Kananet 45
45
I̱ye̱le̱k Yosevo gotonoggi ele
1Iróng zin Yosevo ngen a̱gga̱m zinin cinne orgene ci ol ne̱k aavtte imma nonno ke̱ do̱o̱k, kar enne kegereny, “Anyik ol do̱o̱k koot, iróng korongi kicin e̱e̱t imma ngu̱me̱ cinanni!” I̱llo̱i̱ zin da̱ e̱e̱t imma olle cik Masiro baling i̱ye̱le̱k Yosevo ele cinne gotonoggi. 2Kar zin enne ku̱tu̱lu̱ oroot kiziyet olli Masiro nonno, kar olli ce̱e̱z ci alaan kiziyet zoz neci.
3Izek zin Yosevo gotonoggi ne, “Ke̱e̱ni̱ anna Yosevo! Ngen baba aruge?” Ma̱i̱je̱ gotonoggja iróng ngen obodik nonno, eci nege a̱bba̱ri̱te̱t zo̱ze̱ cinne.
4Izek zin Yosevo gotonoggi ne, “I̱vi̱ta̱ ojonun ngatinanni.” Baling u̱tu̱gu̱zzo̱ nege niko, ize enne ne, “Ke̱e̱ni̱ anna gotonnu cunno̱ng wa een Yosevo bali uteku olli Masiro ke̱. 5Imma i̱yo̱ko̱, ma ngen o̱ngo̱o̱li̱nnu̱, ma aburnnu nong e̱le̱tti̱ne̱ cuggo̱k zo̱ze̱ bali utekang niga annit ngintu ke̱, eci Ta̱mu̱ta̱dde̱n ci orong keelaweta zo̱ze̱ ci i̱tto̱na̱na̱ enne annit ki̱ki̱ya̱ ngintu o̱o̱we̱ cunno̱ng. 6Eci izeto e̱rki̱nya̱ rama cik adahe lo̱o̱c magiz, kar e̱rki̱nya̱i̱ cik een tu̱r ko̱ i̱llo̱i̱ atin e̱e̱vi̱ne̱t ki te̱di̱ne̱t labi. 7Abarik Ta̱mu̱ta̱dde̱n i̱tto̱na̱na̱ annit ki̱ki̱ya̱ o̱o̱we̱ cunno̱ng kar ki̱ki̱ya̱ kidiman lo̱o̱c ci ovvo niga abakku kar keela ruget cunno̱ng ngati ogone zoz ci a̱ddi̱ki̱re̱ ko̱.
8“Kar zin, iróng een i̱ge̱t cik i̱tto̱na̱na̱ng annit rok ngintu, abarik Ta̱mu̱ta̱dde̱n. Aanya enne annit kize be̱e̱ti̱ alaano, ke̱e̱ni̱ ddi̱ki̱ryo̱i̱t ci ka̱gga̱mi̱ kaal cik ce̱e̱z cinne do̱o̱k kar kabal olli Masiro do̱o̱k. 9I̱yo̱ko̱ i̱yi̱he̱t oot ngati baba, kar izettek nonno ne, ‘Icu zoz ci a̱du̱wa̱ ngerunne Yosevo azi ne: Aanya Ta̱mu̱ta̱dde̱n kize ddi̱ki̱ryo̱i̱t ci kabali lo̱o̱c ci Masiro do̱o̱k. I̱vi̱tta̱ng annit ngatu, ma aavtiyyu u̱u̱mu̱c. 10Ovvo atin niga abakku lo̱o̱ce̱ ci Gosheni kar ka̱vvu̱t ojonun ki annita, dooli ciggo̱k ki dooli cigge̱k, ki kaal cik anyakku niga do̱o̱k. 11Ka̱a̱nyu̱ng atin anna i̱ge̱t da̱i̱ne̱t nginati, eci ngen magiz adak lo̱o̱c e̱rki̱nya̱ tu̱r. Ming iróng ogonnu go̱o̱le̱ necu ovvo niga ki ol cik ce̱e̱zi̱ cuggo̱k do̱o̱k apirnannu.’
12“Icinnet niga bu̱k e̱le̱tti̱ne̱ cuggo̱k, kar rok gotona Benjamin bu̱k ming een annit Yosevo ci kozozikkung utuge cinanni ko̱. 13U̱du̱ktta̱k baba ti̱ri̱ze̱ne̱t ci ogonika ol annit Masire ngatu ki kaal do̱o̱k cik icinntu niga eberene. Kar anyaktta baba ngintu ataman.”
14Atadek zin enne azzin i̱i̱nya̱ ci gotononi Benjamin kar ku̱tu̱lu̱, kar Benjamini ka̱gga̱m nonno, u̱tu̱lu̱ enne bu̱k. 15Kar zin Yosevo kizza gotonoggi do̱o̱k kar ku̱tu̱lu̱we̱k nogo.
Utu alaani ci Masiro Ya̱ko̱bo̱ ki dooli
16Baling u̱zu̱cca̱ kaviyaha cik a̱vvu̱nne̱ gotonoggi Yosevo ce̱e̱z ci alaan ci Masiro, atalne da̱ alaani ki lo̱ddi̱ki̱re̱ ciginnek do̱o̱k. 17A̱nne̱k zin enne Yosevo ne, “Du̱wa̱k gotonoggu, ‘U̱tu̱gu̱z zoz cu: Anyik kodongtek labi zi̱gi̱re̱ kar i̱mi̱rrte̱ koot lo̱o̱ce̱ ci Kanaani, 18kar kanyakta be̱e̱ti̱nno̱ng ki ngaai cuggo̱k ki dooli kar o̱bo̱dda̱ng annita. Ka̱a̱nyu̱ng atin anna lo̱o̱c ci abunna Masire kar adait bunnat ci lo̱o̱c cu.’
19“Ka̱nne̱ki̱ zin i̱nne̱t ne du̱wa̱k nogo zoz cu, ‘U̱tu̱gu̱z zoz cu: O̱o̱tte̱ toromile wagon a̱gu̱ru̱t zi̱gi̱re̱ Masire ko̱ kar oot odongtai dooli ki ngaai cuggo̱k, kar anyaktta be̱e̱ti̱nno̱ng kar i̱vi̱ta̱. 20Ma i̱no̱nnu̱ zoz ci i̱jjo̱ cuggo̱k, eci i̱jjo̱ wak a̱zi̱ze̱ Masire ko̱ do̱o̱k ovvo atin e̱e̱ggi̱n cuggo̱k.’”
21U̱tu̱gu̱zzo̱ zin logoz cik Israilo zoz necu. Aanyik Yosevo nogo toromilet wak a̱gu̱ru̱t zi̱gi̱re̱ ko̱, ki baling a̱du̱wa̱ alaani ke̱, kar enne bo̱do̱k kaanyik nogo da̱i̱ne̱t cik ovvo nege adak goola. 22Aanyik bo̱do̱k enne nogo do̱o̱k co̱de̱ co̱de̱ ru̱u̱m ci een jor, ma̱i̱je̱ Benjamin aanyik enne o̱ro̱bi̱ya̱ ziik obet i̱i̱yo̱ (300) ki ru̱u̱ma̱ni̱ tu̱r cik een nge̱ju̱we̱. 23Iciko kaal cik i̱tto̱ni̱k enne baatinne: zi̱gi̱re̱ cik e̱e̱ggi̱n omoto cik a̱ti̱k kaal cik a̱zi̱ze̱ do̱o̱k Masire, ki bo̱do̱k zi̱gi̱re̱ cik nga̱a̱ye̱k omoto odong labi ki umunet ki kaal cik ovvo nege adak goola. 24Kar zin enne ki̱nya̱ma̱ne̱k gotonoggi gool, baling ovvo nege ovvo, a̱nne̱k enne nogo ne, “Ma adangonu goola!”
25Itingazzo zin Masire oot olo ngati be̱e̱ti̱nne̱ng Ya̱ko̱bo̱ lo̱o̱ce̱ ci Kanaani. 26U̱du̱kta̱k zin be̱e̱ti̱nne̱ng izettek ne, “Ngen Yosevo aruge! Een enne e̱e̱t ci abal Masir do̱o̱k.” U̱ku̱le̱k zin Ya̱ko̱bo̱ je̱e̱n; iróng zin enne elemi zoz cinne̱ng. 27Ma̱i̱je̱ baling u̱du̱ktta̱k nege nonno kaal balik a̱du̱wa̱k Yosevo nogo ke̱ do̱o̱k, kar baling okko enne acin toromilet balik i̱tto̱na̱ Yosevo kar kodonga atin nonno ke̱, ubunna zin vongizi ci be̱e̱ti̱nne̱ng Ya̱ko̱bo̱. 28Kar zin Israili kize ne, “Kelema anna zoz necu! Ngen ngeranni Yosevo aruge. Kokko atin anna kacinni nonno ming ngen ka̱da̱u̱.”
Избрани в момента:
Kananet 45: tex
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018, Wycliffe Bible Translators, Inc. All rights reserved.