Kananet 44
44
Uduc ci een zi̱i̱t lo̱da̱
1I̱yo̱ko̱ erecanek zin Yosevo du̱ca̱i̱t ci ce̱e̱z cinne zoz cu: “Bizitan lodet cik logoz ne̱ko̱ labi cik gon ette ngenngene uule ki̱ti̱k, kar zin bodehe o̱ro̱bi̱ya̱ cik ngenngene lo̱do̱ utug. 2Kar zin arik uduc wananni gon kaudene een zi̱i̱t ko̱ lo̱do̱ ci ṯu̱ṯu̱re̱ni̱t wanne̱ng ki o̱ro̱bi̱ya̱ bu̱k.” Kar enne ku̱tu̱gu̱ zoz neci ki bali ming a̱du̱wa̱k Yosevo nonno ke̱.
3Baling ize looci nge̱rre̱ti̱n, i̱nya̱ma̱nte̱k zin nege ol ne̱ke̱ ki zi̱gi̱re̱ cigge̱k gool. 4Ngen nege koot reena o̱rge̱ neci ming a̱du̱wa̱k Yosevo du̱ca̱i̱t cinne ne, “Abunna ming annu ol ne̱ke̱ lak co̱de̱, kar ming umuda nogo, izek ne, ‘Nya ming a̱ru̱kku̱ nga̱bo̱lo̱ ci zoz ci abunna zo̱ze̱ ci gerze ko̱? 5Iróng neci een uduc wa audene ddi̱ki̱ryo̱i̱ti̱ cinanne kar bo̱do̱k ku̱ru̱we̱ agura? Een necu zoz ci gerze ogonnu niga ko̱.’”
6Baling umuda du̱ca̱i̱ti̱ nogo goola, u̱du̱wa̱k zin enne nogo zoz bali a̱du̱wa̱k Yosevo ke̱ ele. 7Ma̱i̱je̱ nege a̱nne̱k nonno ne, “Nya ming a̱du̱wa̱ ddi̱ki̱ryo̱i̱ti̱ zoz ci ogon niko ko̱? Iróng wo̱ye̱ du̱cca̱ha̱ cigunnek ogon kaal cik ogon ki ne̱ko̱! 8Kobodayya abarik naga i̱nne̱t lo̱o̱ce̱ ci Kanaani o̱ro̱bi̱ya̱ balik karubakka lodet cigga̱c ke̱. Nya wo̱ye̱ ming kogoroz naga o̱ro̱bi̱ya̱ icima dhahab ce̱e̱ze̱ ci ddi̱ki̱ryo̱kto̱? 9Ming anyak e̱e̱ti̱ imma uduc ci ddi̱ki̱ryo̱kto̱ du̱ca̱he̱ cigunnek ko̱, anyik nonno ka̱da̱k; kar naga do̱o̱k kizetta du̱cca̱k cik ddi̱ki̱ryo̱i̱t cinna.”
10Ize zin enne ne, “Abunna oroot, anyik ku̱tu̱gu̱ ki ming a̱du̱wa̱nnu̱ niga ko̱. Okko e̱e̱t ci amudai uduci ngatinne ko̱, okko atin enne een du̱ca̱i̱t cinanni; iróng atin ol anganyung i̱ge̱t do̱o̱k.”
11I̱ti̱ye̱k ngenngene lo̱do̱ cinne lo̱o̱c ataman kar zin koog. 12Akate zin du̱ca̱i̱ti̱ ereny lodet ne̱ke̱ do̱o̱k, akane ngati e̱e̱t wa a̱ddi̱ki̱re̱ kedecak ngati lo̱gu̱t wa dici. Umudai zin uduci neci lo̱de̱ ci Benjamini. 13Baling umudai uduci, erecit zin nege ru̱u̱ma̱ni̱ cigge̱k. Kar zin kodongtek kaal zi̱gi̱re̱ i̱mi̱rrte̱ oot orgato.
14Ngen da̱ Yosevo aave ce̱e̱za̱ baling okko Ju̱da̱ ki gotonoggi i̱i̱zo̱ ce̱e̱z, kar zin ku̱ju̱kte̱k e̱le̱tti̱ lo̱o̱c ngati Yosevo. 15Izek Yosevo nogo ne, “Nya ci da̱ u̱tu̱gu̱zzu̱ niga? Iróng niga a̱gga̱yyu̱ e̱e̱t ci ogon ki anna ming karuba kaal go̱o̱le̱ ci ka̱ru̱we̱ agura?”
16O̱bo̱de̱k zin Ju̱da̱, “Ka̱nne̱k wo̱ye̱ naga ddi̱ki̱ryo̱i̱t cinanni nya? Kogon wo̱ye̱ naga e̱le̱tti̱ kizetta ol cik abunna ku̱? I̱ye̱la̱ Ta̱mu̱ta̱dde̱n ba̱ci̱ ci du̱cca̱k cigunnek. Kizetta naga du̱cca̱k cik ddi̱ki̱ryo̱i̱t cinna, naga e̱le̱tti̱ne̱ ki e̱e̱t wanai amudai anyak uduc ke̱.”
17Ma̱i̱je̱ Yosevo ize ne, “Iróng wo̱ye̱ anna kogonni gi̱i̱ ci ibil ki necu udut! Okko e̱e̱ti̱ wa a̱gga̱me̱k du̱ca̱i̱ti̱ cinanne uduc ngatinne ke̱ do̱ ci atin een du̱ca̱i̱t cinanni. Imma niga do̱o̱k, i̱mi̱rrte̱ oot ngati be̱e̱ti̱nno̱ng yahe.”
18Uk zin Ju̱da̱ ngati Yosevo kar zin kizek ne, “Manyi bai, anyik bai da̱ du̱ca̱i̱t cunne ku̱du̱wa̱i̱ zoz cidici. Ma omoze ngati du̱ca̱i̱t waunne, ming nu̱nu̱n atubonu i̱nna̱ ki alaan ele ko̱. 19I̱jji̱n zin manyi cinanne du̱cca̱k ciginnek, ‘Anyakku niga be̱e̱ti̱nno̱ng icima gotonnu imma?’ 20Kar zin naga ba̱li̱ye̱ ka̱nne̱ki̱ ne, ‘Kanyakka be̱e̱ti̱nna̱ng ci anyata, ki ngerinne cidici a̱rri̱ta̱ ngati izewe enne ma̱ti̱yo̱c. A̱da̱k zin ba̱li̱ye̱ gotoniya bali a̱ddi̱ki̱re̱ ke̱, ize nonno do̱ ngati yaatinne kar bo̱do̱k baatinne kirez nonno oroot.’
21“A̱nne̱kke̱t zin i̱nna̱ agit ba̱li̱ye̱ ne, ‘Anyaktta nonno rok ngintu kar kicin nonno eberene cigannik.’ 22Ka̱nne̱ka̱ zin bali manyi cinanne ne, ‘Iróng la̱du̱n lo̱gu̱t neci ungnek baatinne lo̱o̱c; ming utungek enne nonno lo̱o̱c, okko atin baatinne a̱da̱i̱.’ 23Ma̱i̱je̱ i̱nna̱ a̱nne̱k du̱cca̱k cigunnek ne, ‘Ming iróng gotonnu cunno̱ng cidici ko̱ a̱kku̱ rok annita, iróng atin ngen acinnu ngu̱m cinanni udut.’ 24Baling ko̱o̱tta̱ rok du̱ca̱i̱t cunne be̱e̱ti̱nna̱ng, ku̱du̱kta̱ zin naga nonno zoz bali u̱du̱wa̱ i̱nna̱ manyi cinanne ke̱ do̱o̱k.
25“Ize zin be̱e̱ti̱nna̱ng ne, ‘I̱mi̱rrte̱ rok Masir oot u̱tu̱yya̱ da̱i̱ne̱t u̱gge̱.’ 26Ma̱i̱je̱ naga kizeteyya nonno ne, ‘Iróng naga kalucena kovvoya nginati. Ming korkorya ki gotonet wa dici ko̱, kar atin i̱nna̱ inyet gool ci kovvoya. Iróng atin naga kacin ngu̱m ci e̱e̱t neci ming iróng naga kovvoye ki gotonet wa dici ko̱.’
27“A̱nne̱kke̱t be̱e̱ti̱nna̱ng du̱ca̱i̱ti̱ cunne ne, ‘A̱gga̱yyu̱ niga a̱rri̱ta̱ka̱ ba̱li̱ye̱ ngaa cinanne Racheli logoz rama niko. 28Uk co̱de̱ reena ngatinanni, kar anna kizek ne, “Adait i̱yo̱ko̱ da̱ elegje ele cinne.” Ngen zin anna bo̱do̱k kicin nonno udut. 29Ming ovvoyyu niga ngeranni cu bu̱k, kar gi̱i̱ imma ki̱ta̱k nonno, adawekang atin niga annita lo̱o̱k ngati kamati.
30“I̱yo̱ko̱ zin, ming iróng do̱le̱c orkor ki agit ming kokko anna ngati baba du̱ca̱i̱t cunne kar ming okko baba wa irez do̱le̱c oroot baize cinne, 31acin ming iróng do̱le̱c aruge, okko atin enne a̱da̱i̱. Kovvo naga du̱cca̱ha̱ cigunnek kanyikka be̱e̱ti̱nna̱ng ci ize ma̱ti̱yo̱c kuk lo̱o̱wa̱ ngati omozine oroot. 32Ku̱du̱wa̱ anna du̱ca̱i̱ti̱ cunne baba kazunne atin anna do̱le̱c. Ka̱nne̱k ne, ‘Ming iróng anna kobodane do̱le̱c rok i̱nne̱ta̱, kelema atin anna zoz ci anganya i̱nna̱ annita, baba, baize cinanni do̱o̱k!’
33“I̱yo̱ko̱ zin, manyi cinanni, inya bai annit du̱ca̱i̱t cunne ka̱vvu̱ ngatu kize du̱ca̱i̱t cunne, karagiz nginti do̱le̱co̱, kar anyik do̱le̱c ki̱mi̱re̱ korkorrit ki gotonoggi. 34Kokko wo̱ye̱ anna rok baba ku̱, ming iróng anna kanyai ki do̱le̱c? I̱llo̱i̱! Ma aanya kicin matiz ci atin a̱kku̱na̱k baba.”
Избрани в момента:
Kananet 44: tex
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018, Wycliffe Bible Translators, Inc. All rights reserved.