JUAN 3
3
Si Jesus kag si Nicodemo
1Karon may isa ka tawo sang mga Fariseo, nga ginhingalanan si Nicodemo, isa ka manugdumala sang mga Judio. 2Sia nagkadto kay Jesus sa kagab-ihon kag nagsiling sa iya, “Rabbi, nahibaloan namon nga ikaw manunudlo gikan sa Dios; kay walay isa nga makahimo sining mga tanda nga imo ginahimo, kon indi ang Dios kaupud niya.” 3Si Jesus nagsabat sa iya, “Sa pagkamatuud, sa pagkamatuud, nagasiling ako sa imo, kon ang isa indi matawo liwat, indi sia makakita sang ginharian sang Dios.” 4Si Nicodemo nagsiling sa iya, “Paano bala ang pagkatawo sang tawo kon sia tigulang na? Makasulud bala sia sa makaduha sa tiyan sang iya iloy kag matawo?” 5Si Jesus nagsabat, “Sa pagkamatuud, sa pagkamatuud, nagasiling ako sa imo, kon ang isa indi matawo sa tubig kag sa Espiritu, indi sia makasulud sa ginharian sang Dios. 6Ang natawo sa unud unud kag ang natawo sa Espiritu espiritu. 7Indi ka matingala nga nagasiling ako sa imo, ‘Kinahanglan kamo matawo liwat.’ 8Ang hangin nagahuyup sa diin ang buut niya, kag mabatian mo ang iya tingug, apang indi mo mahibaloan sa diin sia nagahalin ukon sa diin nagapakadto; subong man ang tagsatagsa nga natawo sa Espiritu.” 9Si Nicodemo nagsabat sa iya, “Paano bala ang pagkahimo sini?” 10Si Jesus nagsabat sa iya, “Ikaw bala isa ka manunudlo sang Israel, apang wala ka makahangup sini? 11Sa pagkamatuud, sa pagkamatuud, nagasiling ako sa imo, kami nagahambal sang amon nahibaloan, kag nagasaksi sang amon nakita; apang wala kamo magbaton sang amon panaksi. 12Kon nagsugid ako sa inyo sang mga butang nga dutan-on kag wala kamo magtoo, paano bala ang pagtoo ninyo kon maghambal ako sa inyo sang mga butang nga langitnon? 13Walay nakasaka sa langit kondi ang nanaug gikan sa langit, ang Anak sang tawo [nga yara sa langit]. 14Kag subong nga si Moises nagbayaw sang man-ug sa kamingawan,#Num. 21:9. kinahanglan man pagbayawon ang Anak sang tawo, 15agud nga ang bisan sin-o nga magtoo sa iya may kabuhi nga walay katapusan.”
Ginahigugma Gid sang Dios ang Kalibutan
16Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agud nga ang bisan sin-o nga magtoo sa iya indi mawala kondi may kabuhi nga walay katapusan. 17Kay ang Dios wala magpadala sang Anak sa kalibutan sa pagtagudili sang kalibutan, kondi nga ang kalibutan maluwas paagi sa iya. 18Ang nagatoo sa iya wala ginatagudilii; ang wala nagatoo natagudilian na, bangud nga wala sia magtoo sa ngalan sang bugtong nga Anak sang Dios. 19Kag amo ini ang paghukom, nga ang kapawa nagkari sa kalibutan, kag ang mga tawo naghigugma sang kadudulman labi sa kapawa, kay ang ila mga buhat malaut. 20Kay ang tagsatagsa nga nagabuhat sang malaut nagadumut sang kapawa, kag wala nagapalapit sa kapawa, basi kon ang iya mga buhat magdayag. 21Apang ang nagabuhat sang kamatooran nagapalapit sa kapawa, agud nga ang iya mga buhat mapahayag nga napanghimo sa Dios.
Ang Abyan sang Nobyo
22Sa tapus sini si Jesus kag ang iya mga gintoton-an nagkadto sa duta sang Judea: didto nagpabilin sia kaupud nila kag nagbautiso. 23Si Juan nagabautiso sa Enon malapit sa Salim, kay didto may madamung tubig; kag nag-abut ang katawohan kag ginbautisohan. 24Kay si Juan wala pa masulud sa bilanggoan.#Mat. 14:3; Mar. 6:17; Luc. 3:19-20.
25Karon may pagpinuyasay sa mga gintoton-an ni Juan kag sa isa ka Judio nahanungud sa pagpaninlo. 26Kag nagkadto sila kay Juan, kag nagsiling sa iya, “Rabbi, ang nag-upud sa imo sa unhan sang Jordan, nga sa iya nagsaksi ka, yari sia nagabautiso, kag ang tanan nagadugok sa iya.” 27Si Juan nagsabat, “Wala sing makabaton bisan ano luwas sang nahatag sa iya gikan sa langit. 28Kamo gid nagasaksi sa akon, nga nagsiling ako, Indi ako ang Cristo,#Juan 1:30. kondi nga ako ginpauna sa iya. 29Ang nakaangkon sang nobya amo ang nobyo; ang abyan sang nobyo, nga nagatindug kag nagapamati sa iya, nagakalipay sing daku bangud sang tingug sang nobyo; busa ining kalipay ko nabug-os na. 30Sia kinahanglan magdugang, apang ako kinahanglan magbuhin.”
Ang Nagagikan sa Ibabaw
31Ang nagahalin sa ibabaw labaw sa tanan; ang natungud sa duta sa duta naigo, kag nagapamolong sia nahanungud sa duta; ang nagahalin sa langit labaw sa tanan. 32Nagasaksi sia sang iya nakita kag nabatian, apang wala sing nagabaton sang iya panaksi; 33ang nagabaton sang iya pagpamatuud nagapahamtang sang iya pat-in sa sini, nga ang Dios matuud. 34Kay ang ginpadala sang Dios nagapamolong sang mga polong sang Dios, kay wala niya ginatakus ang iya paghatag sang Espiritu; 35ang Amay nagahigugma sang Anak, kag nagtugyan sang tanan nga butang sa iya kamut.#Mat. 11:27; Luc. 10:22. 36Ang nagatoo sa Anak may kabuhi nga walay katapusan; apang ang wala nagatuman sa Anak indi makakita sang kabuhi, kondi ang kasingkal sang Dios nagapabilin sa iya.
Избрани в момента:
JUAN 3: ABHIL82
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ang Biblia ©1982 Philippine Bible Society