JUAN 4
4
Si Jesus kag ang Babaying Samariahanon
1Karon sang nahibaloan sang Ginoo nga ang mga Fariseo nakabati nga si Jesus nagahimo kag nagabautiso sing madamu pa nga gintoton-an sang kay Juan 2(bisan indi si Jesus gid ang nagabautiso, kondi ang iya mga gintoton-an), 3ginbayaan niya ang Judea kag nagpakadto liwat sa Galilea. 4Kinahanglan sia mag-agi sa Samaria. 5Gani nag-abut sia sa isa ka banwa sang Samaria, nga gintawag Sicar, malapit sa isa ka puna nga duta nga ginhatag ni Jacob sa iya anak nga si Jose.#Gen. 33:19; Jos. 24:32. 6Ang bobon ni Jacob yadto didto, kag gani si Jesus, nga nalapyo sang iya panlakatan, naglingkod sa luyo sang bobon. Mga ikan-um nga takna sadto.
7May nag-abut nga babaying Samariahanon sa pagsag-ub sing tubig. Si Jesus nagsiling sa iya, “Paimna ako.” 8Kay ang iya mga gintoton-an nagkadto sa banwa sa pagbakal sing kalan-on. 9Ang babaying Samariahanon nagsiling sa iya, “Paano bala nga ikaw, nga Judio, nagapangayo sa akon nga mainum, nga ako isa ka babaying Samariahanon?” Kay ang mga Judio wala nagahisayo sa mga Samariahanon.#Esd. 4:1-5; Neh. 4:1-2. 10Si Jesus nagsabat sa iya, “Kon ikaw nakakilala sang dolot sang Dios, kag kon sin-o sia nga nagasiling sa imo, ‘Paimna ako,’ nagpangayo ka kuntani sa iya, kag sia magahatag sa imo sing tubig nga buhi.” 11Ang babayi nagsiling sa iya, “Ginoo, wala ikaw sing itimba, kag ang bobon madalum; diin bala ikaw magakuha sinang tubig nga buhi? 12Daku ka pa bala sa amon amay nga si Jacob, nga naghatag sa amon sang bobon, kag sia gid nag-inum sa sini, kag ang iya mga anak, kag ang iya kahayupan?” 13Si Jesus nagsabat sa iya, “Ang tagsatagsa nga nagainum sining tubig uhawon liwat, 14apang ang bisan sin-o nga nagainum sang tubig nga akon ihatag sa iya indi na gid pag-uhawon; ang tubig nga akon ihatag sa iya mangintuburan sa sulud niya nga nagaibwal sa kabuhi nga walay katapusan. 15Ang babayi nagsiling sa iya, “Ginoo, hatagi ako sining tubig, agud nga indi ako pag-uhawon, ukon magkari diri sa pagsag-ub.”
16Si Jesus nagsiling sa iya, “Lakat, tawga ang imo bana, kag magbalik diri.” 17Ang babayi nagsabat sa iya, “Wala ako sing bana.” Si Jesus nagsiling sa iya, “Nagsiling ikaw sing husto, ‘Wala ako sing bana’; 18kay may lima ka na ka bana, kag ang yara sa imo karon indi imo bana; ini nasiling mo sing matuud.” 19Ang babayi nagsabat sa iya, “Ginoo, ginahantup ko nga ikaw manalagna. 20Ang amon mga ginikanan nagsimba sa sining bukid; kag kamo nagasiling nga sa Jerusalem amo ang duug diin ang mga tawo dapat magsimba.” 21Si Jesus nagsiling sa iya, “Babayi, magtoo ka, ang takna nagaabut nga indi sa sining bukid ukon sa Jerusalem magasimba kamo sa Amay. 22Kamo nagasimba sang wala ninyo mahibaloi; kami nagasimba sang amon nahibaloan, kay ang kaluwasan gikan sa mga Judio. 23Apang ang takna nagaabut, kag karon amo na, nga ang matuud nga mga manugsimba magasimba sa Amay sa espiritu kag kamatooran, kay ang Amay nagapangita sing subong nga mga manugsimba sa iya. 24Ang Dios espiritu, kag ang mga nagasimba sa iya kinahanglan magsimba sa espiritu kag kamatooran.” 25Ang babayi nagsabat sa iya, “Nakahibalo ako nga ang Mesias nagakari (sia nga ginatawag Cristo); kon sia mag-abut, magapahayag sia sa aton sang tanan nga butang.” 26Si Jesus nagsiling sa iya, “Ako nga nagapakighambal sa imo amo sia.”
27Niyan nag-abut ang iya mga gintoton-an. Natingala sila nga nagapakighambal sia sa isa ka babayi, apang wala sing nagsiling, “Ano bala ang luyag mo?” ukon, “Ngaa bala nagapakighambal ka sa iya?” 28Gani ginbayaan sang babayi ang iya tibud, kag nagkadto sa banwa, kag nagsiling sa katawohan, 29“Kari kamo, tan-awa ang tawo nga nagsugid sa akon sang tanan nga butang nga nahimo ko. Amo ayhan ini ang Cristo?” 30Naggowa sila sa banwa kag nagkadto sa kay Jesus.
31Sa sadtong tion ang mga gintoton-an nagpakilooy sa iya, nga nagasiling, “Rabbi, kaon ka.” 32Apang nagsabat sia sa ila, “May kalan-on ako nga wala ninyo mahibaloi.” 33Gani ang mga gintoton-an nagsinilingay, “May nagdala ayhan sa iya sing kalan-on?” 34Si Jesus nagsiling sa ila, “Ang akon kalan-on amo ang paghimo sang kabubut-on sang nagpadala sa akon, kag ang pagtuman sang iya buluhaton. 35Wala bala kamo nagasiling, ‘May apat pa ka bulan, niyan mag-abut ang ani’? Nagasiling ako sa inyo, bayawa ang inyo mga mata, kag lantawa ang kaumhan nga maputi na nga alanyon. 36Ang nagaani nagabaton sing mga sohol, kag nagatipon sing bunga tungud sa kabuhi nga walay katapusan, agud nga ang nagasab-ug kag ang nagaani magkalipay sing tingub. 37Kay sa sini matuud ang ginasiling, ‘Ang isa nagasab-ug kag ang isa nagaani.’ 38Ako nagpadala sa inyo sa pag-ani sang wala ninyo pagpangabudlayi; iban ang nagpangabudlay, kag kamo nagsulud sa ila kinabudlayan.”
39Madamu sang mga Samariahanon sa sadtong banwa ang nagtoo sa iya bangud sang pagpamatuud sang babayi, “Sia nagsugid sa akon sang tanan nga nahimo ko.” 40Gani sang nag-abut sa iya ang mga Samariahanon, nagpakilooy sila sa iya sa pagpabilin sa ila; kag nagpabilin sia didto sing duha ka adlaw. 41Kag madamu pa gid ang mga nagtoo bangud sang iya polong. 42Nagsiling sila sa babayi, “Karon nagatoo kami indi bangud sang imo hambal, kay kami gid nakabati, kag nakakilala nga ini amo gid ang Manluluwas sang kalibutan.”
Si Jesus Nagaayo sang Anak sang Tawong Dungganon
43Sa tapus ang duha ka adlaw naghalin sia didto pakadto sa Galilea. 44Kay si Jesus gid nagpamatuud nga ang manalagna walay kadungganan sa iya kaugalingon nga duta.#Mat. 13:57; Mar. 6:4; Luc. 4:24. 45Gani sang nag-abut sia sa Galilea, ang mga Galileanhon nagbaton sa iya, kay nakita nila ang tanan nga nahimo niya sa Jerusalem sa piesta,#Juan 2:23. kay sila man nagkadto sa piesta.
46Busa nagkadto sia liwat sa Cana sa Galilea, diin ginhimo niya nga alak ang tubig.#Juan 2:1-11. Kag sa Capernaum may tawo nga dungganon nga ang iya anak nga lalaki nagmasakit. 47Sang pagkabati niya nga si Jesus nag-abut sa Galilea gikan sa Judea, nagkadto sia sa iya kag nagpakilooy nga magdolhog sia kag ayohon ang iya anak, kay nagahimumugto sia. 48Busa si Jesus nagsiling sa iya, “Kon indi kamo makakita sing mga tanda kag mga kalatingalahan indi kamo magtoo.” 49Ang tawo nga dungganon nagsiling sa iya, “Ginoo, dolhog na sa wala pa mapatay ang akon bata.” 50Si Jesus nagsabat sa iya, “Lakat ka; ang imo anak magakabuhi.” Ang tawo nagtoo sang polong nga ginsiling ni Jesus sa iya kag naglakat sia. 51Sang nagadolhog na sia, ginsugata sia sang iya mga ulipon nga nagsugid nga ang iya bata nagakabuhi. 52Gani nagpangusisa sia sa ila sang takna nga nagsugud sia sa pag-ayo, kag nagsiling sila sa iya, “Kahapon sa ikapitong takna nagbiya sa iya ang hilanat.” 53Nahibaloan sang amay nga amo yadtong takna sang pagsiling ni Jesus sa iya, “Ang imo anak magakabuhi”; kag sia gid nagtoo, kag ang bug-os niyang panimalay. 54Ini amo ang ikaduha na nga tanda nga ginhimo ni Jesus sang nakagowa sia sa Judea pa Galilea.
Избрани в момента:
JUAN 4: ABHIL82
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ang Biblia ©1982 Philippine Bible Society