाईं कौरदै। कैलैकि आमुऐ आपु ई शुणी गौ आ, और ज़ाणी गौ आ कि एऊ सौच़्च़ी धौतरी रौ छ़ुटकारौ कौरणै वाल़ौ आ।”
43तैबै तिऊं दुई दिना बासिऐ सेऊ तिदरा कु निकल़ियौ गलीला लै डैऔ, 44कैलैकि यीशुऐ आपु ई गवाही देई कि भविष्यवक्ता लै आपणै देशा दी इज़्ज़त नाईं मिलदी 45ज़ेबी सेऊ गलीला दी आशौ, ता गलीली खुशी कौरीऐ तेसकु मिलै। कैलैकि ज़ेती काम तिणीऐ यरुशलेमा दी साज़ै रै बौगता दी किऐ थै, तिंउऐ सै काम सब देखै थै, कैलैकि सै भी साज़ै दी थै डै औन्दै।
राज़ा आइलै कामा कौरणै वाल़ै रौ छ़ोहरु च़ांगौ कौरणौ
46तैबै सेऊ तौंइऐ गलील परदेशा रै काना गांवा दी आशौ, ज़िऐ तिणीऐ पाणी अंगुरा रौ रसा दी बौदल़ौ थौ। तिऐ राज़ै रौ एक नुकुर थौ ज़ासरौ छ़ोहरु कफरनहूम गांवा दी बिमार थौ। 47सेऊ इणौ शुणियौ कि यीशु यहुदिया कु गलीला दी आशी गौ आ, तेस काऐ डैऔ और तेसकु औरज़ कौरदै लागौ कि च़ाल मैरौ छ़ोहरु ठीक कर: कैलैकि सेऊ मौरणै वाल़ौ थौ। 48यीशुऐ तेसलै बोलौ, “ज़ेबी झ़ांऊ तुमै निशाण और नोखै काम नाईं देखाल़ै तेबी झ़ांऊ तुमै केबी भी विश्वास नाईं कौरालै।” 49राज़ा रै नुकरै तेसलै बोलौ, “ओ प्रभु, मैरै छ़ोहरु रै मौरणा कु पैहलै च़ाल।” 50यीशुऐ तेसलै बोलौ “डेऊ, तैरौ छ़ोहरु ज़िउंदौ आ।” तिणी आदमीऐ यीशु री बोली औन्दी बूश मानी एरी और डेई गौ। 51सेऊ बाटा ई थौ कि तेसरै साथी तेसकु आशीयौ मिलै और बोलदै लागै, “तैरौ छ़ोहरु ज़िउंदौ आ।” 52तिणीऐ तिऊंकु पुछ़ौ, सेऊ “केज़ै बौगतै आच़्छ़ौ हुंदै लागौ?” तिंउऐ तेसलै बोलौ, “ईज़ दुसकै एकी बाज़ै तेसरौ बुखार उतरी गौ।” 53तैबै तिणी छ़ोहरु रै बाबै ज़ाणी गौ कि एऊ सेज़ै बौगतै ठीक हुऔ ज़ेज़ै बौगतै यीशुऐ मुलै बोलौ, “तैरौ छ़ोहरु ज़िउंदौ आ,” और तिणीऐ और तेसरै सारै टौबरुऐ विश्वास कियौ। 54एऊ दुजौ च़मतकार थौ ज़ो यीशुऐ वापिस आशीयौ गलील परदेशा दी देखाल़ौ।
Избрани в момента:
यहुन्ना 4: BFZ-NT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
This work is licensed under Creative Commons Attribution-ShareAlike 4.0 License.